တွၼ်ႈသွၼ်လီလီ ဢၼ်လႆႈမႃးတီႈလွင်ႈၽိတ်းပိူင်ႈဝၼ်းလင်

ပႅၵ်ႉသမ်ႉဝႃႈ လွင်ႈၽိတ်းပိူင်ႈ ဢၼ်ႁဝ်းႁဵတ်းသေဢမ်ႇဢွင်ႇမၢၼ်ၼၼ်ႉ မၼ်းတေႁဵတ်းႁႂ်ႈႁဝ်းဢမ်ႇမီးႁႅင်းၸႂ်၊ တေတိူဝ်ႉၸႂ် လႄႈ ၽိတ်းပိူင်ႈႁႅင်းဝႃႈၼႆသေ တႃႉၵေႃႈ သင်ၸိူဝ်ႉဝႃႈ လတ်းၶၢမ်ႈပူၼ်ႉလႆႈ လွင်ႈၸိူဝ်းၼႆႉၵႂႃႇပေႃးၼႆၸိုင် ႁဝ်းတေ မီးတူဝ်ထူပ်း တွၼ်ႈသွၼ်ၼႂ်းၸၢတ်ႈပၢၼ်လႄႈ မီးပၢႆးဝူၼ်ႉလွင်ႈၽိတ်းလွင်ႈထုၵ်ႇ ယူႇတႃႇသေႇၼၼ်ႉယဝ်ႉ။ တွၼ်ႈသွၼ်ၸၢတ်ႈပၢၼ်လီလီ ဢၼ်လႆႈမႃးတီႈလွင်ႈ ၽိတ်းပိူင်ႈၼၼ်ႉ မၼ်းဢမ်ႇၸႂ်ႈဝႃႈ တေလႆႈပဵၼ်လွင်ႈတၢင်းဢၼ်ယႂ်ႇယႂ်ႇၵူၺ်း လွင်ႈလဵၵ်ႉလဵၵ်ႉ ဢၼ်ႁဝ်းထူပ်းယူႇၵူႈဝၼ်းဝၼ်းသမ်ႉ တူၺ်းဢမ်ႇမႅၼ်ႈသေ ပူၼ်ႉၶၢမ်ႈပႅတ်ႈ ထိုင်တီႈႁဝ်းပေႃးသုမ်းတိုဝ်ႉတၢင်းလီလီၵႂႃႇၼၼ်ႉယဝ်ႉ။ ၵွပ်ႈၼၼ် လႄႈ ၼႂ်းဝၼ်းမိူဝ်ႈၼႆႉ ႁဝ်းဢွၼ်ၵၼ်မႃးတူၺ်းၸွမ်းၵၼ်ဝႃႈ တွၼ်ႈသွၼ်ၸၢတ်ႈ ပၢၼ်လီလီ ပဵၼ်ၸိူင်ႉႁိုဝ် ဢၼ်ဝႃႈၼၼ်ႉယဝ်ႉ။

