ၵႃႇလိင်ႇထွႆႉ ႁူဝ်ၼႃႈ ပီႇတူႉၸိတ်ႉ ဝၢၼ်ႈပၢင်ႇ၊ ၸႄႈဝဵင်း လၢႆးၶႃႈ တိၺွပ်း ၵူၼ်းမိူင်း ဢၼ် ဢမ်ႇမီး တၢင်းၽိတ်း သင်သေ ၶႃႈႁႅမ်တၢႆပႅတ်ႈ ၼင်ႇမိူၵ်ႈမိူၵ်ႈ လိူင်းလိူင်း။

မိူဝ်ႈဝၼ်းထိ 01.04.2012 မိူဝ်ႈပွႆး သၢင်ႇလွင်း ဝၢၼ်ႈပၢင်ႇ မႅၼ်ႈဝၼ်း ၶၢမ်ႇၶႅၵ်ႇၼၼ်ႉ ပျီႇတူႉၸိတ်ႉ ဝၢၼ်ႈပၢင်ႇၶဝ် မတ်ႉဢဝ် လုင်းဢိင်ႇတႃႉဢွင်ႇ ဢႃႇယု 48 ပီႊ လုၵ်ႈ လုင်းၵၢင်ႉၸိင်ႇလႄႈ မႄႈပႃႈပိူင်း တီႈၵိၵ်ႉ တၢင်းၶဝ်ႈ ဝၢၼ်ႈပၢင်ႇ မိူဝ်ႈၽွင်း မၼ်းတိုၵ်ႉ ပွၵ်ႈပွႆး သၢင်ႇလွင်း မႃး။

ၸုမ်း ပီႇတူႉၸိတ်ႉ ဢၼ်မႃး တိၺွပ်း မၼ်းၼၼ်ႉ ဢဝ်တိၼ် ပိတ်ႉမၼ်း ၶဝ်ႈလူင်း ၼႂ်း ၶွၵ်ႈ လုၵ်းလိၼ် သေၵုမ်းၶင်ဝႆႉ။ မိူဝ်ႈ ပီႇတူႉၸိတ်ႉၶဝ် တိဢဝ် လုင်းဢိင်ႇတႃႉဢွင်ႇ မႃးတႄႉဝႃႈ ယွၼ်ႉမၼ်း သူႇယႃႈဝႃႈၼႆ၊ ၵူၺ်းၵႃႈ တီႈတေႉမၼ်း လုင်း ဢိင်ႇတႃႉဢွင်ႇ ၼၼ်ႉ မၼ်းဢမ်ႇ သူႈယႃႈ ပေႃးႁိုင်ၼႃႇယဝ်ႉ။

ဝၢႆးသေၼၼ်ႉ ၸုမ်း ပီႇတူႉၸိတ်ႉ ၶဝ် ၵုမ်းၶင် မၼ်းဝႆႉသေ ဢဝ်ဢွၵ်ႇၶွၵ်ႈ လုၵ်းလိၼ်မႃး ၸႅတ်ႈဝၼ်း သွင်ပွၵ်ႈ ၵူၺ်းၵႃႈ ဢမ်ႇၸႅတ်ႈ လွင်ႈ ယႃႈသင်၊ ၸိၼႄး မၼ်းဝႃႈ ပဵၼ်ၵူၼ်း ဢၼ်ႁွင်ႉ တပ်ႉသိုၵ်းတႆး ၶဝ်ႈသိမ်း တပ်ႉမၼ်း ဝၢၼ်ႈပၢင်ႇ၊ လႄႈ ဢၼ်ၼိုင်ႈၵေႃႈ ၸိၼႄး မၼ်းဝႃႈ ဢဝ်လွင်ႈ ႁဵတ်းသၢင်ႈၶွင် တပ်ႉ ပီႇတူႉၸိတ်ႉၶဝ် ဝၢၼ်ႈပၢင်ႇ ၵႂႃႇတၢင်ႇလၢတ်ႈ တီႈလုမ်း သိူဝ်ၽိူၵ်ႇ ၼႂ်းဝဵင်း လၢႆးၶႃႈၼၼ်ႉ ဝႃႈၼႆ။

