ၸုမ်းၶၢဝ်ႇ တႆးလွတ်ႈလႅဝ်း လႆႈတွင်ႈထၢမ် ႁူဝ်ပဝ်ႈလူင် ၸွမ်သိုၵ်း ၸဝ်ႈယွတ်ႈသိုၵ်း RCSS/SSA ဝၼ်းထီႉ 23/7/2012  ၼၼ်ႉ ၵဵဝ်ႇၵပ်း လွင်ႈငဝ်းလၢႆး ၵမ်းလိုၼ်းသုတ်း ဝၢႆးသေဢုပ်ႇဢူဝ်း တီႈၵဵင်းတုင် မႃးယဝ်ႉသေ ပဵၼ်မႃးၸိူဝ်ႉႁိုဝ်? လႆႈႁဵတ်းသၢင်ႈၵႂႃႇ ၸိူင်ႉႁိုဝ်လၢႆလၢႆ? ၸိူဝ်းၼႆႉယူႇယဝ်ႉ။

ၵဵဝ်ႇၵပ်းလွင်ႈ ဢၼ်တွင်ႈထၢမ် ၼၼ်ႉသေ မၼ်းၸဝ်ႈ တေႃႉတႆႇ ၶႆႈၼႄဝႃး-ဝၢႆးဢုပ်ႇဢူဝ်းၵၼ် တီးၵဵင်းတုင် ဝၼ်းထီႉ 19-20/05/2012 မႃးၼႆႉယဝ်ႉ လႆႈပူၼ်ႉၵႂႃႇလႄႇ တူၺ်းမိူင်းလႃး လႆႈၵႂႃႇ ႁူပ်ႉႁူဝ်ပဝ်ႈလူင် ၸဝ်ႈၸၢႆးလိုၼ်း လႆႈၵႂႃႇ တူင်ႉတၵ်ႉၵၼ် ဢုပ်ႇၵၼ် ၵၢၼ်ဝၢၼ်ႈ၊ ၵၢၼ်မိူင်း ၊ ပၢၼ်မၼ်းၸဝ်ႈ တႄႇၸႃႉမႃး ပူၵ်းတင်ႈမိူင်းလႃး ၸဝ်ႈၸၢႆးလိုၼ်း ပဵၼ်ၵူၼ်းမီး ၼမ်ႉၸႂ်လႄႈ မီးပၢႆးဝူၼ်ႉလီ ၵေႃႉၼိုင်ႈယူႇ ဝၢႆးႁူပ်ႉၵၼ်ယဝ်ႉ ၼွၼ်းၶိုၼ်းၼိုင်ႈသေ ပွၵ်ႈမႃးၶိုၼ်းၵဵင်းတုင် ပီႈၼွင်ႉ ၵူၼ်းမိူင်းလႄႈ ၵေႃႇလိၵ်ႈလၢႆး ၾိင်ႈငႄႈတႆးၶဝ် ႁပ်ႉတွၼ်ႈၵၼ် တင်းၼမ် သေ လႆႈၵိၼ်ၶဝ်ႈ ႁူမ်ႈမူႇၵၼ် ဝႃႈၼႆ။

ဝၢႆးၵိၼ်ၶဝ်ႈ ႁူမ်ႈမူႇယဝ်ႉ လႆႈမွၵ်ႇလၢတ်ႈ ၽၢၵ်ႇတွၼ်ႈၶေႃႈၵႂၢမ်း ပၼ်ၶဝ်ၸဝ်ႈယူႇ ဢိတ်းၼိုင်ႈ “ဝႃႈလွင်ႈလႆႈ မႃးၵဵင်းတုင်ၼႆႉ ယွၼ်ႉလူင်ပွင်ၸိုင်ႈ တဵင်းၸဵင်ႇ လႄႈ ၶွင်ႇသီႇ ဢဝ်ၶိုၼ်းၸိုင်ႈတႆး ၵိုတ်းယိုဝ်း ၵၼ်ယဝ်ႉသေ လႆႈမႃးႁူပ်ႉၵၼ် ပွၵ်ႈၼႆႉ လႆႈမႃးဢုပ်ႇလွင်ႈ တႃႇတေ ႁူမ်ႈၵၼ် ၽဵဝ်ႈမူၺ်ႉ ယႃႈမဝ်းၵမ် ၵွပ်ႈယႃႈမဝ်းၵမ်သေ လုၵ်ႈဢွၼ်ႇ ၵူၼ်းမိူင်းတႆး လႆႈလူႉသုမ်း ၽဝႃႉၶဝ်တင်းၼမ်” ပိူင်ၼိုင်ႈ ၶႂ်ႈႁႂ်ႈ ၵူၼ်းမိူင်း ႁူမ်ႈမိုဝ်းႁဵတ်းသၢင်ႈ ၼင်ႇႁိုဝ် ယႃႈမဝ်းၵမ် တေႁၢႆ လုၵ်ႈဢွၼ်ႇၼုမ်ႇ ၵူၼ်းမိူင်းတႆး တေဢၵျၢင်ႉ ဢမ်ႇလူႉ ၼႆယူႇ။

