မိူဝ်ႈဝၼ်းထီႉ 27.7.12 ၼၼ်ႉ ၶိုၼ်းထူပ်းႁၼ် တူဝ်တၢႆ ၵူၼ်းဝၢၼ်ႈ ဝၢႆးဢၼ်သိုၵ်းမၢၼ်ႈ တိၺွပ်းၵႂုႇ တီႈၸႄႈဝဵင်း ပၢင်ႇသၢႆး မိူင်းတႆး ပွတ်းႁွင်ႇ။

တပ်ႉသိုၵ်းမၢၼ်ႈ ၶမယ7၊ ၶမယ9လႄႈ ၶလယ 123 တိၺွပ်းၵႂုႇ ၵူၼ်းဝၢၼ်ႈ ဝၢၼ်ႈယီႇၶူး ၸႄႈဝဵင်းပၢင်ႇသၢႆး မိူင်းတႆးပွတ်းႁွင်ႇ ဝၢႆးသေ ပဵၼ်ပၢင်တိုၵ်း တီႈႁိမ်းဝၢၼ်ႈ မိူဝ်ႈဝၼ်းထီႉ 1လိူၼ်Julyၼၼ်ႉ။ ၽၢႆႇသိုၵ်း မၢၼ်ႈဝူၼ်ႉဝႃႈ ၵပ်းၵၢႆႇတင်း KIO ဝႃႈ ၼင်ႇၼႆ။

ဢၼ်တိၺွပ်းၵႂႃႇ ၵူၼ်းဝၢၼ်ႈ 23 ၵေႃႉၼၼ်ႉ ၶိုၼ်းပွႆႇပၼ် ၶမ်ႈၼၼ်ႉသေ တႃႇ3ၵေႃႉတႄႉ သိုပ်ႇတိ ၺွပ်းဝႆႉ။ မိူဝ်ႈဝၢၼ်းထီႉ 4လိူၼ်July ပွတ်းၵၢင်ၶမ်ႈၼၼ်ႉ ပွႆႇပၼ်2ၵေႃႉသေ ဢၼ်ပဵၼ် ၸလမ်းပုမ်ႇယေႃ ဢႃႇယု 34ၼၼ်ႉ သိုပ်ႇတိၺွပ်းဝႆႉသေ ဝၢႆးလိုၼ်း ဢမ်ႇလႆႈ ငိၼ်းၶၢဝ်ႇ ငိၼ်းငၢဝ်း။ ထိုင်မႃး ဝၼ်းထီႉ 27.7.12 ၼၼ်ႉ လႆႈထူပ်းႁၼ် တူဝ်တၢႆ ၽင်ဝႆႉ တီႈတပ်ႉသိုၵ်းၵဝ်ႇ။

ၼၢင်းယိင်း ၼႂ်းပိုၼ်ႉတီႈ ၵေႃႉၼိုင်ႈ ဢၼ်ၶိုၼ်ႈႁွတ်ႈ ပၢင်ၽဝ် တူဝ်တၢႆၼၼ်ႉ လၢတ်ႈဝႃႈ- “ၶဝ်ၽင်ဝႆႉ တီႈတၢင်း လင်တပ်ႉၵဝ်ႇ၊ ၼၢင်းယိင်းၶႄႇ ၵေႃႉၼိုင်ႈ ႁၼ်ႁွႆး လိၼ်ထူမ်ဝႆႉ။ တီႈၼၼ်ႈ သဵမ်မၢၵ်ႈ ၼိုင်ႈၵေႃႈ ၵိုတ်းဝႆႉ။ ႁႃငိူၼ်ႈ တီႈၼၼ်ႈယဝ်ႉသေ ၸဝ်ႈႁိူၼ်း မႃးလၢတ်ႈ တီႈၸုမ်းၶရိတ်ႉ။ ၽူႈၵႅမ် ၸုမ်းၶရိတ်ႉ ၵေႃႉၼိုင်ႈ သူင်ႇၶၢဝ်ႇထိုင် ႁူင်းတမ်ႇၼူတ်ႇ ယဝ်ႉသေ မိူဝ်ႈၼႆႉ ၵႂႃႇႁႃတူဝ်တၢႆ ၼၼ်ႉၸႂ်ႈတႄႉ။ ၸုမ်းၶႄၾႆး (မီးတၢတ်ႉ)၊ ၸၶၢၼ်းမူး၊ မေႃယႃၶဝ် ႁဵတ်းလွင်ႈ ၽႃႇတတ်းယူႇ။ ပေႃးယဝ်ႉ တွင်ႈထၢမ် ၸဝ်ႈႁိူၼ်းၶဝ်။ ပေႃးယဝ်ႉ ၸုမ်းၶရိတ်ႉ ႁဝ်းၶႃႈယွၼ်း သူးပၼ်သေ ၽဝ်ၵႂႃႇ” ဝႃႈၼင်ႇၼႆ။

