သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်းတၢႆပဵၼ်ၵေႃႇပဵၼ်ၵွင်

မိူဝ်ႈဝႃးဝၼ်းထီႉ 30 September 2024 (လိူၼ်သိပ်းလွင်ႈ 13 ၶမ်ႈ ပီႊတႆး 2118 ၼီႈ) ယၢမ်းၵၢင်ဝၼ်း 11:30 မူင်းပၢႆ ၸုမ်းသိုၵ်းမၢၼ်ႈဢဝ်ႁိူဝ်းမိၼ် 2 လမ်း ၵႂႃႇပွႆႇမၢၵ်ႇသႂ်ႇ တီႈဝၢၼ်ႈဢူၵ်ႉၵၢၼ်ႇ ၸႄႈဝဵင်းၵေႃႇလိၼ်း တိူင်းၸႄႈၵႅင်းသေ မီးၵူၼ်းမိူင်း လႆႈတၢႆယွၼ်ႉသိုၵ်းမၢၼ်ႈ 7 ၵေႃႉ လႄႈ မၢတ်ႇၸဵပ်း 4 ၵေႃႉယူႇယဝ်ႉ။

ၵပ်းၵၢႆႇလူၺ်ႈလွင်ႈၼႆႉ ၸုမ်း PDF လၢတ်ႈၵႂႃႇတီႈသိုဝ်ႇၶၢဝ်ႇ Khit Thit Media ဝႃႈ ဢွင်ႈတီႈဢၼ်ၸုမ်းသိုၵ်းမၢၼ်ႈ ၵႂႃႇပွႆႇမၢၵ်ႇသႂ်ႇတီႈဝၢၼ်ႈဢူၵ်ႉၵၢၼ်ႇၼၼ်ႉ မီးၵူၼ်းမိူင်း ယူႇသၢင်ႈၵိၼ်သဝ်းဝႆႉၵူၺ်းလႄႈ တၢင်းၽၢႆႇၸုမ်း PDF တိုၼ်းဝႃႈဢမ်ႇလႆႈယူႇပၵ်းသဝ်းဝႆႉ၊ ထႅင်ႈလွင်ႈၼိုင်ႈၵေႃႈ တီႈဝၢၼ်ႈၼၼ်ႉ ဢမ်ႇလႆႈမီးပၢင်တိုၵ်းသိုၵ်းသိူဝ် လႄႈ သိုၵ်းမၢၼ်ႈတင်ႈၸႂ်ဢဝ်ၵူၼ်းမိူင်း ႁဵတ်းပဵၼ်ပဝ်ႉမၢႆသေ ပိုတ်းယိုဝ်းသႂ်ႇၵူၼ်းမိူင်းၵူၺ်း ဝႃႈၼႆ။

မိူဝ်ႈဝၼ်းထီႉ 29 September 2024 ယၢမ်းၵၢင်ၶိုၼ်း 23:10 မူင်းၼၼ်ႉၵေႃႈ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ၵႂႃႇပွႆႇမၢၵ်ႇသႂ်ႇ ဝၢၼ်ႈယႂႃႇတိတ်ႉ ဢၼ်မီးၸဵင်ႇၸၢၼ်းဝၼ်းတူၵ်း ၸႄႈဝဵင်းၵေႃႇလိၼ်း ၼၼ်ႉ 2 လုၵ်ႈ လႄႈ မီးၵူၼ်းမိူင်းလႆႈတၢႆၵႂႃႇ 1 ၵေႃႉ မၢတ်ႇၸဵပ်း 15 ၵေႃႉ ၼႆယဝ်ႉ။

တင်ႈတႄႇၼႂ်းႁၢင်ပီႊ 2023 ထိုင်ပီႊ 2024 ၼႆႉ ၸုမ်းသိုၵ်းမၢၼ်ႈ ထုၵ်ႇၺႃးၸုမ်းလုၵ်ႉၽိုၼ်ႉ ယိုတ်းပႅတ်ႈတပ်ႉပၢင်သဝ်း တင်းၼမ်လႄႈ လႆႈတူၵ်းသုမ်းပႃး ၵူၼ်းသိုၵ်းတင်းၼမ်သေ မိူဝ်ႈလဵဝ်လႆႈႁၼ်သိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၵူၼ်းမိူင်းဢၼ်မီးၼႂ်းၼႃႈလိၼ်ၵုမ်းၵမ်ၶွင် ၸုမ်းလုၵ်ႉၽိုၼ်ႉၼၼ်ႉ ဢမ်ႇထၢတ်ႈဢမ်ႇဝၢႆးယူႇယဝ်ႉ။

တႆးလွတ်ႈလႅဝ်း