မိူဝ်ႈၶဝ် တႄႇတိၺွပ်း ၵႂႃႇၼၼ်ႉ ပီႈၼွင်ႉ ၸိူဝ်ႉၶိူဝ်း လုင်းဢိင်ႇတႃႉဢွင်ႇ ၶဝ် ၵႂႃႇယွၼ်း ထူပ်းလႄႈ တုၵ်းယွၼ်း ႁႂ်ႈၶႂၢင်ႉပွႆႇပၼ်ၶိုၼ်း ၵေႃႈ ဢမ်ႇလႆႈ၊ ပၢႆႁိုတ်းလႃႇ တဵင်ၵႂၢမ်းပႃးဝႃႈ သူၵေႃႈ ယင်းလူဝ်ႇ ၺႃးပႃး ၵွၼ်ႇဢိူဝ်ႈ ဝႃႈၼႆလႄႈ ပီႈၼွင်ႉ လုင်းဢိင်ႇတႃႇၵေႃႈ ဢွၼ်ၵၼ် ၵူဝ်ႁႄၵၼ်ဝႆႉ ယူႇမူတ်း။

ထိုင်ဝၢႆးၼႆႉ ပီႈၼွင်ႉ လုင်းဢိင်ႇတႃႉၶဝ် ယွၼ်းၵႂႃႇထူပ်း ၵႂႃႇၸႂ်းတူၺ်း သေတႃႉ ၸုမ်း ပီႇတူႉၸိတ်ႉ ဝၢၼ်ႈပၢင်ႇ ၶဝ်ဝႃႈ ၶၢႆႉဝႆႉတီႈ ၶွၵ်ႈၼၼ်ႉ ၶွၵ်ႈၼႆႉ ၼႆသေ ဢမ်ႇလႆႈ ႁူပ်ႉထူပ်း သေပွၵ်ႈ။

လႅင်ႇၶၢဝ်ႇ ပွင်ႇလၢတ်ႈ ၼႄမႃး မိူဝ်ႈၼႆႉ 27.04.2012 ၼႆႉဝႃႈ လႆႈႁူႉၶိုၼ်း တီႈၵူၼ်းမိူင်း ဝၢၼ်ႈပၢင်ႇၶဝ် ဢၼ်ဢွၼ်ၵၼ် ပၢႆႈမႃးၼၼ်ႉ လၢတ်ႈၼႄဝႃႈ ၵူၼ်းမိူင်း ဝၢၼ်ႈပၢင်ႇၶဝ် လႆႈငိၼ်းၶိုၼ်း တီႈ ၵူၼ်းၼႂ်း ပီႇတူႉၸိတ်ႉ ၶဝ်ဝႃႈ လုင်း ဢိင်ႇတႃႉဢွင်ႇ ၼၼ်ႉ ၵႃႇလိင်ႇထွႆႉ  ဢဝ်ၵႂႃႇတၢႆပႅတ်ႈ တီႈ ၼွင်မၢတ်ႈ၊ ၽၢႆႇဢွၵ်ႇ ၼမ်ႉတွင်း ပဵၼ်ပွတ်း တၢင်းဢွၵ်ႇ ၶွင်ဝၢၼ်ႈပၢင်ႇ ၼၼ်ႉယဝ်ႉ၊ ၵူၺ်းၵႃႈ ဢဝ်တၢႆပႅတ်ႈမိူဝ်ႈ လႂ်ၼၼ်ႉ ဢမ်ႇၸၢင်ႈ ႁတ်းထၢမ်လႄႈ ဢမ်ႇႁူႉ တႅတ်ႈတေႃး ဝႃႈၼႆ။