လိူဝ်ၼၼ်ႉ ၵေႃႉဢၼ်ပဵၼ် ပူႇၶွင်ၽူႈတၢႆ ၸလမ်းပုမ်ႇယေႃ လၢတ်ႈ ဢၼ်လႆႈတၢႆ ၸိူင်ႉၼင်ႇၼႆ ပဵၼ်ယွၼ်ႉႁွႆးၸဵပ်း ပေႃႉထုပ်ႉ၊  ၵဵဝ်ႇၵပ်းလူၺ်ႈ လွင်ႈၼႆႉ ႁၢင်ႈႁႅင်း ပိူဝ်ႈတႃႇ ပိုတ်ႇဢမူႉယူႇ။ ႁွႆးပေႃႉထုပ်ႉဝႆႉၼၼ်ႉ တေႃႇထိုင်မိူဝ်ႈလဵဝ် တီႈမၢၵ်ႇၵၢဝ်ႈ ၵွၼ်ႈလိူတ်ႈ ပေႃးလမ်လူင်ဝႆႉ။ တီႈဢၼ် ဢမ်ႇမီးႁွႆးၸဵပ်း ၼၼ်ႉတႄႉ ၽိူၵ်ႇဝႆႉယူႇ။ မေႃယႃသွၼ်ႇဝႃႈ သဵၼ်ႈလိူတ်ႈ ဢွၵ်းဢေႃ ပွင်ႇၼိုင်ႈသဵၼ်ႈ တီႈလုပ်ႇဢၼ်ႁေႉ ဢွၵ်းဢေႃၵေႃႈ ႁၼ်ႁွႆးလမ်ဝႆႉ ဝႃႈၼႆ၊ ၵူႈတီႈတီႈၵေႃႈ ပဵၼ်ဝႆႉႁွႆးၸဵပ်း၊ ဢဵၼ်ႁူဝ်မႃႇၵေႃႈ လုတ်ႈဝႆႉ လၢတ်ႈဝႃႈၼႆ၊ တီႈပွတ်ႇၵေႃႈ ဢဵၼ်လိူတ်ႈပွင်ႇ၊ ၽၢႆႇတႂ်ႈၵိင်ႇႁေႉၵေႃႈ ပေႃးလႅင်လူင်ဝႆႉ၊ ဢၼ်ၶဝ် တႅမ်ႈဝႆႉပၼ် တီႈႁူင်း တမ်ႇၼူတ်ႇတႄႉ ပဵၼ်ႁၢင်ႈၽၢင် တိူင်ႇဢမူႉ၊ ဢွၼ်ၵၼ် တႅမ်ႈဝႆႉယဝ်ႉ” ဝႃႈၼင်ႇၼႆ။

ပွတ်းတွၼ်ႈ ႁူဝ်လိူၼ် July ၼႂ်းၸႄႈဝဵင်း ပၢင်သၢင်းၼၼ်ႉ တပ်ႉသိုၵ်းမၢၼ်ႈလႄႈ KIOၶဝ် မိူၼ်ႁၢင်ႈ ပဵၼ်ပၢင်တိုၵ်းၵၼ်ယူႇ ၵူႈဝၼ်း။ လႆႈႁူႉဝႃႈ ယၢမ်းလဵဝ် ၵူၼ်းပိုၼ်ႉတီႈၶဝ် ၵူဝ်ႁေသေ ဢမ်ႇႁတ်းသိုပ်ႇယူႇ လႄႈ လႆႈပၢႆႈ ၵႂႃႇယူႇ တီႈၼႂ်း ဝၢင်းၵျႂင်းၶရိတ်ႉ တီႈပၢင်သၢႆးလႄႈ တီႈႁိူၼ်း ပီႈၼွင်ႉဝႃႈၼႆ။ ၶေႃႈမုၼ်း တီႈRFA။