ဢၼ်ၶဝ် တူၵ်းလူင်း ပၼ်မိူင်းထႃး၊ ႁူဝ်မိူင်း မိူဝ်ႈဢုပ်ႇတီႈ တွင်ႇၵျီး ဝၼ်းထီႉ 16/03/2012 ၼၼ်ႉ လူင်ပွင်ႇၸိုင်ႈ တဵင်းၸဵင်ႇဝႃႈ ႁိုဝ်ၶိုၼ်းၶႃႈ?
လွင်ႈႁူဝ်မိူင်း မိူင်းထႃးၼၼ်ႉၵေႃႈ ဢမ်ႇယုၵ်ႉလိူၵ်ႈ ၵူၺ်းၵႃႈ ႁႂ်ႈပၼ်ၶၢဝ်းယၢမ်း လႄႈ ပႂ်ႉတူၺ်း ထႅင်ႈဢိတ်းၼိုင်ႈ၊ ၸူဝ်ႈၶၢဝ်းၼႆႉ ႁႂ်ႈလူင်းထတ်းသၢင်ႈ ၼႃႈတီႈႁူမ်ႈၵၼ် ယဝ်ႉတၢင်ႇပၼ် သ.မ.တ တဵင်းၸဵင်ႇ ထႅင်ႈဝႃႈၼႆ ဢုပ်ႇဢူဝ်းပွၵ်ႈၼႆႉ ၵွပ်ႈပႃး ၵႅမ်ၵႃႇၵွႆႇယေး ဝုၼ်ႇၵျီး ၸွမ်သိုၵ်းလူင် ၸူဝ်းဝိၼ်းလႄႈ ယုမ်ႇယမ်ဝႃႈ တေလီၵႂႃႇယူႇ။

ဝၢႆးဢုပ်ႇၵၼ်ယဝ်ႉ ဢၼ်ပဵၼ် ပၢင်တိုၵ်းၵၼ် ယူႇၼၼ်ႉ ပဵၼ်ႁိုဝ်ၶႃႈ?
ႁဝ်းတိုၵ်းၵၼ်မႃး ၶၢဝ်းတၢင်း 54 ပီႊ ဢုပ်ႇဢူဝ်းၵၼ် ၶၢဝ်းတၢင်း 3-4 လိူၼ်သေ တေဝႆႉ ဝၢင်းၸႂ် ၵၼ်ၼၼ်ႉ မၼ်းဢမ်ႇပဵၼ်လႆႈ ၽၢႆႇသိုၵ်း တပ်ႉမတေႃႇ ၶဝ်ၵေႃႈ ဝႆႉသတိႁဝ်းယူႇ၊ တပ်ႉသိုၵ်း RCSS/SSA ႁဝ်းၵေႃႈ ပႆႇဝႆႉဝၢင်းၸႂ်ၶဝ်လႄႈ ပဵၼ်မႃး၊ ၵွပ်ႈႁဝ်း ယၢမ်ႈႁၼ်ၸုမ်း SSPP/SSA ၶဝ်ၵိုတ်းသိုၵ်းၵၼ် ဢမ်ႇႁိုင်သင် ထုၵ်ႇသိုၵ်းမၢၼ်း ႁွင်ႉၶဝ်ႈထႅဝ်သေ ယိုဝ်းတၢႆပႅတ်ႈ 7ၵေႃႉၼၼ်ႉ ပဵၼ်တွၼ်ႈသွၼ် ယဝ်ႉလႄႈ တပ်ႉႁဝ်းၵေႃႈ တိုၵ်ႉသတိၶဝ်ယူႇ၊ တႃႇႁႂ်ႈပဵၼ်မႃး မိူင်းႁူမ်ႈတုမ် ၸႅတ်ႈၸၢင်ႇ ပဵၼ်လွင်ႈငမ်းယဵၼ် ၶၢဝ်းယၢဝ်းၼၼ်ႉ မၼ်းလူဝ်ႇၸႂ်ႉ ၶၢဝ်းယၢမ်းလႄႈ သၢင်ႈလွင်ႈ ယုမ်ႇယမ် တေႃႇၵၼ် ပိူင်လူင်ယူႇတီႈ တပ်ႉသိုၵ်း တပ်ႉမတေႃႇ ၶဝ်ၼၼ်ႉယဝ်ႉ။

