တီႈမူႇၸႄႈ ၼမ်ႉၶမ်း ငဝ်းလၢႆးဢမ်ႇပေႃးလီ ၵူၼ်းမိူင်းဢွၼ်ၵၼ်မႆႈၸႂ်

တင်ႈတႄႇၼႂ်းဝၼ်းထီႉ 07 September 2024 မႃးၼႆႉ ငဝ်းလၢႆးတီႈဝဵင်းမူႇၸႄႈ လႄႈဝဵင်းၼမ်ႉၶမ်း ဢမ်ႇပေႃးလီ ၵူၼ်းမိူင်းဢွၼ်ၵၼ်မႆႈၸႂ် ၵူဝ်ပၢင်တိုၵ်းၵိူတ်ႇၶိုၼ်ႈလႄႈ ထႅင်ႈၽၢႆႇၼိုင်ႈသမ်ႉ မႆႈၸႂ်ၵူဝ်သိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇသႂ်ႇၼႆသေ ၵူၼ်းမိူင်းၵမ်ႈၽွင်ႈဢွၼ်ၵၼ်ႁၢင်ႈႁႅၼ်း ၶူဝ်းၸႂ်ႉၸမ်ပဵၼ်ဝႆႉ ၼႆယဝ်ႉ။

ၵူၼ်းမိူင်းဝဵင်းၼမ်ႉၶမ်းၵေႃႉၼိုင်ႈ လၢတ်ႈၼႄတီႈသိုဝ်ႇၶၢဝ်ႇ တႆးလွတ်ႈလႅဝ်းဝႃႈ “ဝၢႆးလင်ၸုမ်းသိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းဝဵင်းၼမ်ႉၶမ်း မိူဝ်ႈဝၼ်းထီႈ 06 September 2024 မႃးယဝ်ႉ ႁဵတ်းႁႂ်ႈငဝ်းလၢႆးပဵၼ်မႃးထႅင်ႈမဵဝ်းၼိုင်ႈဢေႃႈ ၵူၼ်းမိူင်းတႄႉဢွၼ်ၵၼ်မႆႈၸႂ်ဝႃႈ ၵူဝ်သိုၵ်းမၢၼ်ႈ မႃးတိုၵ်းဢဝ်ၶိုၼ်းဝဵင်းၼမ်ႉၶမ်း ဢမ်ႇၼၼ်ၵူဝ်ၶဝ်မႃးပွႆႇမၢၵ်ႇသႂ်ႇထႅင်ႈၼႆသေ ၼႅတ်ႈဢွၼ်ၵၼ်ႁၢင်ႈႁႅၼ်း ၶူဝ်းၸႂ်ႉတိုဝ်းၵၼ်ဝႆႉ တႃႇတေပၢႆႈသေႃႉ သင်ဝႃႈပဵၼ်ပၢင်တိုၵ်းၶိုၼ်း ၼႆဢေႃႈ” လၢတ်ႈၼႄၼင်ႇၼႆ။

တေႃႈၼင်ႇၼၼ် ၵူၼ်းဝဵင်းမူႇၸႄႈၵေႃႉၼိုင်ႈၵေႃႈ လၢတ်ႈၼႄဝႃႈ “တီႈဝဵင်းမူႇၸႄႈႁဝ်းၶႃႈၼႆႉ ငဝ်းလၢႆးတေပဵၼ်သင်မႃးတႄႉဢမ်ႇႁူႉၶႃႈ မိူဝ်ႈသွင်ဝၼ်းပူၼ်ႉမႃးၼႆႉ ႁၼ်ၸုမ်းသိုၵ်းပျီႇတုၸိတ်ႉၶဝ်သၢၼ်ႈဝႆႉဢေႃႈ ႁဝ်းၶႃႈတႄႉမႆႈၸႂ်ၵၼ်ဝႃႈ ၵူဝ်ပိူၼ်ႈယိုဝ်းၵၼ်ၵူၺ်းယဝ်ႉ မိူဝ်ႈလဵဝ်ႈတီႈဝဵင်းမူႇၸႄႈၼႆႉ ၾႆးၽႃႉၵေႃႈမွတ်ႇဝႆႉလႄႈ ငိၼ်းဝႃႈတီႈဝဵင်းၼမ်ႉၶမ်းၵေႃႈ ၾႆးဢမ်ႇမႃးမိူၼ်ၵၼ်ၼႆၶႃႈ” လၢတ်ႈၼင်ႇၼႆ။

လၢႆလၢႆၸႄႈဝဵင်း ၼႂ်းပိုၼ်ႉတီႈဢၼ်ၸုမ်းဢူၺ်းလီၶဝ် တိုၵ်းသိမ်းၵုမ်းၵမ်ဝႆႉၼၼ်ႉ ၵႆႉလႆႈထုၵ်ႇၸုမ်းသိုၵ်းမၢၼ်ႈၶဝ် ဢဝ်ႁိူဝ်းမိၼ်ပွႆႇမၢၵ်ႇသႂ်ႇလႄႈ ၵူၼ်းမိူင်းလႆႈမၢတ်ႇၸဵပ်းလူႉတၢႆယွၼ်ႉၵေႃႈ မီးတၢင်းၼမ် ၸႄႈဝဵင်းဢၼ်ထုၵ်ႇသိုၵ်းမၢၼ်ႈၶဝ် ဢဝ်ႁိူဝ်းမိၼ်းပွႆႇမၢၵ်ႇသႂ်ႇၼၼ်ႉ တေပဵၼ်ဝဵင်းၼမ်ႉၶမ်း၊ လႃႈသဵဝ်ႈ၊ ၵူတ်ႉၶၢႆ၊ သႅၼ်ဝီ၊ လဝ်ႉၵႆႇ၊ သီႇပေႃႉ၊ ၵျွၵ်ႉမႄး ၸိူဝ်းၼႆႉ ယူႇယဝ်ႉ။

တႆးလွတ်ႈလႅဝ်း