ၸဝ်ႈသိုၵ်းမႁႃႇၵျႃႇ ဝၢင်းၽႅၼ် တႃႇတေၵဵပ်းသိုၵ်း ၽိူမ်ႉထႅမ်ႁႅင်း ပီႇတုၸိတ်ႉထႅင်ႈ ၵူၺ်းၵႃႈ ၽၢႆႇတပ်ႉသိုၵ်း လူင်ပွင်ၸိုင်ႈမၢၼ်ႈၶဝ် ဢမ်ႇပၼ်ၵဵပ်းလႄႈ ႁူၺ်းဢဝ် ႁူဝ်ၼႃႈ ပီႇတုၸိတ်ႉ ဝၢၼ်ႈႁၢတ်ႇလႄႈ ၼႃးၵူင်းသေ ဢၢၼ်းၵႂႃႇ ပၵ်းတပ်ႉတီႈ ပၢင်ႇတဝီႉ။

လႅင်ႇၶၢဝ်ႇ ဝၢၼ်ႈၼႃးၵူင်း ဢိူင်ႇၼႃးၵူင်း ၸေႈဝဵင်းလၢင်းၶိူဝ်း ပွင်ႇမႃး မိူဝ်ႈဝၼ်းထီႉ 6/7/2012 ၸဝ်ႈသိုၵ်း မႁႃႇၵျႃႇ ၵေႃႉပဵၼ် ႁူဝ်ၼႃႈ SSS (Shan State South) တပ်ႉသိုၵ်းမိူင်းတႆးပွတ်းၸၢၼ်း ၼၼ်ႉ တေၽိူမ်ႉထႅမ် ႁႅင်းသိုၵ်းထႅင်ႈၼႆသေ ဝၢင်းၽႅၼ်ၵဵပ်း ပီႇတုၸိတ်ႉမႂ်ႇယူႇ။ ၵူၺ်းၵႃႈ ၽၢႆႇတပ်ႉသိုၵ်း လူင်ပွင်ၸိုင်ႈမၢၼ်ႈၶဝ် ဢမ်ႇပၼ်ၶႂၢင်ႉ။

ဝၢႆးသေၼၼ်ႉ ၸဝ်ႈမႁႃႇၵျႃႇ သူၼ်းတုမ် ႁူဝ်ၼႃႈ ပီႇတုၸိတ်ႉ လုင်းၺူဝ်ႇ ယူႇဝၢၼ်ႈႁၢတ်ႇ၊ ဢိူင်ႇဝၢၼ်ႈႁၢတ်ႇ၊ ၸေႈဝဵင်းလၢင်းၶိူဝ်း လႄႈ လုင်းသူၺ်ႇပုၼ်ႉ ယူႇဝၢၼ်ႈၼႃးၵူင်း၊ ဢိူင်ႇၼႃးၵူင်း၊ ၸေႈဝဵင်းလၢင်းၶိူဝ်း တေဢဝ် ဢဵၼ်ႁႅင်း မွၵ်ႈ 50ၵေႃႉသေ ၵႂႃႇပၵ်းတပ်ႉတီႈ ပၢင်ႇတဝီႉ ၼိူဝ်သၼ်လွႆၵုင်းမၢဝ်း။

ၵဵဝ်ႇလူၺ်ႈလွင်ႈၼႆႉၵေႃႈ ၽၢႆႇသိုၵ်းမၢၼ်ႈၶဝ် ဢမ်ႇႁၼ်လီၸွမ်းသေ ၶိုၼ်းလၢတ်ႈ ၸုမ်းပီႇတုၸိတ်ႉ ဝႃႈ “သင်ဝႃႈ သူၶႂ်ႈၵႂႃႇတႄႉယူႇၸိုင် ၶိူင်ႈၵွင်ႈၵၢင်ႇ ဢၼ်ႁဝ်း ပၼ်သူၸိူဝ်းၼၼ်ႉ မႃးဢၢပ်ႈဝႆႉၶိုၼ်း”။

ၵူၺ်းၵႃႈ လွင်ႈသိုၵ်းပီႇတုၸိတ်ႉ ဢၼ်တေၵႂႃႇ ပၵ်းတပ်ႉၼၼ်ႉ ၸဝ်ႈမႁႃႇၵျႃႇ တေဢဝ်ပုၼ်ႈၽွၼ်း ထုၵ်ႈပၼ် ၶိူင်ႈၵွင်ႈၵၢင်ႇမႂ်ႇ ပၼ်ၶဝ်ၼႆ။

လွင်ႈဢၼ်တေၵႂႃႇ ပၵ်းတပ်ႉၼႆႉ ႁူဝ်ၼႃႈပီႇတုၸိတ်ႉ ဝၢၼ်ႈႁၢတ်ႇလႄႈ ၼႃးၵူင်း တေၵဵပ်းငိုၼ်း တီႈၵူၼ်းဝၢၼ်ႈ တႃႇတေပၼ်ငိုၼ်း သိုၵ်းပီႇတုၸိတ်ႉ ၸိူဝ်းဢၼ်တေၵႂႃႇ ယူႇတီႈ ပၢင်ႇတဝီႉ သၼ်လွႆလူင် ၵုင်းမၢဝ်း တႃႇၼိုင်ႈၵေႃႉ လႂ် 2သႅၼ်ပျႃးဝႃႈၼႆ။

လွင်ႈၵၢၼ်ၵဵပ်းငိုၼ်း ဢၼ်ၼႆႉၵေႃႈ ၵူၼ်းဝၢၼ်ႈ ဢမ်ႇတဵမ်ၸႂ် ၶႂ်ႈပၼ်လႄႈ တင်းပီႇတုၸိတ်ႉ လႄႈၵူၼ်းဝၢၼ်ႈ ပဵၼ်ပၼ်ႁႃၵၼ်ဝႆႉယူႇ။ ယွၼ်ႉလွင်ႈပၼ်ႁႃ ဢၼ်ၼႆႉသေ ၽၢႆႇဢုပ်ႉပိူင်ႇ ၸေႈတွၼ်ႈလၢင်းၶိူဝ်း ႁွင်ႉမိူဝ်းထတ်းသၢင်ယူႇ ၶိူဝ်းၶိူဝ်းယႂ်းယႂ်း။ လႅင်ႇၶၢဝ်ႇပွင်ႇမႃးၼင်ႇၼႆ။