တႃႇတေ ဢုပ်ႇဢူဝ်း ၵၢၼ်မိူင်းၼႆၼၼ်ႉ တေပဵၼ်မိူဝ်ႈလႂ် တေဢုပ်ႇၼင်ႇႁိုဝ်ၶႃႈ?
တႃႇတေ ဢုပ်ႇဢူဝ်း ၵၢၼ်မိူင်းၼႆၼၼ်ႉ တေလႆႈၸႂ်ႉ ၶၢဝ်းယၢမ်း သေၵွၼ်ႇ ၵွပ်ႈဝႃႈ ၵၢၼ်မိူင်း ဢမ်ႇၸႂ်ႈ မုၵ်ႇၸုမ်းႁဝ်းၵူၺ်း ဢဝ်ပုၼ်ႈၽွၼ်း ၵူၼ်းမိူင်းတႆး ၵူႈၵေႃႉ ပဵၼ်ၸဝ်ႈၶွင် ၽႅၼ်ႇလိၼ် ၸိုင်ႈတႆးလႄႈ လူဝ်ႇလႆႈၶဝ်ႈႁႃ ၵူၼ်းမိူင်း ထၢမ်ၵူၼ်းမိူင်းၵွၼ်ႇ ဢုပ်ႇၵၢၼ်မိူင်းၼႆႉ လူဝ်ႇလႆႈ ထၢမ်ၵၢင်ၸႂ် ၵူၼ်းမိူင်းလႄႈ ႁႂ်ႈၵူၼ်းမိူင်း မီးသုၼ်ႇၶဝ်ႈ ႁူမ်ႈဢုပ်ႇၸွမ်းယူႇ။

ၸုမ်းပီႇတူႉၸိတ်ႉ/ ၸုမ်း”ဝ” UWSA/ မိူင်းလႃး ၸိူဝ်းၼႆႉၵေႃႈ တေဢုပ်ႇပႃး ယူႇၶႃႈႁႃႉ?
ပီႇတူႉၸိတ်ႉၼႆႉ ၶဝ်ႁပ်ႉၶၢမ်ႇ ယူႇတႂ်ႈ တပ်ႉမတေႃႇယဝ်ႉ တႃႇဢုပ်ႇၵၢၼ်မိူင်း တေႉတေႉ ဢမ်ႇၸၢင်ႈပႃးၶဝ် ပႅၵ်ႉသမ်ႉဝႃႈ ၶဝ်ၶႂ်ႈၶဝ်ႈပႃးၵေႃႈ တပ်ႉမတေႃႇ တေဢမ်ႇပၼ်ၶႂၢင်ႉ ဢုပ်ႇၸွမ်း ၸုမ်းမိူင်းလႃး/ ၸုမ်း “ဝ”/ UWSA/ ၸုမ်း SSPP-SSA တႄႉ ႁူႉႁဝ်းတေလႆႈ ၶဝ်ႈဢုပ်ႇၵၼ်ယူႇ တေလႆႈပႃးၶဝ်ယူႇ ပႃႇတီႇ ၵၢၼ်မိူင်း ၸိူဝ်းၼႆႉၵေႃႈ တေလႆႈၶဝ်ႈပႃး ၼၼ်ႉယဝ်ႉ။

