တီႉၺွပ်းလႆႈၵူၼ်းၵႃႉၶၢႆမဝ်းၵမ်ၸွမ်း လႅၼ်လိၼ်တႃႈၶီႈလဵၵ်း လႄႈ ယႃႈမဝ်းၵမ် တင်းၼမ်

မိူဝ်ႈၼႂ်းဝၼ်းထီႉ 1 November 2024 (လိူၼ်သိပ်းသွင်မႂ်ႇ 1 ၶမ်ႈ ပီႊတႆး 2118 ၼီႈ) ပလိၵ်ႈၽၢႆႇၽဵဝ်ႈမူၺ်ႉယႃႈမဝ်းၵမ်မၢၼ်ႈ လႆႈၶဝ်ႈၵူတ်ႇထတ်းႁိူၼ်း ၸၢႆးၵႅင်း (ႁွင်ႉ) ယေးလၢၼ်း (ရဲလမ်း) ဢၼ်မီးယူႇတီႈၼႂ်း ဝၢၼ်ႈယေႇပူႇၸၢၼ်း (ရေပူစမ်း) ဢိူင်ႇလွႆတေႃႇၶမ်း ဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇၼၼ်ႉ ထူပ်းႁၼ်ၵူၼ်းပႂ်ႉႁိူၼ်း ပဵၼ် ၸၢႆးယီႈလွတ်ႈ လႄႈ ဢၢႆႈၵွင် သေ တီႉၺွပ်းလႆႈယႃႈမ 4.037 လၢၼ်ႉမဵတ်ႉ တူၵ်းမႅၼ်ႈ သၢင်ႉငိုၼ်း 3.23 ပီႇလီႇယႅၼ်ႇၵျၢတ်ႉ  ႁူမ်ႈပႃး ယႃႈဢၢႆႉသ် 202 ၵီႇလူဝ်ႇၵရမ်ႇ၊ ၽွင်ဢၢႆ Vanillin 75 ၵီႇလူဝ်ႇၵရမ်ႇ၊ ၼမ်ႉဢၢႆယႃႈ 460 လိတ်ႉ၊ ၵႃး Isuzu D-Max 1 လမ်း ၼႆယဝ်ႉ။

ၸွမ်းၼင်ႇလႆႈၸႅတ်ႈထၢမ်ၵူၼ်းပႂ်ႉႁိူၼ်းၼၼ်ႉသေ လႆႈႁူႉဝႃႈ ယႃႈမဝ်းၵမ် ဢၼ်တီႉၺွပ်းလႆႈၸိူဝ်းၼၼ်ႉ ၸဝ်ႈၶွင်ပဵၼ် ၸၢႆးၵႅင်း တင်း ဢၢၼ်းၵျေႇလူဝ်ႇ (အန်းဂျေလို) ဢၼ်ယူႇတီႈဝၢၼ်ႈႁူၺ်ႈယေး လႄႈ ဢၼ်ပဵၼ်ယႃႈမဝ်းၵမ်ၸိူဝ်းၼၼ်ႉၵေႃႈ ၶႃသွင် ၵေႃႉဢဝ်မႃးသိမ်းဝႆႉသေ ၵႃႉၶၢႆၸွမ်းလႅၼ်လိၼ် တႃႈၶီႈလဵၵ်း ဢၼ်ပဵၼ်ပိုၼ်ႉတီႈ သၢမ်ၸဵင်ႇၶမ်း တိတ်းၸပ်းၸွမ်း မိူင်းလၢဝ်း လႄႈ မိူင်းထႆး ၼၼ်ႉ ဝႃႈၼႆ။

တႆးလွတ်ႈလႅဝ်း