မိူဝ်ႈဝၼ်းထီႉ 2/7/12 ၼၼ်ႉ လၢႆးငၢၼ်းၶၢဝ်ႇ dvb ဢွၵ်ႇၼႄဝႃႈ ႁူဝ်ပဝ်ႈ ငဝ်ႈငုၼ်း တီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) ၶုၼ်ထုၼ်းဢူးလႄႈ ႁူဝ်ၼႃႈထီႉသွင် ၸၢႆးၺုၼ်ႉလုၼ်ႇတေႁူပ်ႉထူပ်း ဢုပ်ႇဢူဝ်းၵၼ်တင်း ၸွမ်ၸိုင်ႈဢူးတဵင်းၸဵင်ႇ ဢမ်ႇပေႃးႁိုင်ၼႆႉ ၼႆၸၢႆးလဵၵ်ႉ ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် (SNLD)လၢတ်ႈဝႃႈၼႆ။

မိူဝ်ႈပူၼ်ႉမႃး ဝၼ်းဢၢင်းၵၢင်း ၼၼ်ႉ မီးလွင်ႈတႃႇ ႁူပ်ႉထူပ်းၵၼ်သေတႃႉ ယွၼ်ႉလူင်ပွင်ၸိုင်ႈ တဵင်းၸဵင် ဢမ်ႇတၼ်းလႄႈ လႆႈၶၢႆႉဝၼ်းမၼ်းပႅတ်ႈ၊ တေႁူပ်ႉထူပ်းၵၼ် ဝၼ်းပိၵ်ႉလုမ်းၵၼ် ၼႆႉၼႆ ဢွၵ်ႇၼႄဝႆႉတီႈၼႃႈ facebook (SNLD)ၼင်ႇၼႆ။

ပႃႇတီႇႁူဝ်သိူဝ်ၶဝ်တေမီးလွင်ႈတုၵ်ႉယွၼ်း တီႈလူင်ပွင်ၸိုင်ႈ ဢၼ်လမ်ႇလွင်ႈမၼ်း တေမီး 3 ၶေႃႈ ၼႆလုင်းၸၢႆးလဵၵ်ႉ လၢတ်ႈ။

“ၵူၼ်းပၢႆႈၽေးလႄႈ ၵူၼ်းၸၢဝ်းၶိူဝ်း ဢၼ်ယၢၼ်မိူင်း ၵႂႃႇၼၼ်ႉ ႁႂ်ႈလႆႈပွၵ်ႈၶိုၼ်းမႃး လွတ်ႈလွတ်ႈလႅဝ်းလႅဝ်းသေ ႁႂ်းပေႃးၸၢင်ႈလႆႈသႂ်ႇၶဝ်ႈပႃး ၼႂ်းသဵၼ်ႈၸိုဝ်ႈႁူဝ်ၵူၼ်း လႄႈ ႁႂ်ႈလႆႈမၢႆၾၢင်ငၢႆႈငၢႆႈ၊ ဢၼ်ဢမ်ႇၸႂ်ႈ ၵူၼ်းၼႂ်းမိူင်းသမ်ႉ ၶဝ်ႈပႃးၼႂ်းသဵၼ်ႈ ၸိုဝ်ႈႁူဝ်ၵူၼ်းသေ ဢၼ်ပဵၼ်ၸၢဝ်းၶိူဝ်းႁဝ်း ၵူၼ်းမိူင်းႁဝ်းသမ်ႉ ဢမ်ႇလႆႈပႃးၼႂ်းသဵၼ်ႈ ၸိုဝ်ႈႁူဝ်ၵူၼ်းၼၼ်ႉပဵၼ် လွင်ႈလူႉသုမ်းလူင် ဢၼ်ၼိုင်ႈ၊ ယွၼ်ႉၼၼ် တႃႇႁႂ်းၸၢဝ်းၶိူဝ်းႁဝ်း တေလႆႈႁဵတ်း မၢႆၾၢင်ငၢႆႈငၢႆႈ ၼၼ်ႉတေပဵၼ်ႁူဝ် ၶေႃႈထီႉၼိုင်ႈသေ ၵႂႃႇတၢင်ႇတူၵ်းယွၼ်း”ဝႃႈၼႆ။