တွၼ်ႈသွၼ်ၸၢတ်ႈပၢၼ် 9 ၶေႃႈ

1. ၼွၼ်းလုၵ်ႉလႃႈ ပဵၼ်လွင်ႈသုမ်းတိုၼ်းလၢင်း

လၢႆၵေႃႉလၢႆၵူၼ်း တေဝူၼ်ႉဝႃႈ လွင်ႈၼွၼ်းလုၵ်ႉလႃႈၼႆႉ ပဵၼ်ၾဵင်ႈတိုၼ်းပဵၼ် မၼ်းၼႆယူႇ ၵူၺ်းၵႃႈ လွင်ႈၵၢၼ်လုၵ်ႉၸဝ်ႉလိူဝ်သေၵူၼ်းတၢင်ႇၵေႃႉၼႆႉ တေႁဵတ်းႁႂ်ႈႁဝ်းမီးၶၢဝ်းယၢမ်းဝၢင်းၽႅၼ်တေႃႇ ယိူင်းဢၢၼ်းပဝ်ႉမၢႆႁဝ်း ႁႂ်ႈဝၼ်းမၼ်းလူတ်းယွမ်းလူင်းလႆႈၼၼ်ႉယဝ်ႉ။ မၼ်းၵေႃႈမိူၼ်ၵၼ်တင်း CEO ၸၼ်ႉလုမ်ႈၾႃႉ ၸိူဝ်းၶဝ်ၼႆႉ ပႅၵ်ႉသမ်ႉဝႃႈ မီးၵၢၼ်ငၢၼ်းသုၵ်ႉယုင်ႈ မီးပၢင်ၵုမ်လႄႈ လွင်ႈတေလႆႈတႅပ်းတတ်းယႂ်ႇယႂ်ႇလူင်လူင်သေတႃႉ ၶဝ်ၵေႃႈယင်းတိုၵ်ႉၸတ်းၵၢၼ် ၵႂႃႇလႆႈလီ ယွၼ်ႉၶဝ်ၸတ်းၵၢၼ်ၶၢဝ်းယၢမ်းလႆႈလီ မိူၼ်ၼင်ႇ လုၵ်ႉၸဝ်ႉ လဵၼ်ႈဢဵၼ်ႁႅင်း၊ ၼင်ႈၵိၼ်ၵေႃႇၾီႇ၊ တူၺ်းၶၢဝ်ႇတူၺ်းငၢဝ်း ၸဵမ်ၸိူဝ်းၼႆႉ ၼၼ်ႉယဝ်ႉ။ ၵွပ်ႈၼၼ် လွင်ႈလုၵ်ႉၸဝ်ႉၼႆႉ မၼ်းတေႁဵတ်းႁႂ်ႈႁဝ်းလႆႈ ၼမ်ႉမျၢတ်ႈၼမ်ႉတွၼ်း ၼႂ်းၵၢပ်ႈပၢၼ် ဢၼ်မီးလွင်ႈလႅၵ်ႈလၢႆႈဝႆးၼၼ်ႉယူႇယဝ်ႉ။

2. ၵၢၼ်ဢွၵ်ႇၶၢဝ်းတၢင်း ပဵၼ်တွၼ်ႈသွၼ်ဢၼ်ဢမ်ႇမီးသွၼ်

ႁဝ်းတေဢွၼ်ၵၼ်ႁႃတၢင်းႁူႉ လူၺ်ႈလူလိၵ်ႈတင်းၼမ်တင်းလၢႆ ၵူၺ်းၵႃႈ ၼႂ်းၵၢၼ်တူဝ်ထူပ်း လႄႈဢွၵ်ႇၶၢဝ်းတၢင်း ႁႃတၢင်းႁူႉၼၼ်ႉ မၼ်းတေပဵၼ် ၶေႃႈတွပ်ႇ တီႈတေၽိူမ်ႉထႅမ်လွင်ႈတူၺ်းႁၼ် တၢင်းႁူႉလႄႈ လွင်ႈမေႃၾၢင်ႉသတိ မႂ်ႇမႂ်ႇ တွၼ်ႈတႃႇၼႂ်းၸၢတ်ႈပၢၼ်ၼၼ်ႉယဝ်ႉ။ လိူဝ်သေၼႆႉ ဢၼ်လွင်ႈယႂ်ႇသမ်ႉ ပဵၼ် ၼုမ်ႇၸၢႆးၼုမ်ႇယိင်းၶဝ် ၸိူဝ်းဢမ်ႇမီးလွင်ႈမႆႈၸႂ် မိူၼ်ၵူၼ်းတၢင်ႇၵေႃႉလႄႈ သမ်ႉမီးၶၢဝ်းယၢမ်းၼၼ်ႉ မၼ်းပဵၼ်တိုၼ်းလၢင်းတီႈတေလႆႈဢွၵ်ႇၵႂႃႇႁႃ တၢင်းႁူႉ မႂ်ႇမႂ်ႇ တီႈဢၼ်ၼႂ်းႁူင်းႁဵၼ်းဢမ်ႇမီးသွၼ်ၼၼ်ႉယဝ်ႉ။

