ဝၼ်းထီႉ 7/8/2012 ၸုမ်းၶၢဝ်ႇ တႆးလွတ်ႈလႅဝ်း လႆႈတွင်ႈထၢမ် ႁူဝ်ပဝ်ႈလူင် RCSS/SSA ၸွမ်သိုၵ်း ၸဝ်ႈယွတ်ႈသိုၵ်း လွင်ႈပၼ်ႁႃၼႂ်းၵႄႈ UWSA လႄႈ RCSS/SSA

ထၢမ် - လွင်ႈပၼ်ႁႃ သိုၵ်းဝ UWSA လႄႈRCSS/SSA မီးပၼ်ႁႃၵၼ်မႃးယူႇ ၶိူဝ်းၶိူဝ်း ယႂ်းယႂ်းၼႆႉ လွင်ႈမၼ်းပဵၼ်ႁိုဝ်ဝႆႉၶႃႈ။
တွပ်ႇ - ပၼ်ႁႃၸၢဝ်းၶိူဝ်းၵေႃႈဢမ်ႇၸႂ်ႈ၊ ပၼ်ႁႃႁိမ်ၵၢၼ်ၵႃႉၶၢႆၵၼ် မိူၼ်ပၢၼ် MTA ၵေႃႈ ဢမ်ႇမီး၊ ဢၼ်ပဵၼ်မႃးၼႆႉ ယွၼ်ႉပိူဝ်ႈ ၵူၼ်းလူင် ၽၢႆႇတပ်ႉၸုမ်း 171 ဝူႇသႅဝ်ႇၵၢင်းၶဝ်ၼႆႉ ဢမ်ႇထတ်းသၢင်ၶၢဝ်ႇလီလီ သမ်ႉမီးမႃႇၼသိုၵ်း ၶဝ်ထၢင်ႇဝႃႈ ပေႃးဢဝ် သိုၵ်းၵႄႈလိတ်ႈၼႆႉ မၼ်းတေႁၢႆ တေယဝ်ႉ၊ ထၢင်ႇပိူၼ်ႈတေၵူဝ် ပေႃးဢဝ်သိုၵ်းလွၵ်ႈပိူၼ်ႈ တီႈတေႉမၼ်း ဢဝ်သိုၵ်း ၵႄႈလိတ်ႈ ဢဝ်သိုၵ်းလွၵ်ႇၵၼ်ၼၼ်ႉ ဢမ်ႇၵႄႈလိတ်ႈ ပၼ်ႁႃသင်လႆႈ၊ ၶႅၼ်းၽိူမ်ႉပၼ်ႁႃ ၸွမ်းထႅင်ႈ ၼႆၼၼ်ႉ ၸုမ်းဝၶဝ် တေဢမ်ႇဝူၼ်ႉထိုင်ႁိုဝ်? ဢမ်ႇၼၼ်ဢမ်ႇႁူႉ၊ ပေႃးဢဝ် သိုၵ်းတေႃႇသိုၵ်း မင်ၵၼ် ဢမ်ႇမီးၽႂ်ယွမ်းၽႂ်လေႃႇ၊ ဢၼ်တေၵႂႃႇ တိူဝ်ႉၶိူင်ႈၼႆႉ ပဵၼ်ၵူၼ်းမိူင်းလႄႈ ၵူၼ်းဢွၼ်ႇ၊ ဢမ်ႇႁူႉသင်သေ လႆႈတၢႆၼၼ်ႉဢိူဝ်ႈ တေၼႃႇ၊ ၵွပ်ႈဢမ်ႇထတ်း ထွင်ၶၢဝ်ႇလႄႈ ပဵၼ်ပၢင်တိုၵ်းၵၼ် မိူဝ်ႈပီႊ 2005 တီႈလွႆတႆးလႅင်းၼၼ်ႉၵေႃႈ  ၵူၼ်းလႆႈပဵၼ်တုၵ်ႉၶိတလႄႈတၢႆၵႂႃႇၼၼ်ႉ လီမွင်ၸႂ်ၸွမ်း ၵႃႈႁိုဝ်? ယွၼ်ႉဝၶဝ်  ၼေးဝႃႈ SSA ႁႅမ်တၢႆ ဢၢႆႈလႅင်း ဢၼ်တင်ႈႁူင်းယႃႈၽိၼ်ႇ ႁေးလူဝ်းဢိၼ်း တီႈၶၢင်ႈပႃၼၼ်ႉလႄႈ ပဵၼ်မႃးၵူၺ်း သင်ဢုပ်ႇၵၼ်ၵေႃႈ မၼ်းယဝ်ႉၵႂႃႇယဝ်ႉ၊ ထိုင်မႃး ဝၼ်းထီႉ 23/3/2012 ၼႆႉသမ်ႉတိဢဝ်ၵူၼ်း၊ ၵွင်ႈလႄႈ ၸၢၵ်ႈလၢတ်ႈၵႂႃႇ ထႅင်ႈတီႈ ထမ်ႈဝူဝ်း ၵိဝ်ႇၵေႃႇထႅင်ႈ၊ ဝၼ်းထီႉ 16-17/6/2012 ၼႆႉသမ်ႉ ဢဝ်ဢဵၼ်ႁႅင်းသိုၵ်း 300 ပၢႆမႃးယႃႉႁူဝ်ႉ သူၼ်ၵူၼ်းမိူင်း တီႈႁိမ်းလွႆၵေႃႇဝၼ်းထႅင်ႈ၊ ထိုင်မႃးဝၼ်းထီႉ 30-31/7/2012 သမ်ႉဢဝ် ဢဵၼ်ႁႅင်းသိုၵ်း 150ပၢႆ မႃးတိဢဝ်ၵူၼ်းသိုၵ်း SSA ၸုမ်း 727 ၶဝ် တီႈပုင်ႇၽႃ ပုင်ႇတွင်းၵႂႃႇထႅင်ႈ 14 ၵေႃႉ ၵွင်ႈ 14လဝ်း ၸၢၵ်ႈ 4 လုၵ်ႈ တေႃႇယၢမ်းၼႆႉ ယင်းပႆႇပွႆႇမႃး၊ ၸဝ်ႈႁၢၼ် တိုၼ်းၶိူဝ်း ပွႆႇၵူၼ်းၵႂႃႇဢုပ်ႇၵေႃႈဝႃႈ ဢမ်ႇႁပ်ႉဢုပ်ႇ လၢႆးႁဵတ်းၸိူင်ႉၼႆ မိူၼ်တင်းပိုၼ်ၽၢဝ်ႇသိုၵ်း တေႃႇၵၼ်ၵေႃႈပဵၼ်လႆႈ။

ထၢမ် - ပေႃးၼၼ် ၸဝ်ႈႁဝ်းၶဝ်သမ်ႉ တေၵႄႈလိတ်ႈၵၼ်ၸိူင်ႉႁိုဝ်ၶႃႈ?
