ယွၼ်ႉသိုၵ်းမၢၼ်ႈ ၶဝ်ႈလေႃႇတိုၵ်းလႄႈ ပၢင်တိုၵ်းသွင်ပၢင် လႆႈပဵၼ် ၼႂ်းၵႄႈ တပ်ႉသိုၵ်းမၢၼ်ႈလႄႈ တပ်ႉသိုၵ်း ၸိုင်ႈတႆး RCSS/SSA ပွတ်း ၼမ်ႉၸၢင်လႄႈ မိူင်းပၼ်ႇႁၢဝ်ႈႁႅင်း။

မိူဝ်ႈဝႃးဝၼ်းထီႉ 30/07/2012 ယၢမ်းၵၢင်ၶမ်း 10မူင်း တပ်ႉမၢၼ်ႈ ၶလယ 422လႄႈၶလယ 425 ႁူမ်ႈၵၼ် ၶဝ်ႈတိုၵ်း သၢႆသိုၵ်းၵွၼ်းၸိူင်း RCSS/SSA တီႈလွႆယေး ဢိူင်ႇမိူင်းၸိတ်ႇ ၸႄႈဝဵင်း ၼမ်ႉၸၢင်လႄႈ ပၢင်တိုၵ်း လႆႈပဵၼ်ႁိုင် 20မိၼိတ်ႉ၊ ၽၢႆႇRCSS/SSA ဢမ်ႇလုသုမ်းသင်၊ လွင်ႈလုသုမ်း ၽၢႆႇတပ်ႉသိုၵ်းမၢၼ်ႈ တိုၵ်ႉ ထတ်းသင်ယူႇ။

မိူဝ်ႈၼႆႉ ဝၼ်းထီႉ 31/07/2012 ယၢမ်းၵၢင်ၼႂ် 8မူင်း သၢႆသိုၵ်း တပ်ႉသိုၵ်းမၢၼ်ႈ ၶဝ်ႈတိုၵ်း တပ်ႉပႃႇမႆႉ RCSS/SSA တီႈဝၢၼ်ႈၼွင်လိူဝ်ႇ ဢိူင်ႇၼႃးမွၼ် ၸႄႈဝဵင်း မိူင်းပၼ်ႇလႄႈ လႆႈပဵၼ် ပၢင်တိုၵ်း ႁၢဝ်ႈႁႅင်း တေႃႇၵၼ်။ ၼႂ်းပၢင်တိုၵ်းၼႆႉ ၽၢႆႇRCSS/SSA ဢမ်ႇလုသုမ်းသင်၊၊
ယွၼ်ႉၽၢႆႇသိုၵ်းမၢၼ်ႈ ၶဝ်ႈမႃးယိုဝ်း တပ်ႉသိုၵ်းၸိုင်ႈတႆး RCSS/SSA ဢွၼ်တၢင်းလႄႈ ပၢင်တိုၵ်း ၸင်ႇလႆႈပဵၼ်မႃး။