မိူဝ်ႈဝၼ်းထီႉ 25/06/2012 သိုၵ်းမၢၼ်ႈတပ်ႉ 425 ဝၢၼ်ႈယဵၼ်ႇ ပူဝ်ႇၵျီးၵျေႃႇဢေး ဢွၼ်ႁႅင်း 40 ၵေႃႉ ၵႂႃႇတဵၵ်းၶၢၼ်း ယွၼ်းၼမ်ႉမၼ်းၸၢၵ်ႈ သေတ ဢမ်ႇဢဝ်ၼမ်ႉမၼ်း တေဢဝ်ငိုၼ်းၵူၺ်း ၼႆသေ ၸီႉသင်ႇႁႂ်ႈ ပူႇၵၢင်ႉဢဝ်မႃး သႂၢင်းပၼ်ၶဝ်  တီးဝၢၼ်ႈတိုဝ်ႉ။

1.  ဝၢၼ်ႈႁၢႆးၼွႆႉ ဢိူင်ႇဝၢၼ်ႈၵဝ်ႇလူင် ၸေႈဝဵင်းႁူဝ်ပူင်း သႂၢင်းငိုၼ်း 55,000 ပျႃး။
2. ဝၢၼ်ႈၸီးႁူဝ်ႉ ဢိူင်ႇဝၢၼ်ႈၵဝ်ႇလူင် ၸေႈဝဵင်းႁူဝ်ပူင်း သႂၢင်းငိုၼ်း 50,000 ပျႃး။
3. ဝၢၼ်ႈၸဝ်ႈ ဢိူင်ႇဝၢၼ်ႈၵဝ်ႇလူင် ၸေႈဝဵင်းႁူဝ်ပူင်း သႂၢင်းငိုၼ်း 40,000 ပျႃး။
4. ဝၢၼ်ႈတိုဝ်ႉ ဢိူင်ႇၼႃးၶႆႉ ၸေႈဝဵင်းသီႇသႅင်ႇ သႂၢင်းငိုၼ်း 150,000 ပျႃး။
5. ဝၢၼ်ႈၼႃးၶႆႉ ဢိူင်ႇၼႃးၶႆႉ ၸေႈဝဵင်းသီႇသႅင်ႇ သႂၢင်းငိုၼ်း 400,000 ပျႃး။
ဝၢၼ်ႈၸိူဝ်းၼႆႉ တူဝ်ပူႇၵၢင်ႉၶဝ် ၵေႃႉလႆႈၵႂႃႇပၼ် တီႈဝၢၼ်ႈတိုဝ်ႉ/ ဝၢၼ်ႈၼႃးၶႆႉ ဢိူင်ႇၼႃးၶႆႉ ၸေႈဝဵင်းသီႇသႅင်ႇ လႆႈႁူႉၸွမ်းၶၢဝ်ႇ မီးၼင်ႇၼႆ။

မိူဝ်ႈဝၼ်းထီႉ 02.06.2012 ယၢမ်းဝၢႆးဝၼ်း 14:00 မူင်း သိုၵ်းမၢၼ်ႈတပ်ႉ 332 ဢၼ်ၼင်ႈ တပ်ႉမႆႉပူၵ်ႇ ၶုၼ်သိုၵ်းလူင် ဢွင်ႇတူႇၶျိတ်ႉလႄႈ ၶုၼ်သိုၵ်းလူင် ၵျေႃႇမိၼ်းၶျိတ်ႉ ဢွၼ်ႁႅင်း 47ၵေႃႉ ၵႂႃႇတီႉမတ်ႉ ၵူၼ်းမိူင်းမႃးပၢတ်ႈယိူဝ်ႈ တီႈႁိမ်းတပ်ႉ၊ ၶဝ်ၼႄးဝႃႈ ပဵၼ်သိုၵ်းတႆးမႃး ဢဝ်ၶၢဝ်ႇၼႆသေ တီႉမတ်ႉဝႆႉ။

ၵေႃႉလႆႈၶၢမ်ႇ တင်းတီႉမတ်ႉ ၸၢႆးၶၼ်ႇတႃႇ ဢႃႇယူႉ 35ပီႊ ၵေႃႉပဵၼ်လုၵ်ႈ လုင်းလႅင်း မႄႈပႃႈထွၼ်း ယူႇဝၢၼ်ႈမႆႉ ဢိူင်ႇမႆႉပူၵ်ႇ ၸေႈဝဵင်းမိူင်းပၼ်ႇ။ မတ်ႉဝႆႉသေ ၸႅတ်ႈထၢမ် ၶၢဝ်းယၢမ်းမွၵ်ႈ 3 ၸူဝ်ႈမွင်း။ ၵူၼ်းလူင်ဝၢၼ်ႈလႄႈ ၵူၼ်းဝၢၼ်ႈၶဝ်  ၵႂႃႇ ထွၵ်ႈၶၢမ်ႇၶိုၼ်းဝႃႈ မၼ်းပဵၼ်ၵူၼ်းမိူင်း မၼ်းဢမ်ႇၸႂ်ႈသိုၵ်းတႆး ၼႆလႄႈ ၸင်ႇပွႆႇၶိုၼ်း လႆႈၶၢဝ်ႇမႃးၼင်ႇၼႆ။