ပလိၵ်ႈထႆး ၸႂ်ႉ AI ၵူတ်ႇထတ်းတီႉၺွပ်းၵူၼ်းတေႃႉသူင်ႇယႃႈမဝ်းၵမ်

ၸဝ်ႈၼႃႈတီႈပလိၵ်ႈထႆး လႆႈၸႂ်ႉတိုဝ်း AI ၵူတ်ႇထတ်းၸွမ်းတီႉၺွပ်း ၵူၼ်းတေႃႉ သူင်ႇယႃႈမဝ်းၵမ် ဢၼ်ၸဝ်ႈၶွင်ပဵၼ်ၵူၼ်းထႆး ပၢႆႈလွတ်ႈယူႇဝႆႉၼႂ်းမိူင်းတႆးၼၼ်ႉ ၼႆယဝ်ႉ။

မိူဝ်ႈဝၼ်းထီႉ 7 August 2024 (လိူၼ်ၵဝ်ႈမႂ်ႇ 3 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်း ပလိၵ်ႈထႆး လႄႈ ၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ ႁူမ်ႈၵၼ်သပ်းၸႅင်ႈၶၢဝ်ႇ ၵဵဝ်ႇလူၺ်ႈလွင်ႈတီႉၺွပ်းလႆႈ ယႃႈဢၢႆႉသ် 452 ၵီႇလူဝ်ႇၵရမ်ႇ၊ ၵႃး 7 လမ်း လႄႈ ၵူၼ်းတေႃႉသူင်ႇ 8 ၵေႃႉ ဝႃႈၼႆ။

လွင်ႈၼႆႉၵေႃႈ လႆႈမီးမႃးဝၢႆးသေ မိူဝ်ႈဝၼ်းထီႉ 31 July 2024 ၼၼ်ႉ ပလိၵ်ႈထႆး တီႉၺွပ်းလႆႈယႃႈဢၢႆႉသ် 150 ၵီႇလူဝ်ႇၵရမ်ႇ၊ ၵႃးဢွၼ်ႇ 1 လမ်း၊ ၵႃးႁူၵ်းလေႃႉ 1 လမ်း လႄႈ ၵူၼ်းတေႃႉသူင်ႇ 3 ၵေႃႉ တီႈၼႂ်းၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆးယဝ်ႉ ၽၢႆႇတၢင်းပလိၵ်ႈထႆး ၸင်ႇလႆႈၸႂ်ႉတိုဝ်း AI မႄႇၶႂၢၵ်ႈၵူတ်ႇထတ်းၸွမ်းၵႃးသေ ထူပ်းႁၼ်ၵႃးဢၼ်ပဵၼ်ၸုမ်းလဵဝ်ၵၼ် လႄႈ  ၸင်ႇလႆႈတင်ႈလၢၼ်ႇၵူတ်ႇထတ်း တီႉၺွပ်းလႆႈတင်းၸုမ်း ၼႆယူႇယဝ်ႉ။

ယႃႈဢၢႆႉသ်ဢၼ်တီႉၺွပ်းလႆႈၼႆႉ ႁူမ်ႈတင်းမူတ်း 602 ၵီႇလူဝ်ႇၵရမ်ႇ ဢၼ်ပဵၼ် ၸဝ်ႈၶွင်ယႃႈမဝ်းၵမ်သေ ယူႇၽၢႆႇလင်ၽႅၼ်ၵၢၼ်ၼႆႉ ပဵၼ်ၵူၼ်းထႆး ၸိုဝ်ႈႁွင်ႉ “ၵဵၵ်ႇၵသိတ်ႇ” ဢၼ်ထုၵ်ႇလူင်ပွင်ၸိုင်ႈထႆး ဢွၵ်ႇလိၵ်ႈတီႉၺွပ်းသေ ပၢႆႈလွတ်ႈယူႇဝႆႉၼႂ်းမိူင်းတႆး ဝႃႈၼႆ။

တေႃႈၼင်ႇၼၼ် မိူဝ်ႈၼႂ်းဝၼ်းထီႉ 7 August 2024 ၼၼ်ႉၵူၺ်းၼင်ႇၵဝ်ႇ သိုၵ်းထႆး ဢၼ်ဢွၵ်ႇလဵပ်ႈယၢမ်းၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈဝၢၼ်ႈၼွင်တဝ်ႇ ပွၵ်ႉ 10 ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈဝဵင်းၵဵင်းမႆႇၼၼ်ႉ လႆႈမီးလွင်ႈပိုတ်းယိုဝ်းၸွမ်းၵူၼ်းတေႃႉသူင်ႇယႃႈမဝ်းၵမ် မွၵ်ႈ 5 မိၼိတ်ႉၼႆႉသေ ၵူတ်ႇထတ်းတီႉၺွပ်းလႆႈ ယႃႈမ 130,000 မဵတ်ႉ ၵူၼ်းတေႃႉသူင်ႇတႄႉ ပၢႆႈလွတ်ႈၵႂႃႇလႆႈ ၼႆယူႇယဝ်ႉ။

တႄႇဢဝ်မိူဝ်ႈၼႂ်းလိူၼ် October 2023 တေႃႇထိုင် ၼႂ်းဝၼ်းထီႉ 7 August 2024 ၼႆႉ ၽၢႆႇတၢင်းသိုၵ်းထႆး တီႉၺွပ်းလႆႈယႃႈမဝ်းၵမ် ႁူမ်ႈတင်းမူတ်း 390 ပွၵ်ႈ၊ တီႉၺွပ်းလႆႈ ၵူၼ်းဢၼ်ၵဵဝ်ႇၶွင်ႈ 415 ၵေႃႉ၊ ယႃႈမ 171.8 လၢၼ်ႉမဵတ်ႉ၊ ယႃႈၾိၼ်ႇၽိူၵ်ႇ 256.9 ၵီႇလူဝ်ႇၵရမ်ႇ၊ ယႃႈဢၢႆႉသ် 1,363.3 ၵီႇလူဝ်ႇၵရမ်ႇ၊ ယႃႈလမ် 181.1 ၵီႇလူဝ်ႇၵရမ်ႇ၊ Ketamine 29.2 ၵီႇလူဝ်ႇၵရမ်ႇ၊ မီးလွင်ႈပိုတ်းယိုဝ်းၸွမ်းၵူၼ်းတေႃႉသူင်ႇယႃႈ 43 ပွၵ်ႈ  ၵူၼ်းတေႃႉသူင်ႇယႃႈတၢႆ 29 ၵေႃႉ လႄႈ သင်ၸိူဝ်ႉယႃႈမဝ်းၵမ်ၸိူဝ်းၼႆႉ လွတ်ႈပူၼ်ႉ ၶဝ်ႈၵႂႃႇထိုင်ၼႂ်းဝဵင်းလူင်မိူင်းၵွၵ်ႇ ၸိုင်ႈထႆး ၼႆၸိုင် တေတုမ်ႉတိူဝ်ႉတေႃႇပၢႆးမၢၵ်ႇမီး ပဵၼ်သၢင်ႉငိုၼ်း 27,439 လၢၼ်ႉဝၢတ်ႇ ၼႆယဝ်ႉ။

တႆးလွတ်ႈလႅဝ်း