3. လွင်ႈၸႂ်လမ်ငၢႆႈ ႁဵတ်းႁႂ်ႈသုမ်းၶၢဝ်းယၢမ်းၼမ်

လွင်ႈၵုမ်းထိင်းတေႃးသ လူမ်းၸႂ်လမ်ၼၼ်ႉ မၼ်းပဵၼ်ပၼ်ႁႃတွၼ်ႈတႃႇ ၵူၼ်းၵၢပ်ႈပၢၼ်မႂ်ႇ ဢၼ်လႆႈယူႇၸွမ်း Technology  ဢၼ်မီးလွင်ႈတုမ်ႉတွပ်ႇ ၶိုၼ်းယူႇတႃႇသေႇၼၼ်ႉယဝ်ႉ။ လွင်ႈတၢင်းတေႁဵတ်းႁႂ်ႈႁဝ်းမီးတေႃးသ လူမ်းၸႂ် လမ်လႆႈ ၼႂ်းၶၢဝ်းတၢင်း 1 မိၼိတ်ႉၵူၺ်း ဝႃႈၼႆသေတႃႉၵေႃႈ တွၼ်ႈတႃႇတေႁဵတ်းႁႂ်ႈ တေႃးသလူမ်းၸႂ်လမ် ယဵၼ်ၵႂႃႇႁၢႆၵႂႃႇၼၼ်ႉ တီႈဢေႇသုတ်း တေလႆႈၸႂ်ႉၶၢဝ်းယၢမ်း 6 ၸူဝ်ႈမူင်းၵမ်းလဵဝ်လႄႈ မိူဝ်ႈပဵၼ်ၸိူင်ႉၼႆ တႃႉႁဝ်းဢဝ်ၶၢဝ်းယၢမ်းဢၼ် ႁဝ်းတေၸႂ်လမ်သေ သုမ်းၶၢဝ်းယၢမ်းလၢႆလၢႆၼၼ်ႉ ၵႂႃႇႁဵတ်းသေၸိူဝ်ႉသေပိူင်ၼႆ မၼ်းတင်းတေမီးၽွၼ်းလီတႃႇႁဝ်းၼၼ်ႉယဝ်ႉ။

4. ဢမ်ႇမီးၵၢၼ်ဝၢင်းၽႅၼ်လွင်ႈငိုၼ်းတွင်းၵေႃႈ ဢမ်ႇမီးတႃႇဢွင်ႇပေႉ

ထဵင်ဢမ်ႇလႆႈဝႃႈ ႁဝ်းယူႇၼႂ်းၵၢပ်ႈပၢၼ်လူင်းတိုၼ်းလၢင်း ဢၼ်မီးသိုဝ်ႇၵၢင် ၼင်ႇ “ငိုၼ်း” ပဵၼ်ဢၼ်လွင်ႈယႂ်ႇလႄႈ ယင်းပဵၼ်ဢၼ်တေႁဵတ်းႁႂ်ႈၶိုၼ်းယႂ်ႇသေ မီးလွင်ႈမၼ်ႈၸႂ် ၼႂ်းၸၢတ်ႈပၢၼ်ၼၼ်ႉယဝ်ႉ။ ၵွပ်ႈၼၼ် ငိုၼ်းၼၼ်ႉ မၼ်းၸင်ႇပဵၼ် တီႈဢၼ်ႁဝ်းလူဝ်ႇႁႃမႃးသေ တွၼ်ႈတႃႇမႃးၸႂ်ႉၸၢႆႇ ယုၵ်ႉမုၼ်းၸၢတ်ႈပၢၼ် ႁႂ်ႈလီၶိုၼ်ႈမႃးလႄႈ သင်ၸိူဝ်ႉႁႃမႃးလႆႈၵေႃႈ လူဝ်ႇလႆႈမီးၵၢၼ်ဝၢင်းၽႅၼ်လွင်ႈငိုၼ်းတွင်း တႄႇၸဵမ် လွင်ႈၸႂ်ႉၸၢႆႇ၊ လွင်ႈၵဵပ်းႁွမ် တွၼ်ႈတႃႇတူဝ်ၸဝ်ႈၵဝ်ႇလႄႈ ၵူၼ်းၵေႃႉ တေမႃးယူႇႁိမ်းၶၢင်ႈႁဝ်းမိူဝ်ႈၼႃႈၼၼ်ႉ သေဢမ်ႇၵႃး တွၼ်ႈတႃႇဢဝ်ၵႂႃႇလူင်းတိုၼ်း ႁဵတ်းႁႂ်ႈငိုၼ်းဢွၵ်ႇယွတ်ႈမႃးထႅင်ႈ မိူၼ်ၼင်ႇ ႁဵတ်းပၢႆးမၢၵ်ႈမီးလဵၵ်ႉလဵၵ်ႉ ဢမ်ႇၼၼ် ၵႂႃႇလူင်းတိုၼ်းလၢင်းၸွမ်းပိူၼ်ႈ ပိူဝ်ႈႁႂ်ႈငိုၼ်းၼၼ်ႉ ႁဵတ်းၵၢၼ်ၵိုၵ်းၸွမ်းၶၢဝ်းယၢမ်း ဢၼ်ဢမ်ႇမီးဝၼ်းၵိုတ်းၼၼ်ႉ ၵူၺ်းၵေႃႈ ႁဝ်းတေမီးၸၢတ်ႈပၢၼ်ဢၼ်လီၶိုၼ်ႈမႃးယူႇၼႆယဝ်ႉ။

