တႆးမီးဝၢၼ်ႈမိူင်းယူႇ ယႃႇပၢႆႈပႅတ်ႈမိူင်း

ၸိူဝ်ႉၶိူဝ်းၵူၼ်းမိူင်းတႆးႁဝ်းမိူဝ်ႈပူၼ်ႉမႃး မီးၶုၼ်မိူင်းဢၼ်ပဵၼ်ၼိူဝ်ႉလိူတ်ႈၸိူဝ်ႉၶိူဝ်းတူဝ်ၵဝ်ႇ ဢုပ်ႉပိူင်ႇၽွင်းငမ်းလႄႈ ဝၢၼ်ႈမိူင်းၵတ်းယဵၼ်သိူဝ်းသႃႇ ဢမ်ႇမီးပႃႇ၊ ဢမ်ႇမီးၸူၼ်၊ ၵႃႉၶၢႆသင် ၵေႃႈငၢႆႈလူမ်ၸႂ် ၵႂႃႇတၢင်းၵေႃႈ ၶမ်ႈလႂ်ၼွၼ်းၼၼ်ႈ ဢမ်ႇမီးၽေး၊ ဝၢႆးသေ ၶုၼ်မိူင်းတႆးႁဝ်း ထုၵ်ႇသိုၵ်းမၢၼ်ႈတိၺွပ်းၵုမ်းၶင်ႁႅမ်တၢႆယဝ်ႉ သိုၵ်းမၢၼ်ႈၶိုၼ်ႈသိမ်းဢႃႇၼႃႇဝၢၼ်ႈမိူင်း၊ ၽူႈဢုပ်ႉပိူင်ႇ ၼိူဝ်ၸိူဝ်ႉၶိူဝ်းၵူၼ်းမိူင်းႁဝ်း ပဵၼ်ၵူၼ်းတၢင်ႇၸၢတ်ႈတၢင်ႇၶိူဝ်း ဢုပ်ႉပိူင်ႇၵူၼ်းမိူင်းႁဝ်းလႄႈ ဝၼ်းမိူဝ်ႈၼႆႉ ဝၢၼ်ႈမိူင်းသုၵ်ႉယုင်ႈ ၽူႈလၵ်ႉ၊ ၵူၼ်းၸူၼ်၊ ၵူၼ်းမိူၵ်ႈလိူင်း၊ ၽေးၵူၼ်းဝၢၼ်ႈၵူၼ်းမိူင်းႁဝ်းၵေႃႈ ၼမ်မႃးတိၵ်းတိၵ်း ဢမ်ႇယူႇယဵၼ်လႆႈ၊ ၵွပ်ႈပိူဝ်ႈၶုၼ်မိူင်း ဢမ်ႇၸိုဝ်ႈၼိူဝ်ႉလိူတ်ႈၵူၼ်းမိူင်းတႆးလႄႈ ၽႂ်တေႁၵ်ႉၵူၼ်းတႆးႁဝ်း ယဝ်ႉလႃႇ? ယူႇလၢႆလၢႆယွၼ်းသူးမုင်ႈမွင်း ႁႂ်ႈမိူင်းၵတ်းယဵၼ်ၶိုၼ်းၼၼ်ႉ မိူၼ်တင်း ၼူၵ်ႉၶုမ်ႈမွင်းႁၢင် ပၢင်တၢႆးမွင်းၼွၵ်ႇ ၵူၺ်းယဝ်ႉ တၢင်းမုင်ႈမွင်းဢၼ်ၶႂ်ႈၵတ်းယဵၼ်ၼၼ်ႉ ဢမ်ႇပဵၼ်မႃးလႆႈ။

