ၸုမ်းၶၢဝ်ႇ Kachinnews.com ဢွၵ်ႇၶၢဝ်ႇဝႆႉ  မိူဝ်ႈဝၼ်းထီႉ 25/7/2012 ၼၼ်ႉ တီႈလႅၼ်လိၼ် တပ်ႉသွင်ၽၢႆႇ တူင်ႉၼိုင် ပၼ်ၵွင်ႇမူႇ (Bankawng Mu) မီးတီႈ ၸႄႈမိူင်းၶၢင် သဵၼ်ႈတၢင်း မျိတ်ႉၵျီးၼႃး - မၢၼ်ႈမေႃႇ ဝၼ်းထီႉ 24/7/2012 ၼၼ်ႉ တပ်ႉလွတ်ႈလႅဝ်း သဝ်းၶေႃၶၢင် (KIA) ဢဝ်မၢၵ်ႇပွႆႇသႂ်ႇ တပ်ႉသိုၵ်း လူင်ပွင်ၸိုင်ႈမၢၼ်ႈလႄႈ သိုၵ်ႈမၢၼ်ႈလႆႈတၢႆ ၵႂႃႇ 5ၵေႃႉ မီးလွင်ႈမၢတ်ႇၸဵပ်း တင်းၼမ်။

မိူဝ်ႈယၢမ်း ႁူဝ်ၶမ်ႈ 5 မူင်းၼၼ်ႉ တပ်ႉသိုၵ်း လူင်ပွင်ၸိုင်ႈမၢၼ်ႈ ၶလယ (142) တူင်ႉၼိုင်မႃး တၢင်းတပ်ႉၵွင် (24) တပ်ႉၸုမ်း (5) KIA တီႈပၼ်ၵွင်ႇမူ (Bankawng Mu) ၼၼ်ႉသေ MHH ဢၼ်ႁွင်ႉဝႃႈ KIA ၸုမ်းပီႇတူႉၸိတ်ႉၶဝ် ဢဝ်မၢၵ်ႇပွႆႇ တိုၵ်းသႂ်ႇၼႆ ၽူႈမီးၸၼ်ႉ ငဝ်ႈငုၼ်းလၢႆႇၸႃႇ ၵေႃႉၼိုင်ႈ လၢတ်ႈၼႄ ၼင်ႇၼႆ။

“ဢဝ်ၵွင်ႈသေ ပိုတ်းယိုဝ်းသႂ်ႇ ဢမ်ႇၸႂ်ႈ၊ ၸုမ်းၶဝ်ပဵၼ် ၸုမ်းဢၼ်တူင်ႉၼိုင် ယူႇႁိမ်းႁွမ်းၼၼ်ႉ၊ ၸုမ်းႁဝ်းၶႃႈ ပိုတ်းသႂ်ႇ မိူဝ်ႈယၢမ်းၶဝ် တေဢွၵ်ႇ တူင်ႉၼိုင် ၼၼ်ႉယဝ်ႉ”
တီႈလႅၼ်လိၼ် ႁိမ်းႁွမ်း ငဝ်ႈငုၼ်းလၢႆႇၸႃႇ (Laiza) တပ်ႉၸုမ်း လွတ်ႈလႅဝ်း သဝ်းၶေႃ KIO ၼႆႉ ပဵၼ်ပၢင်တိုၵ်းၵၼ် ၵူႈဝၼ်းၼႆ။

တပ်ႉၵွင် (6) တပ်ႉၸုမ်း(2) KIA တီႈၵႃးမၢႆးၼႆႉၵေႃႈ တင်းတပ်ႉသိုၵ်း လူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် လွင်ႈလူႉသုမ်း မၢတ်ႇတၢႆ သွင်ႇၽၢႆႇတႄႉ ပႆႇလႆႈႁူႉဝႃႈၼႆ။

မိူဝ်ႈဝၼ်းထီႉ 19 လိူၼ် July ၼၼ်ႉ ၵူၼ်းသိုၵ်း တပ်ႉသိုၵ်း လူင်ပွင်ၸိုင်ႈမၢၼ်ႈ တပ်ႉၶၼ်ႊတီး ၶလယ (52) 2 ၵေႃႉ မႃးဝၢင်းၶိူင်ႈ တီႈၸုမ်း KIO  ၼႆ ၽူႈမီးၸၼ်ႉ KIO လၢတ်ႈၼႄ။

ၽွင်းယၢမ်း ပဵၼ်ပၢင်တိုၵ်း ၵၼ်ယူႇ ၼႂ်းၸႄႈမိူင်းၶၢင်ႇၼႆႉ ၽၢႆႇKIO ၶဝ် ယိုၼ်ႈယၢၼ်ၸူးတီႈ ၸုမ်းၵေႃႇသၢင်ႈ လွင်ႈငမ်းယဵၼ် ၸုမ်းလူင်ပွင်ၸိုင်ႈဝႆႉ လွင်ႈတႃႇတေ ႁူပ်ႉထူပ်းဢုပ်ႇဢူဝ်း ငူပ်ႉငီႉ လွင်ႈတႃႇတေ ၵိုတ်းယိုဝ်းၵၼ် တီႈမိူင်းၶႄႇၼႆယူႇ လႆႈႁူႉ ၸွမ်းၼင်ႇၼႆ။