5. ၽႃႇသႃႇၵႂၢမ်းလၢတ်ႈတၢင်ႇမိူင်း ပဵၼ်ဝီႇသႃႇၸၢတ်ႈပၢၼ်

မိူဝ်ႈဢၼ်ၸႂ်ႉၽႃႇသႃႇတၢင်ႇၸိုင်ႈမိူင်းၼၼ်ႉ တေႁဵတ်းႁႂ်ႈႁဝ်း ဢမ်ႇမၼ်ႈၸႂ် ဢမ်ႇၼၼ် လီဢၢႆပိူၼ်ႈ မိူဝ်ႈလၢတ်ႈၵႂၢမ်းမိူင်းပိူၼ်ႈ ၼင်ႇၽိတ်းၽိတ်းထုၵ်ႇထုၵ်ႇ ၸွမ်းၸဝ်ႈၶွင်ၽႃႇသႃႇ ၼႆသေတႃႉၵေႃႈ ၵူၺ်းယုမ်ႇယမ်တူဝ်ၵဝ်ႇသေ ၽိုၵ်းၽွၼ်ႉၵႂႃႇၼႂ်းဝၼ်းမိူဝ်ႈၼႆႉ ပေႃးၼႆၸိုင် ပေႃးမိူဝ်းၼႃးမႃးမၼ်းတိုၼ်းတေမီး ၽွၼ်းလီ ယွၼ်ႉၽႃႇသႃႇတၢင်ႇၸိုင်ႈမိူင်းၼၼ်ႉ တေပဵၼ်သဵၼ်ႈတၢင်း တီႈဢၼ်ႁဝ်း တေလႆႈထူပ်းႁၼ်လွင်ႈတၢင်းမႂ်ႇမႂ်ႇ ထႅင်ႈတင်းၼမ်ၼၼ်ႉယဝ်ႉ။

