Tuesday, 15 March 2011 21:12
သိုၵ်းမၢၼ်ႈ တႄႇဝဵင်းမႂ်ႇ၊ တိူင်းသိုၵ်းမႂ်ႇ တီႈၶူဝ်လမ် မိူင်းတႆး ပွတ်းၵၢင်ၼၼ်ႉ၊ မၢၼ်ႈၸႂ်ႉ ၵူၼ်းမိူင်း ႁိမ်းႁွမ်း တီႈၸိူဝ်းၶဝ် တေတင်ႈ တိူင်းသိုၵ်း မႂ်ႇၼၼ်ႉ ပၢႆႈမိူဝ်းယူႇ ၶူဝ်လမ်၊ မၢၼ်ႈလၢတ်ႈ ၶေႃႈဢၢင်ႈဝႃႈ ၵူၼ်းသိုၵ်း ၵႆႉယိုဝ်း သိုၵ်းမၢၼ်ႈ ၼႃႇဝႃႈ ၼင်ႇၼႆ။ ဢၼ်ၶဝ်ၸႂ်ႉ ၶၢႆႉပၢႆႈၼၼ်ႉ ပၼ်ၶၢဝ်းတၢင်း 20 ဝၼ်းပၢႆ တင်ႈတႄႇ ဝၼ်းထိ 15.03.2011 ထိုင် 10.04.2011 ႁႂ်ႈၶၢႆႉယဝ်ႉမူတ်း။

တင်းၼမ် ႁူဝ်ၵူၼ်း ၵူၼ်းမိူင်း ၸိူဝ်းထုၵ်ႇၺႃး သိုၵ်းမၢၼ်ႈ လိုပ်ႈႁေႃႈ ၶၢႆႉပၢႆႈ ၸၢႆးယိင်း ႁူမ်ႈၵၼ် တင်းမူတ်း မီး 3000 ပၢႆ။ ၽၢႆႇၼိုင်ႈၵေႃႈ သိုၵ်းမၢၼ်ႈၶဝ် ဢထမ်ႇမ ၸႂ်ႉၵိၼ်ႁႅင်းလၢႆ ၵူၼ်းမိူင်း တႃႇႁဵတ်း တပ်ႉမႂ်ႇၶဝ်ၼၼ်ႉ လႄႈ ၵူၼ်းမိူင်း ၸိူဝ်းဢၼ် ဢမ်ႇၶၢမ်ႇလႆႈ ၸိူဝ်းဢၼ် သိုၵ်းမၢၼ်ႈၶဝ် ဢထမ်ႇမ ၸႂ်ႉၵိၼ်ႁႅင်းလၢႆ၊ ဢထမ်ႇမ ၶၢၼ်း ၵူႈၸိူဝ်းၸိူဝ်းၼၼ်ႉ ၵေႃႈ ဢွၼ်ၵၼ် ပၢႆႈၶဝ်ႈ မိူင်းထႆးၵႂႃႇ ပႅတ်ႈၵေႃႈ မီးတင်း ၼမ်။

မၢၼ်ႈႁၢင်ႈႁႅၼ်း သိုၵ်းတႃႇလိုပ်ႈတိုၵ်း ၸုမ်းၵိုတ်းသိုၵ်း၊ တၢင်းၼႄႇမိူင်းၶၢင်ၵေႃႈ ဢဵၼ်ႁႅင်း သိုၵ်းမၢၼ်ႈ ဢမ်ႇယွမ်း 30 တပ်ႉၵွင် (တပ်ႉယိၼ်း) လွမ်ႉဝႆႉၵူႈၽၢႆႇ။ ၽၢႆႇၼိုင်ႈ တၢင်းၼိုင်ႈ သူပ်းတႄႉလၢတ်ႈလီ လၢႆးႁဵတ်းသမ်ႉ တေဢဝ်သိုၵ်း ဢိူမ်ႈၸမ်ပိၵ်ႉလွမ်ႉ ဝႆႉၵူႈၽၢႆႇ၊ ပေႃးသဵင်ၵွင်ႈ တႅၵ်ႇမႃး ႁႂ်ႈႁုပ်ႈသိမ်းလႆႈ ၼၼ်ႉယဝ်ႉ။

