တပ်ႉသိုၵ်း လူင်ပွင်ၸိုင်ႈမၢၼ်ႈ ၶဝ်သိုပ်ႇၽိူမ်ႉ ဢဵၼ်ႁႅင်းမႃးလႄႈ ပၢင်တိုၵ်း ၼႂ်းၵႄႈ တပ်ႉသိုၵ်းမၢၼ်ႈလႄႈ ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA  ၶဝ်လႆႈၶိုၼ်း သိုပ်ႇပဵၼ် ပၢင်တိုၵ်းၵၼ်မႃး တေႇမိူဝ်ႈဝၼ်းထိ 30 .6.12 တေႃႇထိုင်မိူဝ်ႈၼႆႉ ယဝ်ႉမိူဝ်ႈဝၼ်းထီႉ 2. 7. 2012 ၼႆႉပဵၼ်တီႈ မိူင်းတႆးပွတ်းႁွင်ႇ ၸႄႈဝဵင်း မိူင်းသူႈႁိမ်း ဢိူင်ႇမိူင်းဢွတ်ႇ မိူဝ်ႈၼႆႉတႄႉလၢမ်းမႃးတင်း တၢင်ႉယၢၼ်း မိူင်းၵၢဝ် ဢမ်ႇထၢတ်ႇ ဢမ်ႇဝၢႆး ဝႃႈၼႆ။

SSPP/SSA ဝႃႈ “မိူဝ်ႈ သိုၼ်း ဝၼ်းထိ 1.7.12 ၵေႃႈ လႆႈယိုဝ်းၵၼ် တင်းဝၼ်း၊ ထိုင်ၵၢင်ၶမ်ႈ 7 မူင်း ၽၢႆႇတပ်ႉသိုၵ်းမၢၼ်ႈ လုၵ်ႉမိူင်းသူႈသေ တၢင်ႇၵွင်ႈလူင် 81 MMI82MM I 120 MM ၸႃႉၸိူဝ်းၼႆႉသေ ၶိုၼ်ႈမႃး မိူင်းဢွတ်ႇ 6 လမ်း၊ ထိုင်မိူဝ်ဝႃး 2. 7. 2012 ၵၢင်ၼႂ် 8 မူင်းမႃး ၶိုၼ်းပိုတ်းယိုဝ်းထႅင်ႈ သေ 7 ၼႃးထီး (7 မိၼိတ်ႉ) ၼိုင်းပွၵ်ႈ ဢဝ်မၢၵ်ႇ120 MM သေပိုတ်းယိုဝ်းမႃးမီး 40 လူၵ်ႈပၢႆယဝ်ႉ၊ 81 MM  သမ်ႉမီး 30 လုၵ်ႈပၢႆ ယိုဝ်းသႂ်ႇ တပ်ႉႁဝ်း တေႃႇထိုင် ၵၢင်ဝၼ်း 12 မူင်း ။ ပဵၼ်တူဝ် ၸၵၶ(2) ၸွမ်ႁၼ် တိၼ်ႉလုၼ်ႇ ၵေႃႉယူႇတီႈ မိူင်းဢွတ်ႇ သေ ၵုမ်းၵမ် ပၢင်တိုၵ်းၼႆႉ”။

ယွၼ်ႉ မၢၵ်ႇၵွင်ႈလူင် တပ်ႉသိုၵ်း လူင်ပွင်ၸိုင်ႈ လႄႈႁူင်းႁဵၼ်း ၸၼ်ႉဢွၼ်ႇ တီႈတွင်ႁဵဝ်း၊ တီႈႁိမ်းႁွမ်း ၵျွင်းမုၼ်ၸဝ်ႈ လႄႈ ၼႂ်းဝၢၼ်ႈၶူဝ်ယၢဝ်း ၵေႃႈ လႆႈတုမ်ႉတိူဝ်ႉၺႃး သေဢမ်ႇၵႃး ၵူၼ်းဝၢၼ်ႈၶဝ်ၵေႃႈ လႆႈပၢႆႈမူၵ်း ယူႇသဝ်း တၢင်ႇတီႈ တၢင်ႇတၢင်း၊ ယဝ်ႉၵေႃႈ သူၼ်ႁႆႈၼႃး ၵူၼ်းဝၢၼ်ႈၶဝ်ၵေႃႈ လႆႈလူႉသုမ်း တင်းၼမ်ၼႆ” ၵူၼ်းပိုၼ်ႉတီႈ လၢတ်ႈၼႄဝႃႈၼႆ။