ပေႃးဢုပ်ႇ ၵၢၼ်မိူင်းၼႆႉ တေဢဝ် မူႇၸိူင်ႉႁိုဝ် ဢုပ်ႇၶႃႈ?
ၵွပ်ႈႁဝ်း လူဝ်ႇသၢင်ႈ လွင်ႈၽွမ်ႉႁူမ်ႈလႄႈ ၵႃႈလႆႈ ဢဝ်မူႇ ပၵ်းပိူင် ၸိုင်ႈမိူင်း 2008 ၼၼ်ႉသေ ဢုပ်ႉၵႂႃႇယူႇ၊ ၼႂ်းပၵ်းပိူင် ၸိုင်ႈမိူင်း 2008 ၼၼ်ႉတႅမ်ႈဝႆႉဝႃးတေဢဝ် ပြည်နယ် 7တိူင်း ပဵၼ်လၵ်း ၵူၼ်းၵူႈၸၢဝ်းၶိူဝ်း မီးသုၼ်ႇလႆႈ ၽဵင်ႇပဵင်းၵၼ် ၼႆၼၼ်ႉလႄႈ ႁဝ်းလူဝ်ႇ ဢုပ်ႇဢူဝ်း ႁႂ်ႈလႆႈ သုၼ်ႇဢုပ်ႉပိူင်ႇ မိူင်းတႆးႁင်းၶေႃ သေ ႁႂ်ႈမီး လူင်ပွင်ၸိုင်ႈၵၢင် ႁူဝ်ပဝ်ႈ မိူင်းတႆးၼၼ်ႉ လူဝ်ႇလိူၵ်ႈတင်ႈ ႁႃဢဝ် ဢမ်ႇၸႂ်ႈတႅင်ႇတင်ႈ ၶိုၼ်ႈၼင်ႇ ပဵၼ်ယူႇမိူဝ်ႈလဵဝ်။

တပ်ႉသိုၵ်းၶဝ် ၸွင်ႇတေ ယွမ်းၶႃႈႁိုဝ်? ငဝ်းလၢႆး မိူဝ်းလဵဝ်ၼႆႉ သိုၵ်းၶဝ် ၵူဝ်ဢႃႇၼႃႇၶဝ် တူၵ်းသေ ၶတ်းၶႂၢင်ဝႆႉယူႇ ဢမ်ႇၸႂ်ႈၶႃႈႁိုဝ်?
မိူင်းႁူမ်ႈတုမ် မိူင်းမၢၼ်ႈၼႆႉ ဝၢႆးသေ မီးၵၢၼ်လိူၵ်ႈတင်ႈ သမတ တဵင်းၸဵင်ႇ ၶိုၼ်ႈမႃးပဵၼ် ၽူႈဢွၼ်ႁူဝ်ၼႆႉ သမတ တဵင်းၸဵင်ႇ ၶႂ်ႈလႅၵ်ႈလၢႆႈလၢႆး ဢုပ်ႉပိူင်ႇ ဝၢၼ်ႈမိူင်း ႁႂ်ႈၶိုၼ်ႈယႂ်ႇ မႂ်ႇသုင် ပေႃးတိုၵ်ႉပဵၼ် သိုၵ်းၵၼ် ယူႇၼၼ်ႉ ဝၢၼ်ႈမိူင်း တေတူၵ်းတႅမ်ႇသေ ၵူၼ်းမိူင်း တေတုၵ်ႉၶ တင်းမူတ်း ၵူၼ်းလူင် မိူင်းမၢၼ်ႈၶဝ် ဢၼ်ၶႂ်ႈလႅၵ်ႈလၢႆႈၵေႃႈ တေမီး  ၸိူဝ်းဢမ်ႇၶႂ်ႈ လႅၵ်ႈလၢႆႈၵေႃႈ တေမီးယူႇ သိုၵ်းတႄႉၵွပ်ႈၶဝ် လႆႈၵိၼ်လီ မႃးယဝ်ႉလႄႈ ပေႃးလႅၵ်ႈလၢႆႈ ၵူဝ်ဢမ်ႇမီး ဢႃႇၼႃႇ ႁဵတ်းသၢင်ႈ ၼၼ်ႉတႄႉ ႁူႉတေမီးယူႇ။ ပဵၼ်ႁိုဝ်ၵေႃႈ ပေႃးၵူၼ်းလူင် ၵမ်ႈၼမ် ၶႂ်ႈလႅၵ်ႈလၢႆႈ တေႉတေႉ ဢမ်ႇလိူဝ်လႆႈ၊ ၸိူဝ်းဢမ်ႇႁဵတ်းၸွမ်းၵေႃႈ ႁူႉထုၵ်ႇ ပူတ်းထွၼ်ပႅတ်ႈ ၼၼ်ႉၵူၺ်း ၵၢၼ်မိူင်းၼႆႉ ႁူႉတေလႆႈၸႂ်ႉ ၶၢဝ်းယၢမ်းယူႇ။