တွပ်ႇ - မိူဝ်ႈလဵဝ်ၼႆႉ တိုၵ်ႉပဵၼ်ပၼ်ႁႃၵၼ် ၼႂ်းၼႃႈတီႈၵူၺ်းလႄႈ ႁႂ်ႈၼႃႈတီႈတေႃႇ ၼႃႈတီႈ ဢုပ်ႇၵၼ်ဢွၼ်တၢင်း ၵွပ်ႈ 727 လႄႈ 171 လုၵ်ႈတပ်ႉၶဝ်ၵေႃႈ ႁူႉၸၵ်းၵၼ်ဝႆႉ ၶဝ်ၵေႃႈၶဝ်ႈ ဢွၵ်ႇ ၵၼ်ယူႇ၊ ယုမ်ႇယမ်ဝႃႈ တေဢမ်ႇၸႂ်ႈပၼ်ႁႃယႂ်ႇ တေပႂ်ႉထွမ်ႇတူၺ်း ၶၢဝ်ႇၵွၼ်ႇ၊ သင်ဝႃႈ ၼႃႈတီႈ ဢမ်ႇၵေႈလိတ်ႈၵၼ်လႆႈ ၶၢဝ်ႇတၢင်ႇၶိုၼ်ႈ ငဝ်ႈၸိုင်ႈၼၼ်ႉ တေလႆႈ ၼင်ႈပၢင်ၵုမ် ထၢမ်ၵၢင်ၸႂ်ၵၼ်ၵွၼ်ႇ ထုၵ်ႇလီႁဵတ်းႁိုဝ် တေဢဝ်ၵၢင်ၸႂ် လုၵ်ႈတပ်ႉလႄႈ ၽူႈဢွၼ်ႁူဝ် သုၼ်ႇၼမ်ဝႃႈ။

ထၢမ် - လႆႈၶၢဝ်ႇဝႃႈ ဢၼ် RCSS/SSA ယွၼ်းမိူင်းတေႃႉ မိူင်းထႃးၼၼ်ႉ ၸုမ်းဝ UWSA ၶဝ် ဢမ်ႇပေႃးၸႂ်ၼႆ ၸွင်ႇၸႂ်ႈယူႇၶႃႈႁိုဝ်? ယွၼ်ႉပိူဝ်ႈၼႃႈတီႈလႄႈ ၶဝ်ၸင်ႇႁႃ ပၼ်ႁႃသေ သၢင်ႈပၼ်ႁႃမႃး ၶိူဝ်းၶိူဝ်းယႂ်းယႂ်း ၸွင်ႇပဵၼ်လႆႈၶႃႈႁိုဝ်?
တွပ်ႇ - ဢၼ် RCSS/SSA ယွၼ်းမိူင်းတေႃႉ မိူင်းထႃးၼၼ်ႉ တီႈတေႉမၼ်း မၢၼ်ႈၵေႃႈ ယင်းပႆႇပၼ်ႁဝ်း၊ ၸုမ်းဝ UWSA ၵေႃႈ ၶဝ်ဢမ်ႇမီးဢႃႇၼႃႇ ဢမ်ႇမီးသုၼ်ႇမႃး ႁေႉႁၢမ်ႈလႆႈ၊ ယွၼ်ႉဢၼ် မီးဢႃႇၼႃႇၵုမ်းၵမ် ၸိုင်ႈမိူင်းပဵၼ်လူင်ပွင်ၸိုင်ႈ တဵင်းၸဵင်ႇၵူၺ်း၊ ယွၼ်ႉႁဝ်းၵိုတ်းယိုဝ်း ၵၼ်ယဝ်ႉလႄႈ ႁဝ်းၵေႃႈ လူဝ်ႇၼႃႈတီႈပူၵ်းပွင် ၵွပ်ႈမိူင်းထႃး၊ ႁူဝ်မိူင်းပဵၼ် ၼႃႈတီႈၵဝ်ႇႁဝ်းမႃး ပၢၼ်သိုပ်ႇပၢၼ် ႁဝ်းယွၼ်းၼႃႈတီႈလႆႈယဝ်ႉၵေႃႈ ႁဝ်းယင်းပႆႇမီးၽႅၼ်ဝႃႈ တေလိုပ်ႈၶဝ်ဢွၵ်ႇ၊ ႁဵတ်းႁိုဝ်ၵေႃႈ ႁဝ်းပဵၼ် ၵူၼ်းမိူင်းလဵဝ်ၵၼ်လႄႈ ယူႇႁူမ်ႈၵၼ် ဝူၼ်ႉၼင်ႇၼႆဝႆႉယူႇ။ လႆႈၶၢဝ်ႇဝႃႈ ၶဝ်ဢမ်ႇပေႃးၸႂ်ၼႆၼၼ်ႉၵေႃႈ လႆႈငိၼ်းယူႇ၊ ပေႃးယူႇၽၢႆႇၶဝ် ဝူၼ်ႉတႄႉၵေႃႈ တေပဵၼ်လႆႈယူႇ။

ထၢမ် - ဢၼ် RCSS/SSA တင်းလူင်ပွင်ၸိုင်ႈ တဵင်းၸဵင်ႇ ဢုပ်ႇဢူဝ်းၵၼ် တီႈၵဵင်းတုင် မိူဝ်ႈဝၼ်းထီႉ 19/5/2012 တေႁူမ်ႈၵၼ် ၽဵဝ်ႈယႃႈမဝ်းၵမ်ၼႆၼၼ်ႉ လွင်ႈၼႆႉၵေႃႈ ဝူႇသႅဝ်ႇၵၢင်း ဢမ်ႇပေႃးၸႂ်၊ ၽၢႆႇၼိုင်ႈၵေႃႈ ၵူဝ်တၢင်းမၢၼ်ႈ ႁူမ်ႈၵၼ်တိုၵ်းၶဝ်ၼႆႉ ၸွင်ႇပဵၼ်လႆႈၶႃႈႁိုဝ်?