6. ဢမ်ႇမီးလွင်ႈမၢတ်ႈမၢႆၸိုင် ပဵၼ်ၵၢၼ်လိုမ်းလွင်ႈဝၼ်းလင်ယဝ်ႉ

လွင်ႈဢမ်ႇမီးၵၢၼ်မၢတ်ႈမၢႆတွင်းဝႆႉၼၼ်ႉ မၼ်းပဵၼ်တီႈတႄႇ လွင်ႈၶီႈလူင်ၶီႈလိုမ်း ၼႂ်းၵၢၼ်ၸႂ်ႉၸၢတ်ႈပၢၼ်ယဝ်ႉ။ ဢၼ်လွင်ႈယႂ်ႇၼၼ်ႉသမ်ႉ ပဵၼ်လွင်ႈမၢတ်ႈမၢႆ လွင်ႈၸႂ်ႉၸၢႆႇ၊ ပႅၵ်ႉသမ်ႉဝႃႈ ၼႂ်းဝၼ်းမိူဝ်ႈၼႆႉ ႁဝ်းဢမ်ႇပႆႇႁၼ်ၽွၼ်းလီသေတႃႉ ၵူၺ်းၵႃႈ ၼႂ်းဝၼ်းမိူဝ်းၼႃႈ ႁဝ်းၶႂ်ႈၸႅတ်ႈတူၺ်းၵၢၼ်ၸႂ်ႉၸၢႆႇ ဢၼ်ႁၢႆၵႂႃႇၼၼ်ႉ လႄႈ လွင်ႈမၢတ်ႈမၢႆငိုၼ်းၸႂ်ႉၸၢႆႇၼႆႉ တေႁဵတ်းႁႂ်ႈႁဝ်းႁၼ်တီႈယူပ်ႈယွမ်းလွင်ႈၸႂ်ႉ ၸၢႆႇလႄႈ တီႈထုၵ်ႇလီမူၼ်ႉမႄးၼၼ်ႉယဝ်ႉ။

7. တွပ်ႇလိၵ်ႈဢမ်ႇဢွင်ႇပူၼ်ႉၸၼ်ႉၼၼ်ႉ ပဵၼ်လွင်ႈႁဵၼ်းႁူႉတီႈၽိတ်းပိူင်ႈ

လွင်ႈလူၺ်ႈတီႈႁဝ်းတွပ်ႇလိၵ်ႈဢမ်ႇဢွင်ႇပူၼ်ႉၸၼ်ႉၼၼ်ႉ မၼ်းတေပဵၼ်မႃး လွင်ႈၽိတ်းပိူင်ႈႁဝ်းၼၼ်ႉယဝ်ႉ။ ၵူၺ်းၵႃႈ ပေႃးႁဝ်းတူၺ်းထႅင်ႈၸဵင်ႇၼိုင်ႈ ၽၢႆႇၼိုင်ႈပေႃးၼႆၸိုင် မၼ်းပဵၼ်လွင်ႈပိုတ်ႇတိုဝ်ႉတၢင်းပၼ် တွၼ်ႈတႃႇႁဝ်း လႆႈလိူၵ်ႈႁဵၼ်းတီႈဢၼ်ႁဝ်းလႆႈၸႂ်ၼၼ်ႉယဝ်ႉ။ ယွၼ်ႉလွင်ႈၽိတ်းပိူင်ႈ မိူဝ်ႈပူၼ်ႉမႃးၼၼ်ႉ တေၽိူမ်ႉထႅမ်ပၼ်တူဝ်ထူပ်းပၢႆးဝူၼ်ႉႁဝ်း တွၼ်ႈတႃႇႁႂ်ႈႁပ်ႉ မိုဝ်းလႆႈၸွမ်း လွင်ႈဢၼ်ဝူၼ်ႉဢမ်ႇထိုင်သေပဵၼ်မႃး ဢမ်ႇၼၼ် လွင်ႈၽိတ်းပိူင်ႈ ၸိူဝ်းတေၵိူတ်ႇပဵၼ်ၶိုၼ်ႈမႃးၼႂ်းၸၢတ်ႈပၢၼ်ၼၼ်ႉယဝ်ႉ။