လွင်ႈၽဵဝ်ႈယႃႈမဝ်းၵမ်ၼႆႉ တၢင်ႇၸုမ်းသမ်ႉ ၵႃႉယူႇၼၼ်ႉ တေဢမ်ႇ¬ၶတ်းၵၼ်ၶႃႈႁႃႉ?
ၸုမ်းလႂ်ၵေႃႈ မိူဝ်ႈဢုပ်ႇ ဢူဝ်း လူင်ပွင်ၸိုင်ႈ တဵင်းၸဵင်ႇၼၼ်ႉ  ၶဝ်ၵေႃႈ မီးပေႃႇလသီႇ တေႁူမ်ႈ လူင်ပွင်ၸိုင်ႈ ၽဵဝ်ႈယႃႈၵူႈၸုမ်းယူႇ ၵူၺ်းၵႃႈ ၸုမ်းလႂ်ၸုမ်းၼၼ်ႉ လၢႆးႁူမ်ႈ/လၢႆးႁဵတ်း ဢမ်ႇမိူၼ် ၵၼ်ၼၼ်ႉ ၵူၺ်း၊ တႃႇတေ ၶတ်းၵၼ်ၼၼ်ႉ ယုမ်ႇယမ်ဝႃႈ တေဢမ်ႇမီး သင်ဝႃႈ ၶတ်းမႃးၵေႃႈ ၼၼ်ႉပဵၼ် ၶေႃႈတွပ်ႇဝႃႈၶဝ် ဢမ်ႇၶႂ်ႈ ႁႂ်ႈ ယႃႈမဝ်းၵမ်ႁၢႆ ၶႂ်ႈသိုပ်ႇၵႃႉယႃႈယူႇ ၼၼ်ႉယဝ်ႉ ဢၼ်ၶွင်ႇသီႇ ဢဝ်ၶိုၼ်းၸိုင်ႈတႆး မီးပေႃႇလသီႇ ၽဵဝ်ႈယႃႈၼႆႉ ယိူင်းဢၢၼ်း ဢဝ်ၵၢၼ် ပူၵ်းပွင်ပဵၼ်ၼိုင်ႈ ပၼ်သတိ ပဵၼ်သွင် ဢဝ်ပၵ်းပိူင် လၵ်းမၢႆႁဵတ်းသၢင်ႈ ပဵၼ်သၢမ်ၼၼ်ႉၵူၺ်း တပ်ႉမတေႃႇႁဵတ်း မႃးၼၼ်ႉတႄႉ ႁဝ်းတေ ဢမ်ႇႁဵတ်းလႃး2 သင်ဝႃႈ တပ်ႉမတေႃႇၶဝ် သိုပ်ႇၽဵဝ်ႈယႃႈၸႂ်ႉ လၢႆးဢႃးထမ်ႇမ ၸႂ်ႉလၢႆး လွၵ်ႇငိုတ်ႈ ၵိၼ်သူးလၢပ်ႈ ယူႇၼၼ်ႉ ႁႂ်ႈၵူၼ်းမိူင်း ဢဝ်ၶၢဝ်ႇ တၢင်ႇမႃးတီႈ RCSS/SSA  ၵမ်းလဵဝ် ၸုမ်းႁဝ်းတေ တႅမ်ႈလိၵ်ႈတၢင်ႇထိုင် ပၼ်တီႈ သမတ တဵင်းၸဵင်ႇ ၵမ်းလဵဝ်ယူႇ.။