မၢၵ်ႇတူၵ်းတႅၵ်ႇသႂ်ႇၵူၼ်းမိူင်းၼမ်ႉလၼ်ႈ 2 ၵေႃႉ

မိူဝ်ႈဝၼ်းထီႉ 23 November 2024 (လိူၼ်သိပ်းသွင်လွင်ႈ 8 ၶမ်ႈ ပီႊတႆး 2118 ၼီႈ) ယၢမ်းၵၢင်ဝၼ်း 11:00 မူင်းပၢႆၼၼ်ႉ မီးမၢၵ်ႇလူင်ၶွင်ၸုမ်းယိပ်းၵွင်ႈၵၢင်ႇ ၵႂႃႇတူၵ်းတႅၵ်ႇတီႈၼႂ်းဝဵင်းၼမ်ႉလၼ်ႈ လႄႈ မီးၵူၼ်းမိူင်းမၢတ်ႇၸဵပ်း 2 ၵေႃႉၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မၢၵ်ႇၼႆႉပဵၼ်မၢၵ်ႇၶွင်ၸုမ်းသိုၵ်းၵူဝ်းၵၢင်ႉ MNDAA ဢၼ်ယူႇၽၢႆႇႁွင်ႇဝဵင်းၼမ်ႉလၼ်ႈ ယိုဝ်းသႂ်ႇသိုၵ်းမၢၼ်ႈ 3 လုၵ်ႈ တႃႇ 2 လုၵ်ႈ တူၵ်းသႂ်ႇတီႈၼႂ်းပွၵ်ႉယူင်ႇၸၢၵ်ႈ၊ ထႅင်ႈလုၵ်ႈၼိုင်ႈ တူၵ်းသႂ်ႇတီႈ ၼႂ်းပွၵ်ႉၵွင်းလၢင်း လႄႈ တိူဝ်ႉၸပ်းႁိူၼ်း မႄႈထဝ်ႈသႅင် ဢႃႇယု 70 ပၢႆ ယွၼ်ႉၸၢၵ်ႇမၢၵ်ႇသေ မီးၵူၼ်းမိူင်းလႆႈမၢတ်ႇၸဵပ်း 2 ၵေႃႉၶႃႈဢေႃႈ၊ တူဝ်မႄႈထဝ်ႈသႅင်လႄႈၼၢင်းယိင်း ထႅင်ႈၵေႃႉၼိုင်ႈၼၼ်ႉ ၵူၼ်းႁိမ်းႁွမ်းၸွႆႈဢဝ်သူင်ႇယူတ်းယႃတူဝ်ဝႆႉတီႈ ႁူင်းယႃယဝ်ႉ ဝႃႈၼႆ။

ယွၼ်ႉပၢင်တိုၵ်းလႄႈ ၵူၼ်းၽိူၵ်ႇၸိုၼ်ႈၶၢဝ်သႂ် လႆႈမၢတ်ႇၸဵပ်းတၢႆ တင်းၼမ်သေဢမ်ႇၵႃး ၶူဝ်းႁိူၼ်းၶူဝ်းယေးၵူၼ်းမိူင်းၵေႃႈ လႆႈလူႉသုမ်းၵွႆ တင်းၼမ်မိူၼ်ၵၼ်လႄႈ ဢမ်ႇမီးသိုၵ်းၸုမ်းလႂ်ႁပ်ႉဢဝ်ပုၼ်ႈၽွၼ်း သၢႆႈတႅၼ်းပၼ် ၵူၼ်းမိူင်းၶိုၼ်း  ၼႆယဝ်ႉ။

တႆးလွတ်ႈလႅဝ်း