တၢင်းၽၢႆႇ တပ်ႉသိုၵ်းၸိုင်ႈတႆး (SSA/SSPP) ဝၢၼ်ႈႁႆး၊ မိူင်းၵၢဝ်၊ ၼမ်ႉလဝ်း ၼႆႉၵေႃႈ တတ်းသဵၼ်ႈ တၢင်းၵႃး ၼမ်ႉလၼ်ႈမႃး မိူင်းတုင်၊ ဝၢၼ်ႈႁႆး။ တတ်းတၢင်းၵႃး မိူင်းၸၢင် ၶဝ်ႈႁၢႆးပႃ၊ ဢၼ်ၶဝ် တတ်းတၢင်းၵႃးၼႆႉ ပဵၼ်တႃႇၵႅတ်ႇဝႆႉယႃႇႁႂ်ႈတင်း တပ်ႉသိုၵ်းၸိုင်ႈတႆး (SSA/RCSS) ၵပ်းသိုပ်ႇၵၼ်ငၢႆႈ တႃႇတေတႃႉ ႁႅင်းသိုၵ်း ထႅမ်ၵၼ်။ မိူဝ်ႈလဵဝ် မၢၼ်ႈဢဝ်ႁႅင်းသိုၵ်း 20 တပ်ႉၵွင် (တပ်ႉယိၼ်း) ပိၵ်ႉလွမ်ႉဝႆႉ တၢင်းၶဝ်ႈဝၢၼ်ႈႁႆး၊ မိူင်းၵၢဝ် ၵူႈၽၢႆႇ။ တၢင်းမိူင်းၼွင် ၶဝ်ႈဝၢၼ်ႈႁႆး၊ တၢင်းမိူင်းယၢႆး ၶဝ်ႈမိူင်းၵၢဝ် ဝၢၼ်ႈႁႆး၊ တၢင်းလႃႈသဵဝ်ႈ မႃးဝၢၼ်ႈႁႆးၸိူဝ်းၼႆႉ သိုၵ်းမၢၼ်ႈ ဢမ်ႇပၼ်ၶိူင်ႈၵိၼ်ယႅမ်ႉ ၵူႈၸိူဝ်း ၶဝ်ႈဝၢၼ်ႈႁႆး ႁဵတ်းႁႂ်ႈ တပ်ႉသိုၵ်းၸိုင်ႈတႆး (SSA/SSPP) ဝၢၼ်ႈႁႆး ၶဝ်ယူႇယၢပ်ႇၼၼ်ႉယဝ်ႉ။

ပွတ်း ၽၢႆႇဢွၵ်ႇၶူင်း တင်ႈတႄႇ ၽင်ႇၶူင်းထိုင် မၢၵ်ႇမၢင်း၊ တႄႇမၢၵ်ႇမၢင်းထိုင် မိူင်းၽျၢၵ်ႈ၊ မိူင်းလၢင်းၼၼ်ႉ မၢၼ်ႈႁဵတ်းတပ်ႉ ၶႅၼ်ႈၵၼ်ဝႆႉမီး 15 တပ်ႉ၊ ဢဵၼ်ႁႅင်းမၢၼ်ႈ ဢမ်ႇယွမ်း 35 တပ်ႉၵွင် (တပ်ႉယိၼ်း) လွမ်ႉပိၵ်ႉတၢင်းဝႆႉ ၵူႈၽၢႆႇ ယႃႇႁႂ်ႈ တပ်ႉ "ဝ" ပွတ်းႁွင်ႇ ၵပ်းသိုပ်ႇၵၼ်လႆႈ တၢင်းတပ်ႉ "ဝ" ဢၼ်မီးယူႇ ပွတ်းၸၢၼ်း၊ မၢၼ်ႈၶဝ် ႁၢင်ႈႁႅၼ်းသိုၵ်း တႃႇတူဝ်ႈတၼ်း တိုၵ်းမိူဝ်ႈ ငၢဝ်းလၢႆး ၶဝ်ပၼ်မႃးၼၼ်ႉ ယဝ်ႉ။

မၢၼ်ႈမႃး ပၵ်းၵိင်ႇၸႄႈဝဵင်းၽႄ တီႈမိူင်းထႃး ဢဵၼ်းဢၢၼ်း တႃႇမႃးၵေႃႇတင်ႈပဵၼ် ဝဵင်းဢွၼ်ႇ၊ ယိူင်းဢၢၼ်းတတ်းၶၢတ်ႇ ယႃႇႁႂ်ႈ "ဝ" တင်း တပ်ႉသိုၵ်းၸိုင်ႈတႆး (SSA/RCSS) ၵပ်းသိုပ်ႇၵၼ်လႆႈ။ ဢဝ်ၸၢဝ်းၶိူဝ်း မၢၼ်ႈၶဝ်လႄႈ ဢဝ်ၸၢဝ်းၶိူဝ်း လႃးႁူႇ မႃးပဵၼ် ၵူၼ်းမိူင်း ပၵ်းသဝ်း သင်ဝႃႈၶဝ် ပၵ်းဝဵင်းတီႈၼႆႉယဝ်ႉ ၵူၼ်းၵႃႉယႃႈၾိၼ်ႇ ၸွမ်းလႅၼ်လိၼ် ႁူႉတေၽေႈလၢမ်း ထႅင်ႈဢမ်ႇႁၢင်ႉ။

ဢိင်ၼိူဝ် ငဝ်းလၢႆး ပဵၼ်ၼင်ႇၼႆၼၼ်ႉ သင်ဝႃႈပၢင်တိုၵ်း ၵိူတ်ႇၶိုၼ်ႈမႃး ၵူၼ်းမိူင်း တေလႆႈၶၢမ်ႇ ၼႂ်းၵႄႈပၢင်တိုၵ်း တေပၢႆႈ၊ တေတၢႆ ပဵၼ်ဝၢၼ်ႈႁၢမ်း မိူင်းႁၢမ်းၼႆ မၢၼ်ႈၶဝ် တေ​တေႃႉဢဝ် ၵူၼ်းမိူင်းမၢၼ်ႈၶဝ် မႃးယူႇပၵ်းသဝ်း တႃႇႁိမ်ဢဝ် ဝၢၼ်ႈၼႃးႁိူၼ်းယေးၵူၼ်းမိူင်းတႆး ၼၼ်ႉယဝ်ႉ။