ၸုမ်းၽၢႆႇ ပၵ်းတႃယႃႈမဝ်းၵမ် ၸိုင်ႈတႆး Shan Drug Watch (SDW) လၢတ်ႈဝႃႈ လွင်ႈၽုၵ်ႇယႃႈ ၼႂ်းမိူင်းတႆး တိူဝ်းၼမ်မႃး လိူဝ်ၵဝ်ႇ သေဢမ်ႇၵႃး လႆႈႁၼ်ၽုၵ်ႇမႃး ၼႂ်းၵူႈၸႄႈဝဵင်း ဝႃႈၼႆ။
မိူဝ်ႈဝၼ်းထီႉ 26.06.2012 ၊ ၶၢဝ်းယၢမ်းၵၢင်ၼႂ် 10:00တေႃႇ 12:00မူင်း၊ ၸုမ်းပၵ်းတႃ ယႃႈမဝ်းၵမ် ၸိုင်ႈတႆး Shan Drug Watch (SDW) လႆႈၸတ်းႁဵတ်း ပၢင်သပ်းလႅင်း ၸႅင်ႈၶၢဝ်ႇ ၵဵဝ်ႇၵပ်းလွင်ႈ ၽိုၼ်လၢႆးငၢၼ်း ယႃႈမဝ်းၵမ် ဢၼ်ၸိုဝ်ႈဝႃႈ ပႄႉၼင်ႇၵၼ် (win-win solution) တီႈၸၼ်ႉၸွမ် ၵဵင်းမႆႇသေ လႆႈလၢတ်ႈ လွင်ႈငဝ်းလၢႆး ယႃႈမဝ်းၵမ် ပီႊ 2011-12 တိူဝ်းၼမ်မႃး လိူဝ်ၵူႈပီႊ၊ ယွၼ်ႉပိူဝ်ႈဝႃႈ ၵူၼ်းမိူင်းၼႆႉ လႆႈႁႃႁဵတ်းၵိၼ် လဵင်ႉတွင်ႉ တူဝ်ၵဝ်ႇသေ ဢမ်ႇၵႃး တိုၵ်ႉလႆႈ ထၢမ်းၶွၼ်ႇပၼ် တီႈတပ်ႉသိုၵ်းမၢၼ်ႈ၊ ဢိၵ်ႇပႃး ၸုမ်းယိပ်းၵွင်ႈၵၢင်ႇ တၢင်းလၢႆ ဝႃႈၼႆ။

ၵဵဝ်ႇၵပ်း လွင်ႈၼႆႉ ႁူဝ်ၼႃႈၸုမ်းၶၢဝ်ႇ ၽူႈတွႆႇႁွၵ်ႈ ၶိုၼ်းသႂ်ၸႂ်ယဵၼ် လၢတ်ႈၼႄဝႃႈ“ႁဝ်းထၢမ်ၵူၼ်းမိူင်း ဢၼ်ၽုၵ်ႇယႃႈ၊ ယွၼ်ႉသင်လႄႈၽုၵ်ႇ၊ ၶဝ်တွပ်ႇမႃးႁႃႈၶေႃႈ 1.တွၼ်ႈတႃႇတေ လဵင်ႉတပ်ႉသိုၵ်းမၢၼ်ႈ၊ 2.တႃႇလဵင်ႉသိုၵ်း ၵူၼ်းထိူၼ်ႇ၊ 3.တႃႇလဵင်ႉ ပီႇတုၸိတ်ႉ၊ 4.တႃႇလူႇ တႃႇတၢၼ်း၊ 5.ၸင်ႇမႃႈထိုင် တႃႇလဵင်ႉလူ ၼႃႈႁိူၼ်းၶဝ် ဝႃႈၼႆ”။

