ႁၢင်ႈလူၼ်ႉ ဢၼ်ႁၢၼ်ႇလေး ဝူၼ်ႉတႃႇ လုၵ်ႈဢွၼ်ႇၶဝ်သေ ၸၼ်ဝႆႉၼႆႉ ပဵၼ်ၽႃႇသႃႇတႆးလႄႈ ပိုၼ်ၽႄ ဢွၵ်ႇတီႈ ၼႂ်းမိူင်းတႆး ပွၵ်ႈဢွၼ်တၢင်းသုတ်း လႆႈၸိုဝ်ႈဝႃႈ ၼႃႈမိူင်းၸမ်လႅင်း (အာရုဏ်ဦး) ၽိုၼ်ၶၢဝ်ႇ Dawn ၼႆယဝ်ႉ။

တွၼ်ႈတႃႇ လုၵ်ႈဢွၼ်ႇၶဝ် တေမီးတၢင်းယၢမ်ႈ လူလိၵ်ႈ၊ ဢၢၼ်ႇလိၵ်ႈၼၼ်ႉ တူဝ်ၸဝ်ႈၵဝ်ႇ လႆႈလူင်း ထုၼ်း (ဢွၵ်ႇႁႅင်း) ႁဵတ်းဢွၵ်ႇ သေ ပိုၼ်ၽႄတီႈ ၼႂ်းမိူင်းတႆး တင်းမူတ်းမီး 12 ၼႃႈလိၵ်ႈ ဝႃႈၼႆ။

လွင်ႈတၢင်း ယိူင်းဢၢၼ်း ဢၼ်လႆႈ ႁဵတ်းဢွၵ်ႇ ႁၢင်ႈလူၼ်ႉၼႆႉတႄႉ ႁၢၼ်ႇလေး လၢတ်ႈဝႃႈ “ ယိူင်းဢၢၼ်း ပိူဝ်ႈတႃႇ လုၵ်ႈဢွၼ်ႇၶဝ်။ ၼင်ႇႁိုဝ် လုၵ်ႈဢွၼ်ႇၶဝ် တေမီးတၢင်းယၢမ်ႈ လူဢၢၼ်ႇလိၵ်ႈ၊ ၵွပ်ႈပိူဝ်ႈ ႁၼ်ထိုင်ဝႃႈ တွၼ်ႈတႃႇ လုၵ်ႈဢွၼ်ႇၶဝ်ၼၼ်ႉ  လိၵ်ႈလၢႆးၼႆႉ မၼ်းဢေႇၼႃႇ၊ ယွၼ်ႉမီး ၵၢင်ၸႂ်ဝႆႉဝႃႈ ၼင်ႇႁိုဝ်လုၵ်ႈဢွၼ်ႇၶဝ် တေမီးႁႅင်းၸႂ် ၶႂ်ႈလူလိၵ်ႈ တိူဝ်းမႃး၊ ၽႃႇသႃႇ ၸၢဝ်းၶိူဝ်းၵေႃႈ တေႁဵတ်းဢွၵ်ႇ၊ ၽႃႇသႃႇ မၢၼ်ႈၵေႃႈ တေႁဵတ်း ဢွၵ်ႇယူႇ၊ တေႃႈလဵဝ်တႄႉ ယွၼ်ႉငဝ်းလၢႆး ငိုၼ်းတွင်းလႄႈ လႆႈႁဵတ်းဢွၵ်ႇ ၽႃႇသႃႇတႆး ဢၼ်လဵဝ်ၵူၺ်း၊ ဝၢႆးလိုၼ်းမႃး ၸင်ႇႁဵတ်း ဢွၵ်ႇၽၢႆႇမၢၼ်ႈ၊ ၽၢႆႇၸၢဝ်းၶိူဝ်း” မၼ်းလၢတ်ႈၵႂႃႇ ၼင်ႇၼႆ။

ၽိုၼ်ၶၢဝ်ႇ ႁၢင်ႈလူၼ်ႉၼႆႉ သႂ်ႇဝႆႉပႃး ပၢႆးသၢႆႊ၊ ပၢႆးပိုၼ်း၊ ပိုၼ်ႉႁူႉ၊ လွင်ႈမၢႆတွင်းဝၼ်း၊ ၵဵမ်း၊ တွၼ်ႈၽိုၵ်းလႅၼ်ႇ၊ ဢပုမ်ႇဢီႇသုပ်ႈ၊ တႃႇလုၵ်ႈဢွၼ်ႇၶဝ် ထုၵ်ႇလီ ႁူႉၸိူဝ်းၼႆႉၵေႃႈ လႆႈၸၼ်တႅမ်ႈ သႂ်ႇပႃးဝႆႉ ဝႃႈၼႆ။

ၵဵဝ်ႇၵပ်းလွင်ႈ ၽိုၼ်ၶၢဝ်ႇ ႁၢင်ႈလူၼ်ႉၼႆႉ ပဵၼ်ၵူၼ်းၵေႃႉလဵဝ် ၶပ်းၶိုင် ၸၼ်တႅမ်ႈ ဢွၵ်ႇသေ တေႁဵတ်းဢွၵ်ႇ ၵူႈလိူၼ်၊  မိူဝ်ႈလဵဝ် လႆႈႁဵတ်းဢွၵ်ႇယဝ်ႉ (3000) ပပ်ႉ၊ ပိုၼ်ၽႄ တီႈၼႂ်းမိူင်းတႆး တႃႇ (2000) ပပ်ႉ၊ မိူင်းထႆးတႃႇ (1000) ပပ်ႉဝႃႈၼႆ။