လူမ်းလႅင်ႉလူင် တေၽတ်ႉၶဝ်ႈမႃးထႅင်ႈ ၼႂ်းၶၢဝ်းတၢင်းလၢႆဝၼ်း ဢၼ်တေထိုင်မႃး

မိူဝ်ႈဝၼ်းထီႉ 17 September 2024 ( လိူၼ်သိပ်းမူၼ်း ပီႊတႆး 2118 ၼီႈ ) ၼၼ်ႉ ၽူႈၶူၼ်ႉၶႂႃႉၶဝ်ထူပ်းႁၼ်ဝႃႈ လူမ်းလႅင်ႉ Depression ႁိမ်းပၢင်ႇလၢႆႇၶႄႇပွတ်းၸၢၼ်းၼၼ်ႉ မီးတၢင်းဝႆးႁႅင်းသုတ်း 56 ၵီႇလူဝ်ႇမီႇတိူဝ်ႇတေႃႇၸူဝ်ႈမူင်း လႄႈ လူမ်းလႅင်ႉၼႆႉ တေၶၢႆႉၵႂႃႇတၢင်းပွတ်းဝၼ်းတူၵ်း လူၺ်ႈႁႅင်းဝႆးမွၵ်ႈ 3 ၵီႇလူဝ်ႇမီႇတိူဝ်ႇတေႃႇၸူဝ်ႈမူင်းသေ တေၸၢင်ႈႁႅင်းၶိုၼ်ႈပဵၼ်လူမ်းလႅင်ႉလူင်မႃးလႆႈ ဝႃႈၼႆ။

လၢမ်းၶၢတ်ႈဝႃႈ ၼႂ်းဝၼ်းထီႉ 17−19 September ၼႆႉ  တေယူႇဝႆႉၼႂ်းပၢင်ႇလၢႆႇၶႄႇပွတ်းၸၢၼ်းသေ ဝၢႆးသေၼၼ်ႉ ဝၼ်းထီႉ 20−21 September 2024 ၼႆႉ တေၶၢႆႉၵႂႃႇတၢင်းမိူင်းဝႅတ်ႉၼၢမ်းသေ တေလူတ်းႁႅင်းလူမ်းၵႂႃႇၸွမ်းၶၵ်ႉ ယူႇယဝ်ႉ။

သမ်ႉဝႃႈႁႅင်းလူမ်းလႅင်ႉ Depression ဢမ်ႇႁႅင်းတၢၼ်ႇ လူမ်းလႅင်ႉလူင် YAGI ဢၼ်ၶဝ်ႈမႃး ၼႂ်းဝူင်ႈပူၼ်ႉၼၼ်ႉသေတႃႉ ၼႂ်းမိူင်းတႆးၵေႃႈ ၾူၼ်တေၸၢင်ႈတူၵ်းႁႅင်းယူႇလႄႈ ၵွပ်ႈၼၼ် လူဝ်ႇလႆႈၾၢင်ႉသတိၵၼ်ၵႂႃႇ ယူႇယဝ်ႉ။

တႆးလွတ်ႈလႅဝ်း