လိူဝ်သေၼၼ်ႉ  ၵႃႇလိင်ႇထွႆႉ ယင်းဢွၵ်ႇ ၵႃႈႁူဝ် ၶသလ ၸၢႆးတိ ဢၼ်ဢွၼ်ႁူဝ် လုၵ်ႈၼွင်ႉသေ ၶဝ်ႈမႃး ႁူမ်ႈႁွမ်းၸွမ်း တပ်ႉသိုၵ်း ၸိုင်ႈတႆးၼၼ်ႉ 30 သႅၼ်၊ လိူဝ်သေၼၼ်ႉ ၵူၼ်းမိူင်း ၸိူဝ်းဢၼ်မၼ်း ထၢင်ႇထိူမ်ၼၼ်ႉ ၸိၼႄးဝႃႈ ပဵၼ်ၵူၼ်း ၵပ်းသိုပ်ႇ သူင်ႇၶၢဝ်ႇပၼ် တပ်ႉသိုၵ်း ၸိုင်ႈတႆး လႄႈ ပႃႇတီႇ သိူဝ်ၽိူၵ်ႇ ၼႆသေ ဢွၵ်ႇၵႃႈႁူဝ် လုင်းၵၢမ်ႇ (ၵေႃႇမတီႇ ဢိူင်ႇဝၢၼ်ႈႁႅင်ႈ) 15 သႅၼ်၊ ၸရေး ပၼ်တိ ဝၢၼ်ႈ မွၵ်ႇၸၢမ် 15 သႅၼ်၊ ၸၢႆးၼၼ်ႇတေႃး လုၵ်ႈလုင်း ၶမ်းဢွင်ႇ၊ ပႃႈလဵၵ်ႉ 15 သႅၼ်။ ၸၢႆးၼၼ်ႇတေႃး ၼၼ်ႉ ယွၼ်ႉလူၺ်ႈၵူဝ် ၵႃႇလိင်ႇထွႆႉ လႃႈလီမႃး တိၺွပ်း ဢဝ်ၵႂႃႇတၢႆ ၼႆလႄႈ ပၢႆႈၵႂႃႇၼုင်ႈသၢင်ႇၵၢၼ်း ပဵၼ်သၢင်ႇလူင် ယူႇတီႈ ဝတ်ႉၵျွင်းတေႃႇ၊ တီႈႁူဝ်ဝဵင်း လၢႆးၶႃႈ ယူႇၵေႃႈ ယင်းဢမ်ႇႁတ်း ဢွၵ်ႇဝၢင်းဝတ်ႉ ၼႆယဝ်ႉ။

မိူဝ်ႈလဵဝ် ၵူၼ်းမိူင်း ၼႂ်းဝၢၼ်ႈပၢင်ႇ ဢွၼ်ၵၼ်ၵူဝ်ႁႄ သေ ပၢႆႈၶဝ်ႈမႃး ယူႇၼႂ်းဝဵင်း လၢႆးၶႃႈသေ ဢမ်ႇႁတ်း ပွၵ်ႈမိူဝ်းၶိုၼ်း ဝၢၼ်ႈပၢင်ႇ တီႈဝၢၼ်ႈၵိူတ်ႇ တူဝ်ၵဝ်ႇၵေႃႈမီး၊ မိူၼ်ၼင်ႇ ၵူၼ်းလူင် ၼႂ်းဝၢၼ်ႈပၢင်ႇ ၵေႃႈၶႂ်ႈၵႂႃႇ သိုဝ်ႉၶူဝ်းၶွင် ၼႂ်းဝဵင်း လၢႆးၶႃႈသေတႃႉ ဢမ်ႇႁတ်းၵႂႃႇ ၵူဝ်ထုၵ်ႇ ၸိၼႄးဝႃႈ ၵႂႃႇသူင်ႇၶၢဝ်ႇ ပၼ် တီႈပႃႇတီႇ သိူဝ်ၽိူၵ်ႇ မိူၼ်ၼင်ႇ လုင်းဢိင်ႇတႃႉဢွင်ႇ သေ ၺႃးၶႃႈ ႁႅမ်တၢႆလၢႆ ၼႆယဝ်ႉ။

မိူဝ်ႈဝၼ်းထိ 17.03.2011 ၼၼ်ႉ ၵႃႇလိင်ႇထွႆႉ ဢထမ်ႇမ ယွၼ်းငိုၼ်း တၢင်တႅၼ်း ၶဝ်ႈသၢၼ် (ဢၼ်ၶၢၼ်းၵိၼ် ၼိူဝ်ၵူၼ်းမိူင်း) ၼႂ်းဢိူင်ႇ ပၢင်သၢင်း တႃႇငိုၼ်း 600000 ပျႃး (ႁူၵ်းသႅၼ်ပျႃး)၊ ယွၼ်းလၢႆလၢႆ ဢိူင်ႇမိူၼ်ၵၼ်၊ လိူဝ်သေၼၼ်ႉ ဢဝ်ငိုၼ်း တၢင်သိုၵ်း ပီႇတူႉၸိတ်ႉမႂ်ႇ ဢၼ်ၶဝ် ၵဵပ်းသိုၵ်း ပေႃးဢမ်ႇၶႂ်ႈမႃး ႁဵတ်းသမ်ႉလႆႈ ပၼ်တူဝ်ငိုၼ်းဢဝ် တေႃႇ 1 ၵေႃႉလႂ် 20-30 သႅၼ်။