တွပ်ႇ - ပဵၼ်တၢင်းဝူၼ်ႉ ၽၢႆႇလဵဝ် ၵူဝ်သေ ဝိရိယၵူၺ်း၊ တီႈတေႉမၼ်း UWSA တီႈပၢင်သၢင်း ၵေႃႈ ႁပ်ႉႁွင်း ပေႃႇလသီႇ တဵင်းၸဵင်ႇသေ ၶဝ်ၵေႃႈ ၽဝ်ယႃႈမႃးယူႇ လၢႆပွၵ်ႈယဝ်ႉ၊ သင်ဝႃႈ ၶဝ်ဝူၼ်ႉ ၵႂၢင်ႈႁၼ်ၵႆၸိုင် ႁူမ်ႈမိုဝ်းၵၼ်ၽဵဝ်ႈ ၼေၵမ်ႇၽႃႇ ၸွႆႈထႅမ်လူင်ပွင်ၸိုင်ႈ တဵင်းၸဵင်ႇ ႁႂ်ႈယႃႈမဝ်းၵမ် ႁၢႆၼႆၸိုင် ဢၼ်ဝူႇသႅဝ်ႇၵၢင်းလႄႈ ၵူၼ်းလူင်ၼႂ်း UWSA ၶဝ် မီးမၢႆတိၵမ်ႇၽႃႇဝႆႉၼၼ်ႉ ယင်းတေၸၢင်ႈ ၸၢင်လူင်း၊ UNODC ၶဝ် မိူဝ်းႁူမ်ႈပၢင်သၢင်းသေ ၽဵဝ်ႈယႃႈမဝ်းၵမ်ၵေႃႈ မီးမႃးယူႇ၊ ယွၼ်ႉၼၼ်လႄႈ ၶဝ်ၸၢင်ႈ လူဝ်ၵူဝ်ႁဵတ်းသင်။

ဢၼ် RCSS/SSA ႁူမ်ႈလူင်ပွင်ၸိုင်ႈ တဵင်းၸဵင်ႇ ၽဵဝ်ႈယႃႈမဝ်းၵမ်ၼႆႉ ယွၼ်ႉႁၼ်ဝႃႈ လူင်ပွင်ၸိုင်ႈ တဵင်းၸဵင်ႇ ပိုၼ်ၽၢဝ်ႇဝႆႉဝႃႈ ပီႊ2014 ၼႆႉ တေႁႂ်ႈယႃႈမဝ်းၵမ် မူတ်းႁၢႆ ၽၢႆႇၼိုင်ႈႁဝ်းၵေႃႈ မီးပေႃႇလသီႇ ၽဵဝ်ႈမူၺ်ႉယႃႈမဝ်းၵမ် ဝႆႉယူႇလႄႈ ၼင်ႇႁိုဝ် ယႃႈမဝ်းၵမ် တေႁၢႆၵႂႃႇ ၼႂ်းမိူင်းႁူမ်ႈတုမ် ဝႆးဝႆးၼၼ်ႉ ႁဝ်းႁၼ်ဝႃႈ လူဝ်ႇၸွႆႈ လူင်ပွင်ၸိုင်ႈယူႇ ႁႅင်းၼိုင်ႈ၊ ၵွပ်ႈႁၼ်ဝႃႈ လုၵ်ႈဢွၼ်ႇ မိူင်းတႆးၵေႃႈ တိတ်းယႃႈမဝ်းၵမ် ၼမ်မႃး၊ ၼႂ်းၶၢဝ်းတၢင်းမိူဝ်းၼႃႈ လုၵ်ႈဢွၼ်ႇၸိူဝ်း ဢၼ်တေပဵၼ်ႁႅင်းၵႂႃႇ ၶၢဝ်းၼႃႈၼၼ်ႉ ၵူဝ်ဢမ်ႇမီး ႁၼ်ၼင်ႇၼႆလႄႈ  ၸင်ႇႁူမ်ႈ လူင်ပွင်ၸိုင်ႈၵူၺ်း ႁဝ်းဢမ်ႇမီးၽႅၼ် ၼင်ႇဢၼ်ပိူၼ်ႈဝူၼ်ႉဝႃႈ တေႁူမ်ႈမၢၼ်ႈသေ တိုၵ်း UWSA ၼႆၼၼ်ႉ ႁဝ်းဢမ်ႇမီး၊ ႁဝ်းပိုၼ်ၽၢဝ်ႇဝႆႉဝႃႈ တေယိူင်းဢၢၼ်းဢဝ် ၵၢၼ်ပူၵ်းပွင်သေ ၽဵဝ်ႈယႃႈၼႆ ၼၼ်ႉၵေႃႈ ပိုၼ်ၽၢဝ်ႇဝႆႉယူႇ။

ထၢမ် - ၸုမ်း UWSA ဝူႇသႅဝ်ႇၵၢင်းၶဝ်ၼႆႉ မီးမၢႆတိၵမ်ႇၽႃႇဝႆႉလႄႈ ၶဝ် ၵူဝ်ၶႃႈႁိုဝ်? ႁၼ်ၸိူင်ႉႁိုဝ်ၶႃႈ?
တွပ်ႇ - ဢၼ်ၸုမ်း ဝူႇသႅဝ်ႇၵၢင်းၶဝ် မီးမၢႆတိၵမ်ႇၽႃႇၼၼ်ႉ မီးမႃးႁိုင်ယဝ်ႉ၊ ၼၼ်ႉမၼ်းပဵၼ် လွင်ႈၵမ်ႇၽႃႇ ႁဝ်းၵေႃႈ ဢမ်ႇႁူႉၸွမ်းၶဝ်တႄႉတႄႉ၊ သင်ဝႃႈႁဝ်းၽွမ်ႉၵၼ်ၸိုင် ပၼ်ႁႃၵၢၼ်မိူင်း၊ ပၼ်ႁႃယႃႈမဝ်းၵမ် ပၼ်ႁႃဢၼ်ၵမ်ႇၽႃႇ ဢွၵ်ႇမၢႆတိၶဝ် ၸိူဝ်းၼၼ်ႉ မၼ်းၵေႃႈၸၢင်ႈၵေႈလႆႈယူႇ။ သင်ဝႃႈ ဢမ်ႇၵေႈလႆႈ ပၼ်ႁႃၵၢၼ်မိူင်းၸိုင် ပၼ်ႁႃယႃႈမဝ်းၵမ်လႄႈ ပၼ်ႁႃဢွၵ်ႇမၢႆတိ ၸိူဝ်းၼၼ်ႉ မၼ်းၵေႃႈ ယိုင်ႈၶႅၼ်းတေယႂ်ႇၵႂၢင်ႈမႃး၊ ပၼ်ႁႃယႃႈမဝ်းၵမ်ၼႆႉ မၼ်းၸၢင်ႈၶုတ်းႁၢၵ်ႈ ၶုတ်းႁူဝ်မၼ်းၵႂႃႇ ၸူဝ်ႈလုၵ်ႈ ပၢၼ်လၢၼ်ၼႆၼၼ်ႉဢိူဝ်ႈ။

ထၢမ် - ၵမ်ႈၽွင်ႈဝႃႈ ၶၢဝ်းယၢမ်းၼႆႉ လူဝ်ႇႁႃငိုၼ်း ပေႃးမီးငိုၼ်း ႁဵတ်းသင်ၵေႃႈလႆႈ၊ ပေႃးမီးငိုၼ်း ၸင်ႇမီးဢဵၼ်ႁႅင်း ၸိူဝ်းၼႆႉ ႁၼ်ၼင်ႇႁိုဝ်ၶႃႈ?
