ပႃႇတီႇ မႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ဝႃႈ တပ်ႉသိုၵ်း လူင်ပွင်ၸိုင်ႈၼႆႉ တို်ၵ်ႉဢဝ် ႁႅင်းသိုၵ်း တီႈတိူင်းသိုၵ်း ဝၼ်းဢွၵ်ႇၵၢင် (ယလၶ) ဢၼ်ပၵ်းသဝ်း တီႈမိူင်းတႆး ပွတ်းဢွၵ်ႇ ဝဵင်းၶူဝ်လမ် လႄႈ တိူင်းသိုၵ်း ၸဵင်ႇႁွင်ႇဝၼ်းဢွၵ်ႇ (ယမၶ) ဢၼ်ပၵ်းသဝ်းတီႈ မိူင်းတႆး ပွတ်းႁွင်ႇ ၸႄႈ ဝဵင်းလႃႈသဵဝ်ႈ မႃးၽိူမ်ႉထႅမ်ထႅင်ႈ သေ လေႃႇတိုၵ်း တပ်ႉသိုၵ်းၸိုင်ႈတႆး ဢၼ်ပၵ်းသဝ်း ဝႆႉယူႇတီႈ ၸႄႈဝဵင်း တၢင်ႉယၢၼ်း ထႅင်ႈယူႇ။

မိူဝ်ႈလဵဝ် ပၢင်တိုၵ်း ၼႂ်းၵႄႈၵၢင် SSPP/SSA လႄႈ တပ်ႉသိုၵ်း လူင်ပွင်ၸိုင်ႈ သိုၵ်းမၢၼ်ႈၼႆႉ ပဵၼ်ယူႇဝႆႉတီႈ ၸႄႈဝဵင်း မိူင်းသူႈ လႄႈ ၸႄႈဝဵင်း တၢင်ႉယၢၼ်းယူႇယဝ်ႉ ၽူႈမီးၸၼ်ႉ SSPP/SSA ဢၼ် ဢမ်ႇၶႂ်ႈဢွၵ်ႇၸိုဝ်ႈ လၢတ်ႈ ၼႄၼင်ႇၼႆ။

တပ်ႉသိုၵ်း လူင်ပွင်ၸိုင်ႈ ဢၼ်လေႃႇတိုၵ်း တပ်ႉသိုၵ်းၸိုင်ႈတႆး ပွတ်းတၢင်ႉယၢၼ်းၼႆႉ ပဵၼ် တပ်ႉၶလယ (33) မိူင်းၵၢဝ်၊ ၶလယ 136 မိူင်းပၢတ်ႇ လႄႈ ၶလယ 326 တၢင်ႉယၢၼ်း၊ ပၢင်တိုၵ်း တီႈပွတ်း တၢင်ႉယၢၼ်းၼႆႉ ပဵၼ်တီႈ တပ်ႉ 7 လၵ်း လႄႈတပ်ႉၵွင်းမႆႉၸူင် ဢၼ်မီး ၼႂ်းၵႄႈ မိူင်းၵၢဝ်လႄႈ တွင်ႁဵဝ်း တင်ႈတႄႇ ဝၼ်းထိ 2.7.2012 ၼၼ်ႉမႃးယဝ်ႉဝႃႈၼႆ။