ၵဵဝ်ႇၵပ်း ပၢင်ႇတိုၵ်းၼႆႉသေ ႁူဝ်ပဝ်ႈ ပႃႇတီႇႁူဝ်သိူဝ် ၸဝ်ႈၶုၼ်ထူၼ်းဢူး လႆႈတႅမ်ႈလိၵ်ႈ ယိုၼ်ႈယၼ် တုၵ်းယွၼ်း ၸူးတီႈ ၸွမ်ၸိုင်ႈ ဢူႈတဵင်းၸဵင်ႇ မိူဝ်ႈဝၼ်းထီႉ 21.6.12 ၼၼ်ႉ ဝႃႈယွၼ်းႁႂ်ႈ ၵႄႈလိတ်ႈ ပၼ် လွင်ႈပၼ်ႁႃ ဢၼ်ပဵၼ်ယူႇ ၼႂ်းမိူင်းတႆးၼႆႉ ၼႆယဝ်ႉ။

မိူဝ်ႈဝၼ်းထီႉ 22.6.12 ၼၼ်ႉၵေႃႈ ၽူႈတၢင်တူဝ် ၸဝ်ႈသိုၵ်းလူင် ၶုၼ်သၢမ် ဢၼ်ပဵၼ် ၽူႈၼမ်းၼႂ်း တပ်ႉသိုၵ်းၸိုင်ႈတႆး ပႃႇတီႇမႂ်ႇသုင် ၸိုင်ႈတႆး SSA/SSPP ၶဝ် ၵႂႃႇႁူပ်ႉထူပ်းၵၼ်တင်း ၵႅမ်ႁူဝ်ပဝ်ႈ ၵေႃႇမတီႇ ၽၢႆႇၵေႃႇသၢင်ႈ လွင်ႈငမ်းယဵၼ် ၸၼ်ႉမိူင်းႁူမ်ႈတုမ်  ဢူးတဵင်းၸေႃႇတီႈ တႃႈလိူဝ်ႇသေ လႆႈၶေႃႈ တူၵ်းလူင်းၵၼ် တေဢမ်ႇယိုဝ်းၵၼ်ထႅင်ႈ ယဝ်ႉၵေႃႈ တေဢုပ်ႇၵုမ်ၵၼ် ၸၼ်ႉမိူင်းႁူမ်ႈတုမ် ပွၵ်ႈထီႉ သွင်ထႅင်ႈၼႆယူ။

ၵူၼ်းပၵ်းတႃႇတူၺ်း လွင်ႈၵၢၼ်မိူင်း ၵေႃႉၼိုင်ႈၸိၸမ်ႈၼႄဝႃႈၵဵဝ်ႇၵပ်း ပၢင်တိုၵ်းဢၼ်ၼႆႉ မိူၼ်ၼင်ႇ ႁဵတ်ႈႁႂ်ႈ ယႃႉလူႉလႅဝ် ပႅတ်ႈ လွင်ႈ ၵေႃႇသၢင်ႈ လွင်ႈငမ်းယဵၼ် ဢၼ်လႆႈ ဢုပ်ႇဢူဝ်းၵၼ်မႃး ၶၵ်ႉတွၼ်ႈ ၸိူဝ်းၼၼ်ႉသေ ယဝ်ႉၵေႃႈ ႁဵတ်းႁႂ်း လွင်ႈဢၼ်ၵိုတ်းယိုဝ်းၵၼ် မႃးၼၼ်ႉ ဢမ်ႇမီႈ လွင်ႈတၢင်းသင် ၼႆယဝ်ႉ။

ပႃႇတီႇ မႂ်ႇသုင်ၸိုင်ႈတႆး /တပ်ႉသိုၵ်း ၸိုင်ႈတႆး (SSA/SSPP) လႄႈ တင်း လူင်ပွင်ၸိုင်ႈမၢၼ်ႈ ၼႆႉ ဝၢႆးသေ လႆႈႁူပ်ႉထူပ်း ဢုပ်ႇဢူဝ်း ၵိုတ်းယိုဝ်းၵၼ် မိူဝ်ႈဝၼ်းထီႉ 28/01/2012 တီႈတူၼ်ႈတီး ၼၼ်ႉယဝ်ႉ လႆႈပဵၼ် ပၢင်တိုၵ်းၵၼ်မႃးၶိုၼ်း တေႃႇမိူဝ်ႈလဵဝ်ၼႆႉ ဢမ်ႇယွမ်း 30 ပွၵ်ႈဝႃႈၼႆ။