မိူဝ်ႈဝၼ်းထိ 14.05.2011 ယၢမ်း 16:00 မူင်းၼၼ်ႉ ၵေႃႈ ၵႃႇလိင်ႇထွႆႉ ၸတ်း လုၵ်ႈၼွင်ႉမၼ်း 7 ၵေႃႉ ၵႂႃႇႁႅမ်တၢႆ လုင်းၸႃႇရိင်ႇ တီႈႁိမ်း ၼမ်ႉႁူးမီ၊ ၸမ်ႁိမ်းဝၢၼ်ႈ ႁူဝ်ၼမ်ႉလူင်တေႃႇ၊ ဢိူင်ႇဝၢၼ်ႈထီႇ၊ ၸႄႈဝဵင်းလၢႆးၶႃႈ၊ ယွၼ်ႉလူၺ်ႈ ၵႃႇလိင်ႇထွႆႉ ၵူႈယိမ်ငိုၼ်း ဝႆႉတီႈ လုင်းၸႃႇရိင်ႇ 10,000,000 ပျႃး (ၼိုင်ႈပၢၵ်ႇသႅၼ်ပျႃး) လႄႈ ၵူႈဢဝ်ငိုၼ်း တႃႇႁဵတ်း ၾႆးၾႃႉ ၸႂ်ႉၼႂ်း တပ်ႉပီႇတူႉၸိတ်ႉ ၶဝ်ၸႂ်ႉ 5,000,000 ပျႃး (ႁႃႈသိပ်းသႅၼ်) သေ ယွၼ်ႉ ဢမ်ႇၶႂ်ႈတႅၼ်း ၶိုၼ်းငိုၼ်း လုင်းၸႃႇရိင်ႇ လႄႈ ၸင်ႇၸႂ်ႉ လုၵ်ႈၼွင်ႉမၼ်း ၽၢမ်းတူဝ်သေ ၵႂႃႇတိၺွပ်း ႁႅမ်တၢႆပႅတ်ႈ။

ၸဝ်ႈသင်ၶ တူၼ်ၸဝ်ႈ ဢၼ်ယူႇပွတ်း ဝၢၼ်ႈၼွၵ်ႈ ၼႃးပၢင်ႇ တူင်ႇဝဵင်း လၢႆးၶႃႈ တူၼ်ၼိုင်ႈ (ဢမ်ႇႁတ်း ပိုတ်ႇၽုၺ်ႇ ၸိုဝ်ႈလႄႈ တီႈယူႇတႄႉ) လႆႈပၢႆႈ ဢွၵ်ႇမိူင်း ႁွတ်ႈမႃး မိူင်းထႆး မိူဝ်ႈဝၼ်းထိ 25.09.2011 ၼၼ်ႉ လၢတ်ႈၼႄဝႃႈ တူဝ်တူၼ် သင်ႇၶၸဝ်ႈ ၵေႃႈ ယင်းထုၵ်ႇ ၵႃႇလိင်ႇထွႆႉ ၸိၼႄး ဝႃႈ ပဵၼ်သၢႆၶၢဝ်ႇ ပၼ်သိုၵ်းတႆး ၼႆသေ ပွႆႇလုၵ်ႈၼွင်ႉမၼ်း ဢၢၼ်းၵႂႃႇ လၵ်ႉႁႅမ် မၼ်းၸဝ်ႈ၊ ၵူၺ်းၵႃႈ ၺႃးမိူဝ်ႈ ဢူၽုင်းလီ မၼ်းၸဝ်ႈ ဢမ်ႇမီးဝႆႉ တီးဝတ်ႉ၊ ၽိူဝ်ႇထိုင် ႁူႉၶိုၼ်း ပဵၼ်ၼႂ်း ဝႃႇသေတႃႉ ဢမ်ႇၸၢင်ႈ ႁဵတ်းႁိုဝ် တူၼ်ၸဝ်ႈၵေႃႈ ၵႃႈလႆႈပၢႆႈ ဢွၵ်ႇမိူင်း ၶဝ်ႈမႃးယူႇဝႆႉ ၼႂ်းၸိုင်ႈထႆး ဝႃႈၼႆ။