ၶေႃႈထီႉသွင် တႄႉတီႈဢၼ်လႆႈ ၵေႃႇသၢင်ႈလွင်ႈ ငမ်းယဵၼ်ၼၼ်ႉ ယႃႇပေႁႂ်ႈလႆႈၸႅၵ်ႇၽႄ ၸုမ်းလဵၵ်ႉ ၸုမ်းယႂ်ႇ ႁႂ်ႈဝႆႉမိူၼ်ၵၼ်သေ ၶၢဝ်းယၢမ်းလဵဝ်ၵၼ်/ မိူဝ်ႈလဵဝ်ၵၼ် ႁႂ်ႈတႅပ်းတတ်း ပၼ်ၶၢဝ်းယၢမ်းၼိုင်ႈလိူၼ် ဢမ်ႇၼၼ် သၢမ်လိူၼ် တွၼ်ႈတႃႇဢုပ်ႇၵုမ် လွင်ႈၵိုတ်းယိုဝ်း ၵၢၼ်မိူင်း တင်းမိူင်းပတ်းပိုၼ်ႉ တႃႇၵူႈၸုမ်းၸုမ်း တေပၼ်တၢင်းႁၼ်ထိုင် ၼင်ႇၼႆ။

ၶေႃႈထီႉသၢမ်တႄႉ တေပဵၼ်လွင်ႈတၢင်း တႃႇလႆႈသွၼ်လိၵ်ႈ ၸၢဝ်းၶိူဝ်းၽႂ်မၼ်း တီႈၼႂ်းၶၢဝ်းႁဵၼ်း လူင်ပွင်ၸိုင်ႈ ၸွမ်းၼင်ႇ ပပ်ႉလၢႆးပူင်သွၼ် ၸၢဝ်းၶိူဝ်းၽႂ်မၼ်း တေယိုၼ်ႈယၼ်ၵႂႃႇ ၼင်ႇၼႆ။

“ၽွင်းလူင်ပၢႆႈပိင်ႇၺႃႇ ပၼ်ၶႂၢင်ႉဝႆႉ တႃႇတေသွၼ်လိၵ်ႈ ၸၢဝ်းၶိူဝ်းၽႂ်မၼ်းၼႆႉ ႁႂ်ႈဢဝ်လိၵ်ႈ ၽႃႇသႃႇမၢၼ်ႈသေ မႃးပိၼ်ႇပႄပဵၼ်လိၵ်ႈ ၸၢဝ်းၶိူဝ်းၽႂ်မၼ်းယူႇ၊ ၸႂ်ႉ ၶူးသွၼ် မေႃသွၼ်ၶဝ်ပိၼ်ယူႇ၊ ဝၢႆးပိၼ်ႇတူၺ်း မၼ်းဢမ်ႇၶႅမ်ႉလႅပ်ႈ၊ ၵွပ်ႈၼႆသင်ဝႃႈ ဢမ်ႇၶႂ်ႈႁႂ်ႈ ၸၢဝ်းၶိူဝ်းႁဝ်း လႆႈတႅၵ်ႇယၢႆႈၵၼ်၊ ဢမ်ႇၶႂ်ႈႁႂ်ႈ တိူဝ်ႉၶိူၵ်ႈၽႂ်ၼႆၸိုင် တေလႆႈပၼ်ႁႂ်ႈမီးသုၼ်ႇလႆႈ တႃႇတႅပ်းတတ်း မၵ်းမၼ်ႈႁင်းၶေႃ လွတ်းလွတ်ႈလႅဝ်းလႅဝ်းၵႂႃႇ ”ၸၢႆးလဵၵ်ႉၽူႈၶၢၼ်ပၢၵ်ႇ ပႃႇတီႁူဝ်သိူဝ်(SNLD) လၢတ်ႈၵႂႃႇဝႃႈၼႆ။