ၵဵဝ်ႇၵပ်း ပၢင်တိုၵ်း ပွတ်းတၢင်ႉယၢၼ်းၼႆႉသေ ၽူႈမီးၸၼ်ႉ SSPP/SSA ဢၼ် ဢမ်ႇၶႂ်ႈ ဢွၵ်ႇၸိုဝ်ႈ ၵေႃႉၼိုင်ႈ လၢတ်ႈၼင်ႇၼႆဝႃႈ “ ၶဝ်ၸႅၵ်ႇႁဵတ်းပဵၼ် သၢႆသိုၵ်း 3 ထႅဝ် သေ ၶိုၼ်ႈလွမ်ႉႁွပ်ႈ တပ်ႉ 7 လၵ်းႁဝ်းမႃး သေယိုဝ်းႁဝ်း။ သိုၵ်းမၢၼ်ႈၶဝ်ၼႆႉ ၽိူမ်ႉဢဵၼ်ႁႅင်းသိုၵ်း ၶိုၼ်ႈ လေႃႇတိုၵ်းသေ ဢမ်ႇၵႃး ယူႇတီႈၵႆသေ ဢဝ်မၢၵ်ႇလူင် ယိုဝ်းသႂ်ႇ ၶိူဝ်းၶိူဝ်းယႂ်းယႂ်း၊ ယဝ်ႉၵေႃႈ ယင်းလႅပ်ႈၸႂ်ႉပႃး မၢၵ်ႇၶေးမီး ထႅင်ႈလူးၵွၼ်ႇ ၵွပ်ႈသင်ဝႃႈၼႆ လႆႈႁၼ်သိုၵ်းတႆးႁဝ်း 2 ၵေႃႉလႆႈ ႁၢၵ်ႈမဝ်းသေ လိုမ်းတူဝ်ၵႂႃႇ ဝၢႆးသေ လႆႈသုတ်ႇၺႃး ဢၢႆၵႂၼ်းမၢၵ်ႇၶဝ်” ၼႆႉယဝ်ႉ။

မိူဝ်ႈလဵဝ် လႆႈႁူႉဝႃႈ ဢဵင်ႁဵင်း တပ်ႉသိုၵ်း လူင်ပွင်ၸိုင်ႈ ဢၼ်တိုၵ်း တပ်ႉသိုၵ်းၸိုင်ႈတႆး SSPP/SSA ယူႇ ပွတ်းမိူင်းသူႈၼႆႉ မီး 7 တပ်ႉၵွင် ၊ ပွတ်းတၢင်ႉယၢၼ်းၼႆႉ သမ်ႉ မီး 3တပ်ႉၵွင် တင်းမူတ်း ႁူမ်ႈၵၼ်   မီးမွၵ်ႈ 10 တပ်ႉၵွင် ၼႆယဝ်ႉ။

ၽူႈမီးၸၼ်ႉ ၵေႃႇမတီႇ ၽၢႆႇၵေႃႇသၢင်ႈ လွင်ႈငမ်းယဵၼ် SSA ၵေႃႉၼိုင်ႈလၢတ်ႈ ဝႃႈ ၵဵဝ်ႇၵပ်း လွင်ႈပၢင်တိုၵ်းဢၼ်ၼႆႉ SSPP/SSA ၵေႃႈ လႆႈတႅမ်ႈလိၵ်ႈ ပွၵ်ႈၵမ်းသွင်သေ သူင်ႇၵႂႃႇၸူး လူင်ပွင်ၸိုင်ႈ တဵင်းၸဵင်ႇ မိူဝ်ႈဝၼ်းထိႉ 02.07.12 ၼၼ်ႉ ထႅင်ႈ ဝႃႈ ႁႂ်ႈၵႄႈလိတ်ႈ ပၼ်ႁႃၼႆႉထႅင်ႈ ၼႆလႄႈ မိူဝ်ႈဝႃး ဝၼ်းထီႉ 3.7.12 ၵၢင်ၼႂ်ၼႆႉ လူင်ပွင်ၸိုင်ႈ ပွင်ႇမႃးဝႃႈ ၶဝ်တေ ဢုပ်ႇဢူဝ်းၸွမ်း ၽူႈမီး ပုၼ်ႈၽွၼ်း တီႈ ႁွင်ႈၵၢၼ် ၶွင်ႇသီႇၽၢႆၵႅတ်ႇၶႄ လႄႈ ႁူမ်ႇလူမ်ႈ (ၵႃႇ/လူင်ႇ) သေ ၵွၼ်ႇဝႃႈၼႆ။