လုၵ်ႈၸုမ်း ၵူၼ်းၼုမ်ႇပဢူဝ်း Pa-O Youth Organization (PYO) ၶုၼ်ၶျႅင်ႇၶႄးၵေႃႈ လၢတ်ႈဝႃႈ တီႈၼႂ်းမိူင်းတႆး ပွတ်းၸၢၼ်း မိူၼ်ၼင်ႇ ၸႄႈဝဵင်းႁူဝ်ပုင်း၊ ၸႄႈဝဵင်း သီႇသႅင်ႇၵေႃႈ လႆႈၽုၵ်ႇယႃႈ တိူဝ်းၼမ်မႃး၊ ၵွပ်ႈပိူဝ်ႈဝႃႈ ပေႃႈမႄႈ ပီႈၼွင်ႉၵူၼ်းမိူင်း ထုၵ်ႇတပ်ႉသိုၵ်းမၢၼ်ႈ ယိုတ်းတီႈလိၼ်/ ႁႆႈ/ ၼႃး/ သူၼ်သေ ဢမ်ႇမီး တီႈၽုၵ်ႇသွမ်ႈ ႁဵတ်းႁႃၵိၼ်၊ ဢမ်ႇမီးငိုၼ်းၶဝ်ႈ ၸင်ႇလႆႈႁႃၽုၵ်ႇ ယႃႈၸွမ်း ၼႂ်းႁူၺ်ႈၼႂ်းလွႆ ဝႃႈၼႄ ၼင်ႇၼႆ “ပေႃးဢမ်ႇမီး တီႈလိၼ်ၵေႃႈ ဢမ်ႇမီးငိုၼ်း တႃႇႁဵတ်း ႁႃလဵင်ႉတွင်ႉ ၵွပ်ႈၼၼ် လိူဝ်သေၽုၵ်ႇယႃႈ ဢမ်ႇၸၢင်ႈ ႁႃငိုၼ်းၶဝ်ႈ တီႈလႂ်၊ မီးယႃႈၵူၺ်း ဢၼ်လႆႈငိုၼ်းၼမ်လႄႈ လႆႈဢွၼ်ၵၼ် ၽုၵ်ႇယႃႈ” လၢတ်ႈၸိူင်ႉၼႆ။

ႁူဝ်ၼႃႈ ၸုမ်းၶၢဝ်ႇ ၽူႈတွႆႇႁွၵ်ႈ ယင်းလၢတ်ႈထႅင်ႈဝႃႈ တွၼ်ႈတႃႇတေ ႁဵတ်းႁႂ်ႈ ယႃႈမဝ်းၵမ် မူတ်းႁၢႆၵႂႃႇ တႄႉတႄႉ တေလႆႈၵႄႈလိတ်ႈပၼ် ၵၢၼ်မိူင်း ဢွၼ်တၢင်း ၵွပ်ႈဝႃႈ ပၼ်ႁႃ ယႃႈမဝ်းၵမ်ၼႆႉ ၵဵဝ်ႇၶွင်ႈၵၢၼ်မိူင်း ဝႃႈၼႆ။

မၼ်းၸဝ်ႈ လၢတ်ႈၼႄ လၢႆႈၵႄႈလိတ်ႈဝႃႈ လူင်ပွင်ၸိုင်ႈမၢၼ်ႈလႄႈ ၸုမ်းယိပ်းၵွင်ႈၵၢင်ႇၶဝ် ထုၵ်ႇလီ ဢုပ်ႇဢူဝ်း ၵၢၼ်ပၢႆးမိူင်းသေ ႁဵတ်ႈၶေႃႈတူၵ်းလူင်း ဢၼ်တၢင်းသွင်ၽၢႆႇ ပဵင်းပေႃး လႆႈၸႂ်ၵၼ် ပေႃးၸိူင်ႉၼၼ် ၽၢႆႇလႂ်ၵေႃႈ ဢမ်ႇသုမ်း ဢမ်ႇပႄႉသေ လႆႈၽဵင်ပဵင်းၵၼ် မိူၼ်ၼင်ႇဝႃႈ သူပႄႉႁဝ်းပႄႉ၊ ပႄႉၼင်ႇၵၼ် (win-win solution) ၼၼ်ႉယဝ်ႉ ဝႃႈၸိူဝ်ႉၼင်ႇၼႆ။ ယိင်းယုမ်ႉၵႅဝ်ႈ လၢႆးငၢၼ်း။

တႆးလွတ်ႈလႅဝ်း