ၼႂ်းၵႄႈ လူင်ပွင်ႈၸိုင်ႈမၢၼ်ႈလႄႈ ၸၢဝ်းၶိူဝ်း ဢၼ်ယိပ်း ၵွင်ႈၵၢင်ႇ လႆႈႁဵတ်း လွင်ႈငမ်းယဵၼ်ၵၼ်မႃး တွၼ်ႈတႃႇတေ တိူဝ်းၶိုၼ်ႈယႂ်ႇ မၼ်ႈၵိုမ်းၼၼ်ႉ ဢမ်ႇႁိုင်သင် ၸုမ်းပႃႇတီႇ ၵၢၼ်မိူင်းလႄႈ ၸုမ်းယိပ်း ၵွင်ႈၵၢင်ႇ တေႁူပ်ႉထူပ်း ဢုပ်ႇဢူဝ်းၵၼ်ၼႆ လႆႈႁူႉမႃးတီႈ သဵင်တႆးၼေႃႇဝူၺ်း (DVB) လူၺ်ႈ ၶေႃႈယိုၼ်ယၼ် ၸၢႆးလႃႉၽူႈၶၢၼ်ပၢၵ်ႇ (SNLD) သေဢမ်ႇၵႃး တီႈတင်း ၶွင်ႇသီႇ ဢဝ်ၶိုၼ်းၸိုင်ႈတႆး RCSS/SSA ၶဝ်ၵေႃႈ မီးၽႅၼ်ၵၢၼ်သေ လၢတ်ႈပိုၼ်ၽၢဝ်ႇဝႆႉ ၸိူင်ႉၼင်ႇၼႆ။

မိူဝ်ႈပၢၼ် လူင်ပွင်ႈၸိုင်ႈ သိုၵ်းတပ်ႉမတေႃႇ ၽွင်းငမ်းၼၼ်ႉ ပႃႇတီႇၵၢၼ်မိူင်း တေဢမ်ႇလႆႈ ၵပ်းသိုပ်ႇ၊ ႁူပ်ႉထူပ်းတင်း ၸုမ်းယိပ်းၵွင်ႈၵၢင်ႇ၊ လိူဝ်သေသိုၵ်း ၶွင်ႊသီႇဢမ်ႇၼၼ် သိုၵ်းလူင်ပွင်ႈၸိုင်ႈၵူၺ်း တေလႆႈ ႁူပ်ႉထူပ်းၼႆ လႆႈဢွၵ်ႇ ၶေႃႈႁၢမ်ႈသီးဝႆႉ။

ထိုင်မႃး ပၢၼ်လူင်ပွင်ႈၸိုင်ႈ တဵင်းၸဵင်ႇ လႆႈႁဵတ်းလွင်ႈငမ်းယဵၼ်သေ ၽူႈဢွၼ်ႁူဝ် တီႇမူဝ်ႇၶရေသီႇ ၸိူဝ်ႉၸၢတ်ႈမၢၼ်ႈ (NLD) ဢွင်ႇသၢၼ်းသူႉၵျီႇ လႆႈႁူပ်ႉထူပ်း ၸုမ်းယိပ်းၵွင်ႈၵၢင်ႇ ပႃႇတီႇယၢင်း ဢွၼ်တၢင်းလႄႈ ယွၼ်ႉၼႆ ပႃႇတီႇၵၢၼ်မိူင်း 2010 ၸိူဝ်းၶဝ်ႈလိူၵ်ႈတင်ႈ မီးၽႅၼ်ၵၢၼ် တႃႇႁူပ်ႉထူပ်းတင်း ၸုမ်းယိပ်း ၵွင်ႈၵၢင်ႇ ဝႃႈၼႆ။

ပႃႇတီႇ ၵၢၼ်မိူင်း2010 ၸိူဝ်းၶဝ်ႈလိူၵ်ႈတင်ႈ လႆႈၶွတ်ႇၽွတ်ႈဝႆႉ ၸိုဝ်ႈပႃႇတီႇ ၸၢဝ်းၶိူဝ်းNBF (6)ၸုမ်း ၼႂ်းပႃႇတီႇၸိူဝ်းၼၼ်ႉ 1.ပႃႇတီႇ တီႇမူဝ်ႇၶရဵၵ်ႉတိတ်ႉ ၸိူဝ်ႉၶိူဝ်းတႆး (SNLD)၊ 2.ပႃႇတီႇရၶႅင်ႇ၊ 3.ပႃႇတီႇမွၼ်း၊ 4.ပႃႇတီႇၶျၢင်း၊ 5.ပႃႇတီႇယၢင်း၊ 6.ပႃႇတီႇယၢင်းလႅင် တေႇမိူဝ်ႈ ပၢင်လိူၵ်ႈတင်ႈ 2010 သေ လႆႈၶွတ်ႇၽွတ်ႈဝႆႉ ၼင်ႇၼႆ။

ၵဵဝ်ႇၵပ်း လွင်ႈၼႆႉ ၽူႈတၢင်တူဝ် ပႃႇတီႇၸၢဝ်းၶိူဝ်း (6)ၸုမ်း ဢၼ်တၢင်ႇမၢႆၾၢင်ဝႆႉ တီႈၸွမ်ၸိုင်ႈ ပေႃးထိုင် လိူၼ်ပႅတ်ႇ (August)မႃးၸိုင်၊ မီးၽႅၼ်ၵၢၼ် တႃႇႁူပ်ႉထူပ်း ၸုမ်းယိပ်းၵွင်ႈၵၢင်ႇၼႆ ၼိုင်ႈပႃႇတီႇ(3)ၵေႃႉ၊ တင်းမူတ်း(18)ၵေႃႉ တေႁူမ်ႈႁွမ်းၵၼ်သေ ႁူပ်ႉထူပ်းဢုပ်ႇဢူဝ်း ၸုမ်းယိပ်းၵွင်ႈၵၢင်ႇ ပိူဝ်ႈတႃႇ ၵမ်ႉၸွႆႈ ဢၼ်လူင်ပွင်ႈၸိုင်ႈ တဵင်းၸဵင်ႇဢွၼ်ႁူဝ် ႁဵတ်းသၢင်ႈ လွင်ႈလွတ်ႈလႅဝ်း ငမ်းယဵၼ်ၼၼ်ႉၼႆ ၽူႈၼမ်း ၼႂ်းၵူႈလွင်ႈလွင်ႈ ပႃႇတီႇ SNLD ၸၢႆးလႃႉ လၢတ်ႈၼႄ။ ယိင်းယုမ်ႉၵႅဝ်ႈ လၢႆးငၢၼ်း။

တႆးလွတ်ႈလႅဝ်း