ၵူၼ်းၸိူဝ်း ဢၼ်ၵိၼ်ၸၢင်ႈ ႁဵတ်းၵၢၼ် တေႃႇလွတ်ႇၵႅတ်ႉၼၼ်ႉ တွၼ်ႈတႃႇ တေထုၵ်ႈ ငိုၼ်းလိူၼ်ၶဝ် မီးလွင်ႈ တၢင်းယၢပ်ႇၽိုတ်ႇ ယူႇၼႆ လႅင်ႇၶၢဝ်ႇ ၼႂ်းမိူင်း ယိုၼ်ယၢၼ် လၢတ်ႈၼႄ။

မိူဝ်ႈၼႆႉ ဝၼ်းထီႉ 12.7.2012၊ တီႈမိူင်းတႆး ပွတ်းႁွင်ႇ ၸႄႈဝဵင်းၼမ်ႉၶမ်း၊ ဢိူင်ႇမိူင်းဝီး ၵူၼ်းၸိူဝ်းဢၼ် ၵိၼ်ၸၢင်ႈ ႁဵတ်းၵၢၼ် တေႃႇလွတ်ႇၵႅတ်ႉ ၼၼ်ႉ တွၼ်ႈတႃႇတေ ထုၵ်ႈငိုၼ်းလိူၼ် ၵႃႊဢဵၼ်ႁႅင်းၶဝ် တေႃႇ ထိုင်မိူဝ်ႈလဵဝ် ယင်းပႆႇလႆႈ ဝႃႈၼႆ။

ၵူၼ်းႁူႉႁၼ် ၸွမ်းၵေႃႉၼိုင်ႈ လၢတ်ႈဝႃႈ “ယွၼ်ႉႁူင်းၵၢၼ် လွတ်ႇၵႅတ်ႉၼႆႉသေ ႁဵတ်းႁႂ်ႈ ၼမ်ႉၶုၼ်ႇ ၵိၼ်ဢမ်ႇလႆႈ ပိူဝ်ႈတႃႇတေ ၸႂ်ႉတိုဝ်းၼမ်ႉၵေႃႈ မီးလွင်ႈယၢပ်ႇၽိုတ်ႇဝႆႉ ငိုၼ်းသၢႆႈတႅၼ်း ၸိူဝ်းလူဝ်ႇလႆႈၵေႃႈ မိူဝ်ႈလဵဝ် ထုၵ်ႈပႆႇလႆႈ သမ်ႉထႅင်ႈ ငိုၼ်းလိူၼ် ႁဵတ်းၵၢၼ် ၵူၼ်းဝၢၼ်ႈ လိူၼ်ပေႃးသဵင်ႈ ပူၼ်ႉမႃး လၢႆဝၼ်းယဝ်ႉ ယင်းပႆႇထုၵ်ႈပၼ်” လၢတ်ႈၼင်ႇၼႆ။

ၵဵဝ်ႇၵပ်း လွင်ႈၼႆႉ တီႈသဵၼ်ႈတၢင်း ၼႂ်းမူႇဝၢၼ်ႈ လႆႈလူႉလႅဝ် တင်းၼမ် လုၵ်ႈဢွၼ် ၸိူဝ်းဢၼ် တေၵႂႃႇ ႁူင်းႁဵၼ်းၵေႃႈ ၵႂႃႇမႃးယၢပ်ႇ။ လွတ်ႇၵႅတ်ႉၼႆႉ လုၵ်ႈတီႈ တၢင်းဢိူင်ႇ မိူင်းဝီးသေ လတ်းၽႃႇမႃး ၸွမ်းမၢၼ်ႈတူင်ႊ၊ ဝဵင်းၵၢင်း၊ ၼွင်မႃႉလူင်၊ ၼႂ်းၵႄႈ မၢၼ်ႈႁွင်းလူင်လႄႈ ၼွင်တိူၼ်း ဝႃႈၼႆ။