ဢိင်ၼိူဝ် လူင်ပွင်ၸိုင်ႈ လၢတ်ႈ မိူဝ်ႈၼႂ်းလိူၼ် June ၼၼ်ႉဝႃႈ တေၶပ်းၶိုင်ပၼ် ႁႂ်ႈလိၵ်ႈလၢႆး ၸၢဝ်း ၶိူဝ်း သွၼ်ႁဵၼ်းလႆႈ ၼႂ်းႁူင်းႁဵၼ်း လူင်ပွင်ၸိုင်ႈ ၼၼ်ႉသေ မိူဝ်ႈဝၼ်းထီႉ 22.7.12 ၽူႈတၢင်တူဝ် ၸၢဝ်းၶိူဝ်းတႆး ၼႂ်းမိူင်းႁူမ်ႈတုမ် မိူင်းမၢၼ်ႈ လႆႈႁဵတ်း ပၢင်ၵုမ် ဢုပ်ႇဢူဝ်း တီႈဝတ်ႉတႆး ၵဝ်ႈလၵ်း ဝဵင်းတႃႈၵုင်ႈ ၽူႈၶိုၼ်ႈႁွတ်ႈ မီးမွၵ်ႈ 200ပၢႆ။

တီႈပၢင်ၵုမ် ဢုပ်ႇဢူဝ်း ငူပ်ႉငီႉ ၵၼ်ၼၼ်ႉ ၸဝ်ႈပၢႆး ႁူႉမေႃၶဝ် ဢွၼ်ၵၼ် လႅၵ်ႈလၢႆႈ တၢင်းႁၼ်ထိုင် ၼိူဝ် ပပ်ႉႁဵၼ်းလိၵ်ႈတႆး ဢၼ်ၵေႃလိၵ်ႈလၢႆးလႄႈ ယဵၼ်ႇငႄႈတႆး ဝဵင်းတူၼ်ႈတီးၶဝ် ႁပ်ႉပုၼ်ႈ ၽွၼ်း ပိၼ်ႇၽႃႇသႃႇ ဢဝ်မႃးတီႈ ပပ်ႉမၢၼ်ႈ ၵမ်းသိုဝ်ႈလႄႈ လွင်ႈလိၵ်ႈလၢႆး ၸၢဝ်းၶိူဝ်း ဢၼ်တေ ပၼ်သွၼ် ၼွၵ်ႈၶၢဝ်းယၢမ်း ၸိူဝ်းၼႆႉ။

လိူဝ်သေၼၼ်ႉ ၵဵပ်းသၢႆမၢႆ ပပ်ႉႁဵၼ်းလိၵ်ႈတႆး ပပ်ႉလႂ် ဢၼ်ဢဝ် သွၼ်ၼမ် လိူဝ်ပိူၼ်ႈ ၼႂ်းပပ်ႉ ႁဵၼ်း လိၵ်ႈတႆး တင်းၼမ်ၼၼ်ႉ၊ သမ်ႉၶႂ်ႈၸႂ်ႉတိုဝ်း ပပ်ႉႁဵၼ်း လိၵ်ႈတႆး ပပ်ႉလႂ်ၸိူဝ်းၼၼ်ႉ။

ပိူင်လူင်မၼ်းတႄႉ လႆႈၶွတ်ႇၽွတ်ႈ ၸုမ်းၸဝ်ႈပၢႆး ႁူႉမေႃ 9ၵေႃႉ တွၼ်ႈတႃႇ တေမီးမႃး ပပ်ႉႁဵၼ်း လိၵ်ႈတႆး တႃႇၸႂ်ႉ ၼႂ်းႁူင်းႁဵၼ်း ၼၼ်ႉၼႆ ၽူႈၶိုၼ်ႈႁွတ်ႈ ၵေႃႉၼိုင်ႈ လၢတ်ႈၼေ။

ၸုမ်းၸဝ်ႈပၢႆး ႁူႉမေႃၼၼ်ႉ တေလိူၵ်ႈ ထွၼ်ဢဝ် ဢၼ်ၶိုၵ်ႉၶႅမ်ႉ ၼႂ်းပပ်ႉ ႁဵၼ်းလိၵ်ႈတႆး ၵူႈတီႈတီႈ ၼၼ်ႉသေ မၵ်းမၼ်ႈပၼ် ပပ်ႉႁဵၼ်းလိၵ်ႈတႆး တႃႇၸႂ်ႉ ၼႂ်းႁူင်းႁဵၼ်း ပပ်ႉၼိုင်ႈ၊ ၸုမ်းၸဝ်ႈပၢႆးႁူႉ မေႃၼၼ်ႉ တေသိုပ်ႇ ဢုပ်ႇဢူဝ်း ငူပ်ႉငီႉ ၵၼ်တင်း ၽူႈမီးပုၼ်ႈၽွၼ်း ၽွင်းလူင် ပၢႆးပိင်ႇ ၺႃႇၵႂႃႇထဵင်ႈ။

တီႈပၢင် ဢုပ်ႇဢူဝ်းၼၼ်ႉ ၽူးၶိုၼ်ႈႁွတ်ႈ ၵေႃႈမီး သၢင်ႇၶၸဝ်ႈ၊ ၽူႈတၢင်တူဝ် ၼႂ်းၵေႃလိၵ်ႈလၢႆး လႄႈ ယဵၼ်ႇငႄႈတႆး မိူင်းတႆး၊ မိူင်းၶၢင်၊ တိူင်းၸေႈၵႅင်း၊ တိူင်းတႃႈလိူဝ်ႇ၊ တိူင်းပႃႇၵိူဝ်၊ တိူင်းတႃႈၵုင်ႈ လႄႈ ၵဵင်းမႆႇ (ၸိုင်ႈထႆး) ပႃးၸဵမ် ၸဝ်ႈပၢႆးႁူႉမေႃ လိၵ်ႈတႆးၶဝ် ၽူႈတႅမ်ႈလိၵ်ႈ ၸဝ်ႈပၢႆးမွၼ်း၊ ၵူၼ်းလိုဝ်ႈၵၢၼ် (အငြိမ်းစား) ၽၢႆႇပၢႆးပိင်ႇၺႃႇ တီႈၸၼ်ႉၸွမ်၊ လုၵ်ႈႁဵၼ်း ၸၼ်ႉၸွမ်၊ ပႃႈတီႇ ၵၢၼ်မိူင်း၊ ၸုမ်းၵိုတ်းယိုဝ်း ဢၼ်မီးယူႇ ၼႂ်းမိူင်းတႆး၊ ၸုမ်းပီႇတုၸိတ်ႉၶဝ် ၸိူဝ်းၼၼ်ႉ။ ၶေႃႈမုၼ်း ၵေႃႉလီ လၢႆးငၢၼ်း။