ၵူၼ်းၸိူဝ်ႉၶိူဝ်းမိူင်းတႆးႁဝ်းႁူႉယူႇဝႃႈ သိုၵ်းမၢၼ်ႈၼၼ်ႉ ဢမ်ႇၸႂ်ႈၼိူဝ်ႉလိူတ်ႈၸိူဝ်ႉၶိူဝ်းႁဝ်း၊ မႃးႁိမ်ယူႇႁိူၼ်းယေးႁဝ်းယူႇၼၼ်ႉ ပေႃးႁဝ်းဢမ်ႇဢဝ်လၢႆးတေႃႇသူႈ တိုၵ်းၽၼ်းလမ်းယိုဝ်းၶိုၼ်း ႁဝ်းဢမ်ႇၵႅတ်ႇၶႄႁႄႉၵင်ႈၶိုၼ်းၵေႃႈ ႁဝ်းလူဝ်ႇဢွၵ်ႇႁိူၼ်းႁဝ်းသေ လူဝ်ႇပဵၼ်ၵူၼ်းဢမ်ႇမီးတီႈယူႇတီႈၵိၼ် လႄႈတီႈၽုၵ်ႇသွမ်ႈ၊ ယဵၼ်းပဵၼ်ၵူၼ်းၵၢင်လၢႆၵႂႃႇသေယဝ်ႉ၊ သင်ဝႃႈႁဝ်းၶႃႈ ႁတ်းႁၢၼ် ႁၵ်ႉသႃႁိူၼ်းႁဝ်းၼႆၸိုင် ႁဝ်းတေလႆႈၽွမ်ႉၵၼ်ႁႃၵူႈလွၵ်းလၢႆးသေ ၵႅတ်ႇၶႄႁႄႉၵင်ႈ ယႃႇႁႂ်ႈႁိူၼ်းႁဝ်း ပဵၼ်ႁိူၼ်းပိူၼ်ႈ ၼၼ်ႉယဝ်ႉ၊ သူၼ်ႁႆႈၼႃးႁဝ်း ယႃႇႁႂ်ႈပဵၼ်ၶွင်ပိူၼ်ႈ ႁူႉတေလႆႈတိုၵ်းတေႃးၵႅတ်ႇၶႄ ၸင်ႇတေလႆႈယဝ်ႉ။

ဝၼ်းမိူဝ်ႈၼႆႉ တႃႇႁဝ်းတေလႆႈၶိုၼ်းမိူင်းတႆးႁဝ်းၼၼ်ႉ ဢဝ်လၢႆးၵတ်းယဵၼ်သေ တိုၵ်းမႃးၵေႃႈမီးမႃးၼမ်ယဝ်ႉ ၵူၺ်းၵႃႈ တၢင်းမုင်ႈမွင်း ဢၼ်ၵူၼ်းၼႂ်းမိူင်းတႆးႁဝ်းၶႂ်ႈလႆႈၼၼ်ႉ ဢမ်ႇပဵၼ်မႃးၼင်ႇၵၢင်ၸႂ် ၽူႈၶဵၼ်ဢမ်ႇတွၼ်ႉဢူၼ်ႈဢွၼ်ႇ ယွမ်းတေႃႇၸိူဝ်ႉၶိူဝ်းႁဝ်း ၸိူဝ်ႉၶိူဝ်းႁဝ်းၵူၺ်း ပဵၼ်ၽၢႆႇဢူၼ်ႈဢွၼ်ႇယွမ်းတေႃႇၽူႈၶဵၼ် တီႈၼႆႈၵူၼ်းၸိူဝ်ႉၶိူဝ်းတႆးႁဝ်းမီးတႃႁၼ်တူဝ်ထူပ်းမႃးၼမ်ၼႃႇယဝ်ႉ ၸႂ်ႁၵ်ႉၶိူဝ်းဢၼ်ဝႃႈၼၼ်ႉ လူဝ်ႇတူၺ်းဢဝ် လၢႆးႁဵတ်းတီႈၽူႈၶဵၼ်ႁဵတ်းတေႃႇၵူၼ်းမိူင်းႁဝ်း ပေႃးၽူႈၶဵၼ်ၶႅင်တေႃႇႁဝ်းၵေႃႈ ႁဝ်းၵေႃႈလူဝ်ႇၶႅင်ၶိုၼ်းတေႃႇၽူႈၶဵၼ်၊ ပေႃးၽူႈၶဵၼ်ႁဵတ်းသိုၵ်း တေႃႇႁဝ်းၵေႃႈ ႁဝ်းလူဝ်ႇမီးၸႂ် ႁတ်းႁတ်းႁၢၼ်ႁၢၼ်သေလႄႈ ၶဝ်ႈပွႆးတိုၵ်ႉတေႃႇၽူႈၶဵၼ်၊ ပေႃးၽူႈၶဵၼ်လွၵ်ႇႁဝ်း ႁဝ်းသမ်ႉၵူဝ်သေ ဢဝ်တူဝ်လွတ်ႈႁင်းၽႂ်ႁင်းမၼ်းယူႇၼႆၸိုင် တင်းၵတ်းယဵၼ်လႄႈ လွင်ႈမၢၵ်ႈမီးတႃႇပုၼ်ႈၸိူဝ်ႉၶိူဝ်းလႄႈတူဝ်ၵဝ်ႇ ဢၼ်ဝႃႈၼၼ်ႉ ဢမ်ႇၸၢင်ႈထိုင်ၼႂ်းတူဝ်ၸိူဝ်ႉၶိူဝ်းႁဝ်းလႆႈသေပွၵ်ႈယဝ်ႉ။

