တပ်ႉသိုၵ်း လူင်ပွင်ၸိုင်ႈမၢၼ်ႈ ဢၼ်မီးယူႇ ၼႂ်းၸိုင်ႈတႆးၼႆႉ တူင်ႉၼိုင်ၵႂႃႇမႃးယူႇ ဢမ်ႇထၢတ်ႇဢမ်ႇဝၢႆးသေ ထူဝ်းသိုၵ်းတေႃႇ တပ်ႉသိုၵ်းၸိုင်ႈတႆး RCSS/SSA ပူၼ်ႉပႅၼ်သုၼ်ႇလႆႈၵူၼ်း ၼႂ်းၸိုင်ႈတႆး ႁဵတ်းႁႂ်းၵူၼ်းမိူင်း လႆႈလူႉသုမ်းမၢတ်ႇၸဵပ်းၸွမ်း  လႅင်ႇၶၢဝ်ႇၼႂ်းမိူင်းပွင်ႇမႃး။

မိူဝ်ႈလိူၼ် July ဝၼ်းထီႉ 30-31 တပ်ႉသိုၵ်းမၢၼ်ႈ တပ်ႉၵွင် 422/425 မႃးတိုၵ်းတပ်ႉသိုၵ်းၸိုင်ႈတႆး RCSS/SSA တီႈလွႆယႄး ႁိမ်းဝၢၼ်ႈလၢႆႉၶႃး ဢိူင်ႇမိူင်းၸိတ်ႇ ၸႄႈဝဵင်းၼမ်ႉၸၢင် သိုၵ်းမၢၼ်ႈၶဝ်တိုၵ်းဢမ်ႇလႆႈလႄႈ လႆႈထွႆဢွၵ်ႇယူႇၼွၵ်ႈဝၢၼ်ႈ ယိုဝ်းမၢၵ်ႇ RPG တူၵ်းသႂ်ႇႁိူၼ်း ၵူၼ်းဝၢၼ်ႈၵူၼ်းမိူင်း လုၵ်ႈဢွၼ်ႇလႆႈဝၢတ်ႇၸဵပ်းၵႂႃႇ 1 ၵေႃႉ ႁိူၼ်းၵေႃႈလူႉလႅဝ် တင်းလင်ဝႃႈၼႆ။

မိူဝ်ႈဝၼ်းထီႉ 06-08-2012 ၼၼ်ႉသိုၵ်းမၢၼ်ႈတပ်ႉ 132/577 ထႅင်ႈ ၸုမ်းဢၼ်ဢမ်ႇႁူႉမၢႆတပ်ႉ ၸူႉၵၼ်ႁႅင်းမွၵ်ႈ 200 ၵေႃႉၸမ် မီးဝႆႉသၢႆလႃႈၼေႉ လူင်းထိုင်ဝၢၼ်ႈ ၵဝ်ႇမေႃႈတွင်း ၵမ်ႈၽွင်ႈၶိုၼ်ႈမီးဝႆႉလွႆၽၢႆႇၸၢၼ်းၼွင်လိူဝ်ႇ လႄႈ ၽၢႆႇတူၵ်းၼွင်လိူဝ်ႇ ယွၼ်ႉဝႃႈပႆႇႁတ်းၶဝ်ႈ တပ်ႉၼွင်လိူဝ်ႇၶဝ်ၼႆယဝ်ႉ။