တွပ်ႇ - ပၢႆးဝူၼ်ႉၵူၼ်းၵၢၼ်မိူင်းလႄႈ ၵူၼ်းၵႃႉ မၼ်းဢမ်ႇမိူၼ်ၵၼ်၊ ပၢႆးဝူၼ်ႉၵူၼ်းၵၢၼ်မိူင်း ဢဝ်ၸိုဝ်ႈသဵင် မႃးဢွၼ်တၢင်း၊ ဢဝ်ၸိူဝ်ႉၸၢတ်ႈ တၢင်ႇႁူဝ်ဝႆႉ၊ ဢဝ်ၽႅၼ်ႇလိၼ် ပဵၼ်တီႈပိုင်ႈၵွၼ်ႇ ၸင်ႇတေမၼ်ႈၵိုမ်းလႆႈ၊ ပေႃးဢဝ်ငိုၼ်းတၢင်ႇႁူဝ် ဢဝ်ၸိူဝ်ႉၸၢတ်ႈ ပဵၼ်ၶႃႈၸႂ်ႉ ဢဝ်ၽႅၼ်ႇလိၼ် ပဵၼ်ယုၵ်းယၵ်းၼႆၸိုင် မီးငိုၼ်းၼမ်ၵႃႈႁိုဝ်ၵေႃႈ ဢဝ်ၸႂ်ႉႁဵတ်းသင်ဢမ်ႇလႆႈ၊ ဢမ်ႇမီး ဢႃႇမၶၢမ်ႇသင်။ မီးငိုၼ်းယူႇ ၼႂ်းထမ်ႈ ၵႂႃႇလႂ်ၵေႃႈ ဢမ်ႇလႆႈၼၼ်ႉ မၼ်းဢမ်ႇမီး ၵႂၢမ်းမၢႆသင်၊ ပေႃးၵူၼ်းမိူင်းမီး တၢင်းႁူႉ ပၢႆးဝူၼ်ႉ ၵၢၼ်မိူင်း ၽႂ်ဢမ်ႇထၢင်ႇယႂ်ႇ ၵူၼ်းမီးငိုၼ်း ဢၼ်ဢမ်ႇထုၵ်ႇ မႅၼ်ႈတြႃး၊ ပိူၼ်ႈၵူၺ်းၵူဝ်သေ ပၢႆႈယၢၼ်ၵႆၼၼ်ႉယဝ်ႉ။ မီးၵူၼ်းၸိူဝ်း ဢမ်ႇႁူႉပွင်ႇၵၢၼ်မိူင်းသေ ဢမ်ႇမီးတၢင်းလိူၵ်ႈ ၵွပ်ႈလူဝ်ႇၵိၼ် ၵႂႃႇပဵၼ် ဝၼ်းဝၼ်းလႄႈ ယူႇၵႂႃႇပူၼ်ႉၵႂႃႇ ၼၼ်ႉၵူၺ်း၊ ငိုၼ်းဢမ်ႇမီးၵုင်ႇမုၼ် ၼႆၼၼ်ႉဢမ်ႇၸႂ်ႈ ၵူၺ်းၵႃႈငိုၼ်းၼၼ်ႉ ပဵၼ်ၶိူင်ႈၵမ်ႉၵႅမ် ဢၼ်ၼိုင်ႈၼၼ်ႉ ၸႂ်ႈယူႇ၊ ၵူၺ်းလူဝ်ႇ ႁူႉတီႈမႃး တီႈၵႂႃႇမၼ်း ထုၵ်ႇမႅၼ်ႈ ၸင်ႇမီး ဢႃႇမၶၢမ်ႇ (ၶေႃႈႁပ်ႉႁွင်း) လႆႈ။