မိူဝ်ႈဝၼ်းထီႉ 25/7/2012 ၼၼ်ႉ ယွၼ်ႉတပ်ႉသိုၵ်းမၢၼ်ႈ ၶမယ (415) ဢဝ်ၶိူင်ႈလူင် ယိုဝ်းသႂ်ႇလႄႈ တပ်ႉသိုၵ်းၶၢင် KIA လွႆယိင်း(Loi Ying) တပ်ႉၸုမ်း(3) တပ်ႉၵွင်(15) ဢၼ်မီးႁိမ်း ၸိၼ်ႇလွမ်ႇ သဵၼ်ႈတၢင်း မၢၼ်ႈမေႃႇ - လွႆၸေႈ ၸေႊမိူင်းၶၢင် လႆႈထွႆလင်ပၼ် ဝႃႈၼႆ။
ၽူႈမီးၸၼ်ႉ တီႈငဝ်ႈငုၼ်း လၢႆႇၸႃႇ မၵ်းမၼ်ႈ လၢတ်ႈဝႃႈ ၶၢဝ်းယၢမ်းမွၵ်ႈ12 မူင်းၵိုင်ႇ  ယွၼ်ႉၽၢႆႇ တပ်ႉသိုၵ်းမၢၼ်ႈ ဢဵၼ်ႁဵင်းသိုၵ်း တင်းၼမ် သေပိုတ်း ယိုဝ်းမႃးလႄႈ လႆႈထွႆလင်ပၼ်။ ပွတ်းၵၢင်ၶမ်ႈ ၵေႃႈ တိုၵ်ႉသိုပ်ႇပဵၼ် ပၢင်တိုၵ်း။
ၽူႈမီးၸၼ်ႉ တီႈၼႃႈသိုၵ်း ၵေႃႉၼိူင်ႈၵေႃႈ လၢတ်ႈဝႃႈ “ တပ်ႉၸိူဝ်းၼႆႉ ပဵၼ်တပ်ႉ

ဢၼ်လမ်ႇလွင်ႈ ၵူႈတပ်ႉ၊ တီႈဢၼ် လမ်ႇလွင်ႈၼၼ်ႉ ႁဝ်းၶႃႈ ဝႆႉတပ်ႉဢွၼ်ႇ။ ၵူၺ်းၵႃႈဢဵၼ်ႁႅင်း သိုၵ်းႁဝ်းတီႈၼၼ်ႈ မီး 4/5 ၵေႃႉၵူၺ်းလႄႈ တပ်ႉသိုၵ်းမၢၼ်ႈ ၶဝ်ၵိုင်ႉၵၢင်ႉ ၶဝ်ႈမႃးၵေႃႈ ၽၢႆႇႁဝ်းလႆႈထွႆပၼ် ၸူဝ်ႊၶၢဝ်း” ဝႃႈၼႆ၊၊

လိူဝ်ၼၼ်ႉ လႆႈႁူႉဝႃႈတပ်ႉ ( Bum Sawn Bum ) ဢၼ်မီးႁိမ်း ငဝ်ႈငုၼ်း လၢႆႇၸႃႇၸုမ်း လွတ်ႈလႅဝ်း သဝ်းၶေႃၶၢင် KIO ဢၼ်ထွႆပၼ် ၼၼ်ႉၵေႃႈ ပႆႇလႆႈၶိုၼ်း ဝႃႈၼႆ။

ၼႂ်းဝၼ်းလဵဝ်ၵၼ် တပ်ႉသိုၵ်းမၢၼ်ႈ ၶလယ (130) ၸိူဝ်းတူင်ႉၼိုင် ယူႇႁိမ်းဝဵင်း ၼမ်ႉတူႈ မိူင်းတႆး ပွတ်းႁွင်ႇလႄႈ တပ်ႉၵွင် (34) KIA လႆႈပဵၼ် ပၢင်တိုၵ်းၵၼ် တီႈမိူင်းမိတ်ႈမွၵ်ႈ 3 ၸူဝ်ႊမူင်းပၢႆ။ ၽူႈမီးၸၼ်ႉ ၼႂ်းတပ်ႉၸုမ်း (4) မၵ်းမၼ်ႈလၢတ်ႈဝႃႈ ၽၢႆႇသိုၵ်းမၢၼ်ႈ တၢႆ 5 ၵေႃႉ ၽၢႆႇသိုၵ်းၶၢင် လွတ်ႈၽေး ၼႆသေတႃႉ ၽၢႆႇလူင်ပွင်ၸိုင်ႈ တႄႉ ဢမ်ႇမၵ်းမၼ်ႈ။

ၽွင်းမိူဝ်ႈ ပဵၼ်ပၢင်တိုၵ်း မိူဝ်ႈဝၼ်းထီႉ 23/7/2012 ၼၼ်ႉၵေႃႈ တပ်ႉမူႇ တပ်ႉသိုၵ်း လူင်ပွင်ၸိုင်ႈမၢၼ်ႈ ၺွပ်းဢဝ် ၵူၼ်းဝၢၼ်ႈ မူင်ၵုင်း- ၼမ်ႉသူ 4 ၵေႃႉ၊ ယိင်း 2 ၵေႃႉ ၸၢႆး 2 ၵေႃႉ တီႈပိုၼ်ႉတီႈ တပ်ႉၵွင် (36) KIA။ ၼၢင်းယိင်း 2 ၵေႃႉၼၼ်ႉ ၶိုၼ်းပွႆႇပၼ်ယဝ်ႉသေ တႃႉၵူၼ်းၸၢႆး 2 ၵေႃႉၼၼ်ႉတႄႉ လႆႈၶၢမ်ႇ တၢင်းၼိၵ်ႈၸၢၵ်ႈ ပေႉၵိၼ် ၵူႈယၢင်ႇယၢင်ႇ။ ဝၢၼ်ႈဢွၼ်ႇၼၼ်ႉ မီးလင်ႁိူၼ်း 20 ပၢႆ။

ၵူၼ်းဝၢၼ်ႈၶဝ် လၢတ်ႈဝႃႈ- တီႈဢၼ် ပဵၼ်ပၢင်တိုၵ်း တပ်ႉသိုၵ်း လူင်ပွင်ၸိုင်ႈမၢၼ်ႈ လႄႈ ၵူၼ်းပိုၼ်ႉ တီႈ ဢၼ်မီး ၼႂ်းလႅၼ်လိၼ် လူင်ပွင်ၸိုင်ႈၼၼ်ႉ ယွၼ်ႉတိၺွပ်း ပေႉၵိၼ် ထၢင်ႇထိူမ် တင်းKIA လႄႈ ၵူၼ်းမိူင်း ပိုၼ်ႉတီႈၶဝ် တႃႇတေ ယူႇသဝ်း ၼႂ်းၼႃႈလိၼ် လူင်ပွင်ၸိုင်ႈ ဢုပ်ႉပိူင်ႇၼၼ်ႉ ပဵၼ်ဢၼ် မႆႈၸႂ်လီၵူဝ် ဝႃႈၼင်ႇၼႆ။