ၸုမ်းပႃႇတီႇ ၵၢၼ်မိူင်း ႁူဝ်သိူဝ်လႄႈ သိူဝ်ၽိူၵ်ႇ တင်းၸုမ်းၵေႃလိၵ်ႈလၢႆးတႆး ၸႄႈဝဵင်းၼမ်ႉၶမ်း  မႄးၵုမ်းထိင်းၵွင်းမူး ၸဝ်ႈသိူဝ်ၽိူၵ်ႇ ဢၼ်ပဵၼ်ႈတီႈၼပ်ႉယမ်တႆးႁဝ်းမႃး ၸဵမ်မိူဝ်ႈၵွၼ်ႇၵွၼ်ႇ၊ ၸတ်းႁဵတ်းပၢင်ပွႆး ၵိုၼ်းယႂ်ႇလူင်လၢင်ၼႆ လႅင်ႇၶၢဝ်ႇၼႂ်းမိူင်း ယိုၼ်ယၢၼ်လၢတ်ႈၼႄ။

မိူဝ်ႈဝႃးဝၼ်းထီႉ 20.9.2012၊ ၶၢဝ်းယၢမ်းၵၢင်ၼႂ်ၸဝ်ႉ 5:00 မူင်း တီႈမိူင်းတႆးပွတ်းႁွင်ႇ ဝဵင်းၼမ်ႉၶမ်း ႁဵတ်းပွႆးတၢင်ႇထီးၵွင်းမူး ၸဝ်ႈသိူဝ်ၽိူၵ်ႇ ဝႃႈၼႆ။

ၵူၼ်းၶဝ်ႈႁူမ်ႈပွႆးၵေႃႉၼိုင်ႈလၢတ်ႈဝႃႈ “ ပဵၼ်ဢၼ်ၸႂ်တိုၼ်ႇတဵတ်ႈႁႅင်းတႄႉၶႃႈ မီးၵူၼ်ႈၶဝ်ႈႁူမ်ႈလူႇတၢၼ်း  (1000) ပၢႆၶႃႈဢေႃႈ၊ တႄႇဢဝ် 4:00 မူင်းၸဝ်ႉ ပွၵ်ႉၽႂ်ပွၵ်ႉမၼ်း ပႃးၵွင်မွင်းသေမႃးပႂ်ႉဝႆႉ၊ ပေႃးထိုင်ၶၢဝ်းယၢမ်းၵေႃႈ ႁပ်ႉပၢင်းဢဝ်သၢင်ႇၶၸဝ်ႈ ၼႂ်းတူင်ႇဝဵင်း 9 ၵျွင်း ၊ ၸဝ်ႈ 9 ပႃးဢွၼ်ႁူဝ်ၼမ်းၼႃႈသေ ၸုမ်းပႃႇတီႇၵၢၼ်မိူင်း တင်းသွင်ၸုမ်း ၸင်ႇပၢင်းဢဝ်ထီး တႄႇၼႂ်းၵျွင်းၸဝ်ႈၵေႃႇမိူင်း ထိုင်တီႈၵွင်းမူး ၸဝ်ႈသိူဝ်ၽိူၵ်ႇ၊ မိူဝ်ႈၶၢဝ်း တၢင်ႇထီးၼၼ်ႉ သဵင်ၵွင်မွင်း လင်ႁႅင်းဝႆႉလႄႈ ယွၼ်ႈထိုင်ႁူဝ်ၸႂ် ပေႃးသၼ်ႇဢေႃႈ” ဝႃႈၼႆ။

ၼႂ်းပၢင်ပွႆးၼၼ်ႉ ၼွၵ်ႈသေ ၸုမ်းပႃႇတီႇၵၢၼ်မိူင်းႁူဝ်သိူဝ် လႄႈသိူဝ်ၽိူၵ်ႇ၊ ယင်းလႆႈႁၼ်ပႃးထႅင်ႈ လၢႆမူႇလၢႆၸုမ်း မႃးၶဝ်ႈႁူမ်ႈ ၸုမ်းဢုပ်ႉပိူင်ႇလူင်ပွင်ၸိုင်ႈလႄႈ ၸုမ်း RCSS/SSA ၶဝ်ၵေႃႈ ၶဝ်ႈပႃး ႁူမ်ႈလူႇတၢၼ်းၸွမ်း လႆႈႁူႉၼင်ႇၼႆ။

ၶၢဝ်းယၢမ်း 8 မူင်း သၢင်ႇၶၸဝ်ႈၶဝ် ၶိုၼ်းမႃးတၢင်ႇဢၼေႇၵၸႃႇၵွင်းမူး တီႈၵွင်းမူး ၸဝ်ႈသိူဝ်ၽိူၵ်ႇ၊ ဝၢႆးသေၼၼ်ႉ ၸုမ်းသႃႇသၼႃႇၼုၵ်ႉၵႁ တင်း ၸုမ်းသၢင်ႇၶၸဝ်ႈ 9 ပႃး ႁူမ်ႈတူၵ်းလူင်း မၵ်းမၼ်ႈလႆႈၸႂ်ဝႃႈ မိူဝ်းၼႃႈမႃး မူႇလႂ်ၸုမ်းလႂ် ၸဝ်ႈၸေႇတၼႃႇလူင်ပႃးလႂ်ၵေႃႈယဝ်ႉ ပေႃးတေၶႂ်ႈမႃး မႄးၵုမ်းထိင်း လုမ်းလႃးၼႆၸိုင် တၵ်းတေလႆႈ တၢင်ႇၶိုၼ်းသီၽိူၵ်ႇၵူၺ်း ဝႃႈၼင်ႇၼႆ။