လူမ်းလႅင်ႉႁႅင်းဢူၼ်ႈဢွၼ်ႇၵႂႃႇယဝ်ႉသေတႃႉ တိုၵ်ႉတေလႆႈၾၢင်ႉဝႆႉထႅင်ႈယူႇ

မိူဝ်ႈၼႆႉဝၼ်းထီႉ 23 March 2022 (လိူၼ်သီႇလွင်ႈ 7 ၶမ်ႈ ပီႊတႆး 2116 ၼီႈ) ႁွင်ႈၵၢၼ်ၾိင်ႈၾႃႉရႃႇသီႇ မိူင်းႁူမ်ႈတုမ် ပိုၼ်ၽၢဝ်ႇဝႆႉဝႃႈ လူမ်းလႅင်ႉဢၼ်ၽတ်ႉၶဝ်ႈမိူင်းၼၼ်ႉ ႁႅင်းဢူၼ်ႈဢွၼ်ႇလူင်းၵႂႃႇၽွင်ႈယဝ်ႉ၊ ၵူၺ်းၵႃႈ တေႃႇထိုင်မိူဝ်ႈၼႆႉ ၾူၼ်ယင်းတေတူၵ်းႁႅင်းထႅင်ႈ လၢႆလၢႆပိုၼ်ႉတီႈယူႇ ၼႆယဝ်ႉ။

မိူဝ်ႈဝႃးဝၼ်းထီႉ 22 March 2022 တႄႇယၢမ်းဝၢႆးဝၼ်းၼၼ်ႉတႄႉ လူမ်းလႅင်ႉ ထူဝ်းပဝ်ႇၽတ်ႉႁႅင်း၊ ႁူမ်ႈပႃးၾူၼ်တူၵ်းႁႃႇယႂ်ႇ ႁဵတ်းႁႂ်ႈၼမ်ႉထူမ်ႈႁိူၼ်းယေး ၵမ်ႈၽွင်ႈ လူႉၵွႆပႃးၵႂႃႇၸွမ်းလူမ်း တီႈတိူင်းဢေႇရႃႇဝတီႇ ၸွမ်းပိုၼ်ႉတီႈ ၽင်ႇပၢင်ႇလၢႆႇလႄႈ ၵူၼ်းမိူင်း လႆႈၶၢႆႉပၢႆႈ ယူႇဝႆႉဢွင်ႈတီႈလွတ်ႈၽေး ၼႆယဝ်ႉ။

ၸွမ်းၼင်ႇႁွင်ႈၵၢၼ်ၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉၼၼ်ႉ တေႃႇထိုင်မိူဝ်ႈၼႆႉ ၵၢင်ၶမ်ႈ ၸွမ်းပိုၼ်ႉတီႈ မိူင်းတႆး၊ မိူင်းရၶႅင်ႇ၊ တိူင်းတႃႈၵုင်ႈ၊ တိူင်းမၢၼ်းတလေး (မၢင်ပိုၼ်ႉတီႈ)၊ တိူင်းပႃႇၵိူဝ် လႄႈ တိူင်းဢေႇရႃႇဝတီႇၸိူဝ်းၼႆႉ ၾူၼ်တေတူၵ်း ၵူႈပိုၼ်ႉတီႈသေ တိူင်းၸႄႈၵႅင်းပွတ်းၼိူဝ်၊ တိူင်းတၼိၼ်းတႃႇယီႇ၊ မိူင်းယၢင်း၊ မိူင်းမွၼ်း၊ မိူင်းယၢင်းလႅင် ၸိူဝ်းၼႆႉသမ်ႉ ၾူၼ်တေတူၵ်းမၢင်ပိုၼ်ႉတီႈသေ ႁႅင်းၾူၼ်တေတူၵ်းယူႇတီႈႁူဝ်ပၢၵ်ႇပႅတ်ႇသိပ်း (80%) ၼႆယဝ်ႉ။

မိူဝ်ႈၼႆႉ ႁႅင်းလူမ်းလႅင်ႉၽတ်ႉၶဝ်ႈတီႈဝဵင်းတၢၼ်ႇတွႆး မိူင်းရၶႅင်ႇသေ ႁႅင်းတေဢူၼ်ႈဢွၼ်ႇ လူင်းၵႂႃႇယဝ်ႉ သိုပ်ႉၶၢႆႉၵႂႃႇၸွမ်းပၢင်ႇလၢႆႇ ၽၢႆႇတၢင်းႁွင်ႇ ဝႃႈၼႆ။

တႆးလွတ်ႈလႅဝ်း