လူင်ပွင်ၸိုင်ႈမၢၼ်ႈ လႆႈတူၵ်းလူင်းၵိုတ်းယိုဝ်း တင်းၸုမ်းယိပ်းၵွင်ႈၵၢင် ၸၢဝ်းၶိူဝ်းလၢႆလၢႆၸုမ်း သေတႃႉၵေႃႈ ယႃႈဝႃႈဝၢၼ်ႈမိူင်း တေၵတ်းယဵၼ်မႃး ယွၼ်ႉပိူၼ်ႈသိုၵ်းမၢၼ်ႈ တိုၵ်ႉပဵၼ် ၸူၼ်ဝႆႉယူႇလႄႈ ၵူၼ်းမိူင်း လႆႈမၢႆႈၸႂ်ဝႆႉ။

မိူဝ်ႈဝၼ်းထီႉ 16-08-2012 ယၢမ်း 09:30 သိုၵ်းမၢၼ်ႈ တပ်ႉ 422/425 ဢၼ်တူင်ႉၼိုင် သၢႆလၢႆႉၶႃး ၼွင်မူဝ် ၸတ်းလုၵ်ႈၼွင်ႉၶဝ်ႁႅင်း 10 ၵေႃႉ ၵႂႃႉပႂ်ႉၸူၼ်ငိုၼ်းၵူၼ်းမိူင်း တီႈၵေႈၵၢင် ဝၢၼ်ႈလၢႆႉၶႃး လႄႈ ဝၢၼ်ႈလူင်ၶိင် ၊ၵေႃႉလႆႈသုမ်းငိုၼ်း ပဵၼ် လုင်းမူးလိင်ႇ ဢႃႇယူႉ 30 ပီႊ ယူႇဝၢၼ်ႈ တူၼ်ႈၵႅင်း ဢိူင်ႇဝၢၼ်ႈႁႅင်ႈ ဝဵင်းၼမ်ႉၸၢင် သုမ်းငိုၼ်း 120 သႅၼ် (ၼိုင်ႈပၢၵ်ႇသၢဝ်းသႅၼ်ပျႃး) လူတ်ႉၶိူင်ႈ 2 လမ်း လႅင်ႇၶၢဝ်ႇပိုၼ်ႉတီႈ သူင်ႇမႃးဝႃႈၼႆ။

မိူဝ်ႈဝၼ်းထီႉ 11-08-2012 ၼၼ်ႉ kachinnews လၢႆးငၢၼ်းဝႆႉဝႃႈ တပ်ႉသိုၵ်းမၢၼ်ႈ လႄႈ KIA ပဵၼ်ပၢင်တိုၵ်းၵၼ်ႁိမ်း ဝၢၼ်ႈၸၵႃႇပႃႇ (Sagapa) ၸႄႈဝဵင်းဝၢႆးမေႃႇ မိူင်းၶၢင်၊ ဝၢႆးပဵၼ်ပၢင်တိုၵ်းၵၼ်ယဝ်ႉ သိုၵ်းမၢၼ်ႈ ႁႅင်း 100 ၵေႃႉပၢႆ ၶဝ်ႈမႃးၼႂ်းဝၢၼ်ႈၸၵႃႇပႃႇ (Sagapa) ယၢမ်းၵၢင်ၼႂ် 9 မူင်း ႁွင်ႉၵူၼ်းဝၢၼ်ႈတင်းမူတ်း ၶင်ဝႆႉၼႂ်းႁိူၼ်း 5 လင် သွၵ်ႈတဝ်ႁႃ ၶူဝ်းၶွင်ငိုၼ်းၶမ်း ၵူၼ်းဝၢၼ်ႈၵူႈႁိူၼ်း လႆႈၵႂႃႇငိုၼ်းမွၵ်ႈ 80 သႅၼ် (ပႅတ်ႇသိပ်းသႅၼ်ပျႃး) ၸင်ႇပွတ်ႈမိူဝ်း ယၢမ်းၵၢင်ဝၼ်း 2 မူင်းဝႃႈၼႆ။

တပ်ႉသိုၵ်းလူင်ပွင်ၸိုင်ႈ ၼႆႉပဵၼ်ယၢမ်းပၢင်တိုၵ်း ၶဵင်ႈၶႅင်ႇၵၼ်တင်း KIO ဝႆႉယူႇသေ ၽၢႆႇတပ်ႉသိုၵ်းမၢၼ်ႈ ယွၼ်ႉၶဝ်ႈၼမ်ႉတၢင်းၵိၼ် ၶဝ်ၶၢတ်ႇၵႂႃႇလႄႈ လႆႈယွၼ်းၵိၼ်ၵူၼ်းဝၢၼ်ႈ၊ လႆႈပိတ်းဢဝ် ၶူဝ်းၶွင်သူၼ် ၵူၼ်းဝၢၼ်ႈၶဝ်ၼႆယူႇ။

ၵဵဝ်ႇၵပ်း ၵၢၼ်ပူၼ်ႉပႅၼ် သုၼ်ႇလႆႈၵူၼ်း ၼႆႉၸၼ်ႉၽၢႆႇ ၼိူဝ် ႁူႉယူႇသေတႃႉ ဢမ်ႇမီးလွင်ႈဢဝ်လိူင်ႈ ပၼ်တၢမ်ႇတၢင်းၽိတ်းသေ ဢမ်ႇၵႃး လႅပ်ႈၶဝ်လူင်ႉလႅင်း ၸတ်းၵၢၼ်ၵၼ်ၵႂႃႇ ၵေႃႈပဵၼ်လႆႈၼႆ လႅင်ႇၶၢဝ်ႇ ထတ်းသၢင်ႈၵႂႃႇ ၼင်ႇၼႆ။