ယွၼ်ႉလူၺ်ႈ ဢမ်ႇသိုပ်ႇယဵၼ်ႉ သီးၶၢမ်ႇ လႆႈတေႃႇ လွင်ႈမိူၵ်ႈမႂ်ႈ ၶွင် ၵႃႇလိင်ႇထွႆႉသေ ၵူၼ်းသိုၵ်း ပီႇတူႉၸိတ်ႉ ဝၢၼ်ႈပၢင်ႇ ၶဝ် 50 ၵေႃႉမႃး ႁူမ်ႈႁွမ်းတီႈ တပ်ႉသိုၵ်း ၸိုင်ႈတႆး မိူဝ်ႈဝၼ်းထိ 22.12.2011 ၼၼ်ႉ ၵေႃႈ လၢတ်ႈၼႄဝႃႈ ၵႃႇလိင်ႇထွႆႉ ဢၼ်ပဵၼ် ၽူႈဢွၼ်ႁူဝ် ၸုမ်း ပီႇတူႉၸိတ်ႉ ၶဝ် ဢမ်ႇတြႃးသေ ဢဝ်ၵူၼ်း ၼႂ်းတပ်ႉၶဝ်တၢႆ ပွၵ်ႈလဵဝ်ၵူၼ်း 13 ၵေႃႉ ပႃးတင်း လုၵ်ႈမေး ၵူၼ်းပီႇတူႉၸိတ်ႉ ၶဝ် ၼင်ႇမိူၵ်ႈမိူၵ်ႈ လိူင်းလိူင်း ၼႆယဝ်ႉ၊ ၵဵဝ်ႇလူၺ်ႈ လွင်ႈၼႆႉ ၵူၼ်းမိူင်း ဝၢၼ်ႈပၢင်ႇၶဝ် လႆႈၵႂႃႇ တၢင်ႇလၢတ်ႈဝႆႉ တီႈပႃႇတီႇ သိူဝ်ၽိူၵ်ႇ တႃႇတေ ပၼ်ဢပႅတ်းတၢမ်ႇ တီႈ ၵႃႇလိင်ႇထွႆႉ ၸွမ်းၼင်ႇ မၢႆမီႈ ဢုပ်ႉပိူင်ႇ ဝၢၼ်ႈမိူင်းဝႆႉ သေတႃႉ ယင်းပႆႇမီး လွင်ႈၶိုပ်ႈၼႃႈသေ ဢမ်ႇၵႃး မိူဝ်ႈလဵဝ် ၵႃႇလိင်ႇထွႆႉ ယိုင်ႈၶႅၼ်း လႃႈလီဢဝ်တၢႆ ၵူၼ်း ၼႃႇလိူဝ်ၵဝ်ႇ ၼႆယဝ်ႉ။

ၵႃႇလိင်ႇထွႆႉ (ႁွင်ႉ) ၸၢႆးၵႃႇလိင်ႇ (ႁွင်ႉ) ဢၢႆႈထွႆႉ တီႈယူႇဝၢၼ်ႈ ၼႃးလွၼ်၊ ဢိူင်ႇ ပၢင်ႇၵေႇတူႉ၊ ၸႄႈဝဵင်း မိူင်းၵိုင် ပဵၼ်လုၵ်ႈၼွင်ႉ တမ်းၸႂ် မိူင်းၸိုၼ်ႈ(ၽူႈႁၵ်းလင် ၸိူဝ်ႉၸၢတ်ႈ)၊ ဝၢႆးမိူင်းၸိုၼ်ႈ တၢႆ ၶိုၼ်ႈပဵၼ် ႁူဝ်ၼႃႈ ပီႇတူႉၸိတ်ႉ ဝၢၼ်ႈပၢင်ႇ၊ ၸႄႈဝဵင်း လၢႆးၶႃႈ တႅၼ်းတီႈ မိူင်းၸိုၼ်ႈ။

တႆးလွတ်ႈလႅဝ်း