သိုၵ်းမၢၼ်ႈတီႉဢဝ်မႃႉ ၵူၼ်းမိူင်းဢၼ်ပွႆႇဝႆႉ မီးၸွမ်းၽင်ႇၼမ်ႉပၼ်ႇ 4 တူဝ် ဢဝ်ၶိုၼ်ႈမိူဝ်းတီႈ ၶဝ်ပၵ်းသဝ်းယူႇၼၼ်ႉ ယဝ်ႉၵေႃႈၶိုၼ်း လိုပ်ႈမႃးၸူး တပ်ႉသိုၵ်းၸိုင်ႈတႆး RCSS/SSA သေလႆႈၽႃႇၺႃးမၢၵ်ႇ တပ်ႉသိုၵ်းၸိုင်ႈတႆး RCSS/SSA ၶဝ်လႄႈလႆႈတၢႆၵႂႃႇ1 တူဝ် တႃႇသၢမ်တူဝ်တႄႉ တီႉၺွပ်းဝႆႉ၊ ယၢမ်း 10 မူင်း သိုၵ်းမၢၼ်ႈတပ်ႉ 132 ၽၢႆႇတူၵ်းတပ်ႉၼွင်လိူဝ်ႇ လိုပ်ႈမႃႉၶိုၼ်ႈထႅင်ႈ 3 တူဝ်သေ ၶိုၼ်းၸွမ်းလင်မႃႉၶဝ် ၸွင်ႇႁွတ်ႈၽႅဝ် ၼႂ်းတပ်ႉၼွင်လိူဝ်ႇၶဝ် ၼႆယူႇ။

မိူဝ်ႈဝၼ်းထီႉ 06-08-2012 ၼၼ်ႉသိုၵ်းမၢၼ်ႈတီႈမႆႉပူၵ်ႇ ၸႂ်ႉၵူၼ်းမိူင်းဢဝ်မႃႉ မိူဝ်းတၢင်ႇယဵၵ်ႉၶႃႇ ၶဝ်တီႈမိူင်းပၼ်ႇ ၵူၼ်းမိူင်းဢမ်ႇႁတ်း ဢမ်ႇၽွမ်ႉၶဝ် လႄႈ တႅမ်ႈလိၵ်ႈသေ ႁႂ်ႈၵူၼ်းၼွင်လိူဝ်ႇ မိူဝ်းသူင်ႇပၼ် တီႈတပ်ႉၶဝ် ၼႂ်းဝဵင်းမိူင်းပၼ်ၼႆယဝ်ႉ၊ ၵူၼ်းလူင် ဝၢၼ်ႈၼွင်လိူဝ်ႇ 2 ၵေႃႉ တပ်ႉသိုၵ်းလူင်ပွင်ၸိုင်ႈမၢၼ်ႈ တီႉၺွပ်းႁွင်ႉၵႂႃႇတီႈမႆႉပူၵ်ႇ ယင်းပႆႇပွႆႇမႃးၶိုၼ်း၊ မိူဝ်ႈဝၼ်းထီႉ 05-08-2012 ယၢမ်း 11 မူင်း ၼၼ်ႉၵေႃႈၵူၼ်းၼွင်လိူဝ်ႇ လူင်းဝဵင်းၵႂႃႇၽႅဝ်တီႈ ၵိၵ်ႉၺွင်ႇၶမ်းၼၼ်ႉ ထုၵ်ႇသိုၵ်းမၢၼ်ႈႁွင်ႉ ၸႅတ်ႈထၢမ်ၶဝ်မွၵ်ႈ 2 ၸူဝ်ႈမူင်း ၸွင်ႇပွႆႇပၼ်ၶိုၼ်း ဝႃႈၼႆ။

ဝၢႆးတပ်ႉသိုၵ်းၸိုင်ႈတႆး RCSS/SSA လႄႈတင်းလူင်ပွင်ၸိုင်ႈၶဝ် ဢုပ်ႇဢူဝ်းတူၵ်းလူင်းၵိုတ်းယိုဝ်း ဢဝ်လွင်ႈငမ်းယဵၼ်မႃး ထိုင်ၶၵ်ႉတွၼ်ႈၸၼ်ႉ မိူင်ႈႁူမ်ႈတုမ် ပွၵ်ႈၵမ်းထီႉ 2 ယဝ်ႉၵေႃႈ တပ်ႉသိုၵ်းလူင်ပွင်ၸိုင်မၢၼ်ႈ တိုၵ်ႉပေႉၵိၼ်ၵူၼ်းမိူင်း ႁဵတ်းႁႂ်းၵူၼ်းမိူင်း လႆႈလိူတ်ႇမႆႈၸွမ်းယူႇ ၶိူဝ်းၶိူဝ်းယႂ်းယႂ်း။