ပလိၵ်ႈထႆး တီႉၺွပ်းလႆႈယႃႈမႃႉ 4 သႅၼ်မဵတ်ႉ

ပလိၵ်ႈထႆး လႄႈ ၽၢႆႇၽဵဝ်ႈမူၺ်ႉယႃႈမဝ်းၵမ် တီႉၺွပ်းလႆႈယႃႈမႃႉ 4 သႅၼ်မဵတ်ႉ ဢၼ်မီးသၢင်ႉငိုၼ်းထႆး 12 လၢၼ်ႉဝၢတ်ႇ တီႈၼႂ်းၸႄႈတွၼ်ႈသူင်ၶလႃ ၸိုင်ႈထႆး ဝႃႈၼႆ။

မိူဝ်ႈဝၼ်းထီႉ 27 November 2022 (လိူၼ်ၸဵင်မႂ်ႇ 5 ၶမ်ႈ ပီႊတႆး 2117 ၼီႈ) ပလိၵ်ႈထႆး၊ ၽၢႆႇၽဵဝ်ႈမူၺ်ႉယႃႈမဝ်းၵမ်း လႄႈ ပလိၵ်ႈၽၢႆႇၵူတ်ႇထတ်း တီႈၼႂ်းၸႄႈတွၼ်ႈ သူင်ၶလႃ ဢိၵ်ႇတင်း ၽူႈမီးပုၼ်ႈၽွၼ်းလၢႆလၢႆၽၢႆႇ လႆႈၶဝ်ႈၵူတ်ႇထတ်း တီႈၼႂ်းႁွင်ႈၶၢတ်ႈ ဢၼ်မီးၼႂ်းဢိူင်ႇမႄႈထွမ်း ၸႄႈဝဵင်းပၢင်းၵလမ်ႇ ၸႄႈတွၼ်ႈသူင်ၶလႃသေ ၵူတ်ႇထတ်းတီႉၺွပ်းလႆႈယႃႈမႃႉ 4 သႅၼ်မဵတ်ႉ မီးၵႃႈၶၼ်သၢင်ႉငိုၼ်းထႆး 12 လၢၼ်ႉဝၢတ်ႇ ဢၼ်သႂ်ႇဝႆႉၼႂ်းတိူၵ်ႈသူင်ႇၶူဝ်း 2 တိူၵ်ႈ၊ ၼိုင်ႈတိူၵ်ႈလႂ်မီး 100 ႁေႃႇလႄႈ တီႉၺွပ်းလႆႈပႃးၵူၼ်းတေႃႉသူင်ႇ ၽူႈၸၢႆး ဢႃႇယု 27 ပီႊ ဢိၵ်ႇတင်း ၵႃးၼိုင်ႈလမ်း ဝႃႈၼႆ။

ၸွမ်းၼင်ႇလွင်ႈၸႅတ်ႈထၢမ်သေ ၵူၼ်းတေႃႉသူင်ႇယႃႈမဝ်းၵမ် လႆႈယွမ်းႁပ်ႉဝႃႈ မိူဝ်ႈဝူင်ႈပူၼ်ႉမႃး လႆႈၵပ်းသိုပ်ႇၸွမ်း ၽူႈၸၢႆးၵေႃႈၼိုင်ႈ ၸိုဝ်ႈ ဢေႉ ဢမ်ႇႁပ်ႉႁူႉၸိုဝ်ႈတေႉလႄႈ ၵပ်းသိုပ်ႇၵၼ်တၢင်းလၢႆး(Line) ႁႂ်ႈၵႂႃႇႁပ်ႉယႃႈမႃႉ 4 တိူၵ်ႈသေ ၼႂ်းၼၼ်ႉမီးယႃႈမႃႉယူႇ 8 သႅၼ်မဵတ်ႉ ဢၼ်သူင်ႇၵႂႃႇၸွမ်း ၶွမ်ႇပၼီႇႁပ်ႉသူင်ႇၶူဝ်းတီႈၼိုင်ႈ ဢၼ်မီးၼႂ်းၸႄႈဝဵင်းႁၢတ်ႇယႂ်ႇလႄႈ လႆႈႁွင်ႉဢူၺ်းၵေႃႉထႅင်ႈၵေႃႉၼိုင်ႈသေ ၵႂႃႇတေႃႉမႃးဝႆႉတီႈႁွင်ႈၶၢတ်ႈၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉယဝ်ႉ ၼႂ်းဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ လႆႈႁပ်ႉၶေႃႈသင်ႇ ႁႂ်ႈၵႂႃႇသူင်ႇယႃႈမႃႉ 2 တိူၵ်ႈ ဢၼ်မီးၵႃႈၶၼ် 4 သႅၼ်ဝၢတ်ႇ သူင်ႇပၼ်တီႈၼႂ်းဢိူင်ႇ ဝၢၼ်ႈႁၢၼ် ၸႄႈဝဵင်းပၢင်းၵလမ်ႇ ၸႄႈတွၼ်ႈသူင်ၶလႃ ဢွၼ်တၢင်းတေထုၵ်ႇ တီႉၺွပ်းလႆႈ ၼႆယဝ်ႉ။

မၼ်းၸၢႆးသိုပ်ႇလၢတ်ႈထႅင်ႈဝႃႈ လႆႈလၵ်ႉလွမ်ဢဝ်ယႃႈမႃႉ မႃးဝႆႉၼႂ်းႁွင်ႈၶၢတ်ႈၼႆႉ 15 ပွၵ်ႈယဝ်ႉလႄႈ ၼိုင်ႈပွၵ်ႈလႂ် 2 သႅၼ်မဵတ်ႉသေ လႆႈငိုၼ်းၵႃႈၸၢင်ႈၼိုင်ႈပွၵ်ႈ 2 မိုၼ်ႇဝၢတ်ႇ ဝႃႈၼႆ။ ၽၢႆႇတၢင်းၽူႈမီးပုၼ်ႈၽွၼ်းၶဝ်ၵေႃႈ တေၼႅတ်ႈၵူတ်ႇထတ်း ၽူႈၸိူဝ်းဢၼ်ၵဵဝ်ႇၶွင်ႈ ၼႂ်းၵၢၼ်တေႃႉသူင်ႇယႃႈမဝ်းၵမ်းပွၵ်ႈၼႆႉၵႂႃႇ ဝႃႈၼႆ။

တႆးလွတ်ႈလႅဝ်း