8. ပၢႆးယူႇလီဢမ်ႇၶႅမ်ႉၵေႃႈ မိူၼ်တင်းသုမ်းငိုၼ်းၶမ်း

တူဝ်ၶိင်းႁဝ်းၼႆႉ ပဵၼ်တွၼ်ႈလမ်ႇလွင်ႈလူင် ဢၼ်တေႁဵတ်းႁႂ်ႈႁဝ်း ထိုင်လႆႈတီႈယိူင်းမၢႆ ၸွမ်းၼင်ႇႁဝ်းလႆႈတမ်းယိူင်းမၢႆဝႆႉၼၼ်ႉယဝ်ႉ။ ၵွပ်ႈၼၼ် သင်ယူႇဢမ်ႇလီ ၵိၼ်ဢမ်ႇဝၢၼ် ပဵၼ်ၶႆႈပဵၼ်ၼၢဝ်မႃး ပေႃးၼႆၸိုင် ႁဝ်းတိုၼ်းတေလႆႈၼွၼ်းယူႇၼိူဝ်ၽႃႈၼိူဝ်ၵူႇ၊ ၼွၵ်ႈလိူဝ်သေ သုမ်းၶၢဝ်းယၢမ်းယူတ်းယႃတူဝ်ယဝ်ႉ မၼ်းယင်းသုမ်းပႃးငိုၼ်းၶမ်း တီႈဢၼ်ႁဝ်း ၶတ်းၸႂ်ႁဵတ်းႁႃမႃးၼၼ်ႉယဝ်ႉ။ ယွၼ်ႉၸိူင်ႉၼႆလႄႈ လွင်ႈတူၺ်းထိုင်လုမ်းလႃး ပၢႆးယူႇလီတူဝ်ၵဝ်ႇၼၼ်ႉၵေႃႈ ပဵၼ်လွင်ႈတၢင်းတီႈ ႁဝ်းတေလႆႈဢဝ်ၸႂ်သႂ်ႇ တႄႇၸဵမ် လွင်ႈၵိၼ်၊ လွင်ႈယူႇ၊ လွင်ႈၼွၼ်း လႄႈ လွင်ႈႁဵတ်းသၢင်ႈ ႁဵတ်းႁႂ်ႈမီးလွင်ႈၶိုၼ်ႈယႂ်ႇၵႂႃႇၸွမ်းၼၼ်ႉယဝ်ႉ။

9. ႁၼ်ပုၼ်ႈသုၼ်ႇတူဝ်ပဵၼ်ယႂ်ႇ မိူၼ်ပိၵ်ႉပႅတ်ႈတိုဝ်ႉတၢင်းလီ

လွင်ႈဢၼ်ႁဝ်းႁၼ်ပုၼ်ႈသုၼ်ႇတူဝ်ပဵၼ်ယႂ်ႇၼၼ်ႉ မၼ်းတေႁဵတ်းႁႂ်ႈႁဝ်း ဢမ်ႇတူၺ်းႁၼ်လႆႈ တိုဝ်ႉတၢင်းလႄႈ သဵၼ်ႈတၢင်းၸၢတ်ႈပၢၼ် တီႈတေသိုပ်ႇယၢင်ႈ ၵႂႃႇတၢင်းၼႃႈ ယွၼ်ႉမၼ်းတေၵုမ်ႇတူၺ်းပုၼ်ႈသုၼ်ႇတူဝ်ပဵၼ်ယႂ်ႇႁႅင်းပူၼ်ႉတီႈ လႄႈ ထိုင်တီႈပေႃးဢမ်ႇႁူႉၸၵ်းၶေႃႈၵႂၢမ်းဝႃႈ “လွင်ႈယိုၼ်ႈမႅင်ႇ” ၼၼ်ႉယဝ်ႉ။ လွင်ႈဢၼ်ႁဝ်းမီးလွင်ႈယိုၼ်ႈမႅင်ႇပၼ်ၵူၼ်းတၢင်ႇၵေႃႉၼၼ်ႉ ပဵၼ်တီႈတႄႇ လွင်ႈတေပဵၼ်ၵူၼ်းၵေႃႉလႆႈႁပ်ႉတိုဝ်းတၢင်းလႄႈ လွင်ႈလီလီ ၶဝ်ႈမႃးၼႂ်းၸၢတ်ႈပၢၼ် တင်းၼမ်တင်းလႆ ၼၼ်ႉယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.krungsri.com/th/plearn-plearn/10-things-you-can-learn-from-your-mistakes