လွင်ႈၸႂ်ႁၵ်ႉၶိူဝ်းလႄႈႁၵ်ႉၽႅၼ်ႇလိၼ်ဝၢၼ်ႈမိူင်း ဢၼ်ဝႃႈၼႆႉ ႁဝ်းလီယိူင်ႈမိူၼ်ၸၢဝ်းၶိူဝ်းၵျူး (Jewish) ၶဝ်၊ ၵၢၼ်မိူင်းၵျူး (Jewish) ၶဝ်မီးဝႆႉ ပေႃႇလသီႇ (2) ဢၼ်။

1. ၸိူဝ်ႉၶိူဝ်းၵျူး (jewish) ၼႆႉ ၵႂႃႇမီးၸွၵ်ႉလႂ် ၸဵင်ႇလႂ် မိူင်းလႂ်ၵေႃႈ ႁႂ်ႈၶဝ်ႈမႃး ၵွင်ယူႇသႂ်ႇ ၼိူဝ်ၽႅၼ်ႇလိၼ်ပႃႇလႅတ်ႉတၢႆးသေ မႃးၽွမ်ႉႁူမ်ႈၵၼ် ၵႅတ်ႇၶႄလိၼ်တီႈၽုၵ်ႇသွမ်ႈ ပုၼ်ႈတႃႇတေယူႇၵႂႃႇၶၢဝ်းတၢင်းမိူဝ်းၼႃႈ။
2. ၸၢဝ်းၶိူဝ်းၵျူး (jewish) ၶဝ် ဢၼ်မီးယူႇ တၢင်ႇဝၢၼ်ႈတၢင်ႇမိူင်းၼၼ်ႉ ႁႂ်ႈၽွမ်ႉၵၼ်ႁႃ ငိုၼ်းၵွင်ၵၢင်ၸွႆႈထႅမ်ၵူၼ်း ၸိူဝ်းယူႇၼႃႈသိုၵ်း ဢၼ်တိုၵ်းတင်းဢႃႇရၢပ်ႉၶဝ်ၼၼ်ႉယူႇ။

ပေႃႇလသီႇသိုၵ်းၶဝ်မီးဝႆႉ (2) ဢၼ်

1. ၽိူဝ်ႇႁဝ်းတေဢမ်ႇမီးၽႅၼ်ႇလိၼ်ယူႇ ၽိူဝ်ႇတႃႉႁဝ်း ၶဝ်ႈပွႆးတိုၵ်းတၢႆပႅတ်ႈတင်းၶိူဝ်း ယင်းတေလီ။
2. ၽူႈဢွၼ်ႁူဝ်သိုၵ်းလႄႈတင်းၵူၼ်းသိုၵ်း မီးၸႂ်ႁၵ်ႉၵၼ် မိူၼ်ပီႈလႄႈၼွင်ႉ မိူၼ်တႆးၵေႃႉ၊ ပေႃးပဵၼ်ပၢင်တိုၵ်းမႃး ၽူႈဢွၼ်ႁူဝ် ဢမ်ႇလူဝ်ႇယူႇတၢင်းလင် ဢီးလုၵ်ႈၼွင်ႉၶိုၼ်ႈတၢင်းၼႃႈ၊ ၽူႈဢွၼ်ႁူဝ်ၼႆႉ လူဝ်ႇႁွင်ႉလၢတ်ႈဝႃႈ ၶိုၼ်ႈမႃးၸွမ်းၵဝ်လႄႈ ၼႆၼၼ်ႉယဝ်ႉ။

ၸိူဝ်ႉၶိူဝ်းတႆးႁဝ်းဝၼ်းမိူဝ်ႈၼႆႉ ဢမ်ႇမိူၼ်ၸၢဝ်းၶိူဝ်းၵျူးၶဝ် ႁဝ်းမီးၽႅၼ်ႇလိၼ်ဝႆႉယူႇ၊ ၵူၼ်းမိူင်းႁဝ်းသမ်ႉပၢႆႈပႅတ်ႈၽႅၼ်ႇလိၼ်၊ ၵျူးၶဝ်ၼႆႉ ဢမ်ႇမီးၽႅၼ်ႇလိၼ် ၶဝ်ယင်းႁႃၽွမ်ႉၵၼ် ႁႂ်ႈမီးၽႅၼ်ႇလိၼ်၊ တႆးႁဝ်းသမ်ႉ မီးၽႅၼ်ႇလိၼ် သမ်ႉပၢႆႈပႅတ်ႈ ၽႅၼ်ႇလိၼ်၊ သမ်ႉယုမ်ႇၶိူဝ်းပိူၼ်ႈၼမ်သေ ၶိူဝ်းတူဝ်ၵဝ်ႇ၊ မီးၼမ်ႉၸႂ်ပိုင်ႈဢိင်ပိူၼ်ႈ ၼမ်သေပိုင်ႈဢိင်တူဝ်ၵဝ်ႇ၊ ပေႃးပိူၼ်ႈမႃးပၼ်ၽေး ဢမ်ႇမေႃၽွမ်ႉၵၼ်ၵႅတ်ႇၶႄ မေႃၸူဝ်းၵၼ်ပၢႆႈသေ သႄႉၼႄးၵၼ်ၶိုၼ်းၵူၺ်း၊ ၸိူဝ်ႉၶိူဝ်းတႆးႁဝ်း ၵိုင်ႇလီမူၼ်ႉမႄး တူဝ်ၽႂ်မၼ်း ႁႂ်ႈမီးၸႂ်ႁၵ်ႉၶိူဝ်းၶိုၼ်းမႂ်ႇတႄႉတႄႉ။

ၽူႈဢွၼ်ႁူဝ်လီ တႃႇၸိူဝ်ႉၶိူဝ်း ဢၼ်ဝႃႈၼၼ်ႉ ဝၼ်းမိူဝ်ႈၼႆႉ မီးယူႇၼိူဝ်ႁူဝ်ၸဝ်ႈၵဝ်ႇလႄႈ ၼႂ်းၸိူဝ်ႉၶိူဝ်းၸဝ်ႈၵဝ်ႇၵူၺ်း၊ ၸဝ်ႈၵဝ်ႇၵေႃႈ မီးသုၼ်ႇတႃႇတေဢွၼ်ႁူဝ် ၼမ်းၼႃႈပိူၼ်ႈလႆႈယူႇ၊ ပေႃးဢမ်ႇဢွၼ်ႁူဝ်လႆႈၵေႃႈ ၸဝ်ႈၵဝ်ႇမီးသုၼ်ႇတႃႇပဵၼ် လုၵ်ႈၼွင်ႉလီလႆႈယူႇ။

ပၢႆၵမ် – လႅဝ်းၽၼ်းမိူင်း

ဢဝ်မႃး ၼႂ်းပပ်ႉတႆးလွတ်ႈလႅဝ်း မၢႆ (1) လိူၼ်သီႇ ပီႊတႆး 2103 (လိူၼ်မၢတ်ႉၶျ် ပီႊ 2009)