သိုၵ်းမၢၼ်ႈလၵ်ႉပၢႆႈဢွၵ်ႇၶွၵ်ႈ တီႈလႃႈသဵဝ်ႈ

သိုၵ်းမၢၼ်ႈ ၸိူဝ်းယွမ်းသိုၵ်း လႄႈ ၸိူဝ်းထုၵ်ႇသိုၵ်းၵူဝ်းၵၢင်ႉ MNDAA တီႉၺွပ်းလႆႈ ၽွင်းပၢင်တိုၵ်း ဝဵင်းလႃႈသဵဝ်ႈၼၼ်ႉ လၵ်ႉပၢႆႈဢွၵ်ႇၶွၵ်ႈတင်းၼမ် လႄႈ မိူဝ်ႈလဵဝ် သိုၵ်းၵူဝ်းၵၢင်ႉ ၵူတ်ႇထတ်းတီႈတၢင်းၶဝ်ႈဢွၵ်ႇဝဵင်းလႃႈသဵဝ်ႈ ႁၢဝ်ႈႁႅင်းဝႆႉၼႆယဝ်ႉ။

ၵူၼ်းၸမ်ၸႂ်ၵၼ်တင်း ၸုမ်းသိုၵ်းၵူဝ်းၵၢင်ႉ MNDAA ၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇ RFA ဝႃႈ ဝၢႆးသေ ၽူႈယွမ်းသိုၵ်းလၵ်ႉပၢႆႈဢွၵ်ႇၶွၵ်ႈမိူဝ်ႈၼႂ်းလိူၼ် October 2024 ယဝ်ႉၼၼ်ႉ  မိူဝ်ႈဝႃးဝၼ်းထီႉ 10 November 2024 ၼႆႉ လႆႈႁၼ်တၢင်းၽၢႆႇၸုမ်းသိုၵ်း MNDAA ဢဝ်ဢဵၼ်ႁႅင်းတင်းၼမ် ၵူတ်ႇထတ်းၸႅတ်ႈထၢမ် ၵူၼ်းၵႂႃႇမႃးႁၢဝ်ႈႁႅင်းဝႆႉ ၸွမ်းတၢင်းၶဝ်ႈဢွၵ်ႇဝဵင်းလႃႈသဵဝ်ႈ၊ ၽူႈယွမ်းသိုၵ်း ပၢႆႈလွတ်ႈၵႃႈႁိုဝ်ၼႆၼၼ်ႉတႄႉ ဢမ်ႇႁၼ်သိုၵ်းၵူဝ်းၵၢင်ႉ လၢတ်ႈသင်ဝႆႉ၊ ဢၼ်ၶႃႈႁဝ်းႁူႉတႄႉ တီႈၸုမ်းသိုၵ်းၵူဝ်းၵၢင်ႉ မီးဝႆႉၶႅပ်းႁၢင်ႈပိုၼ်းတူဝ် ၵူၼ်းၸိူဝ်းလၵ်ႉပၢႆႈဢွၵ်ႇၶွၵ်ႈ လႄႈ ၶဝ်တေတင်ႈလၢၼ်ႇသေ ႁႃတီႉၺွပ်းၶိုၼ်းၸိူင်ႉၼၼ်၊ မိူဝ်ႈလဵဝ်ၵေႃႈ ၸွမ်းၸိူဝ်းၶွၵ်ႈၶင်ၼၼ်ႉ ၸုမ်းသိုၵ်းၵူဝ်းၵၢင်ႉ တမ်းႁူမ်ႇလူမ်ႈၼမ်လိူဝ်ၵဝ်ႇယဝ်ႉ ဝႃႈၼႆ။

မိူဝ်ႈဝၼ်းထီႉ 9 October 2024 ယၢမ်းၵၢင်ၼႂ်ၸဝ်ႉၼၼ်ႉ ၵူၼ်းတူၵ်းၶွၵ်ႈဢၼ်မီးတီႈ ဝဵင်းလႃႈသဵဝ်ႈ လႆႈပၢႆႈဢွၵ်ႇၶွၵ်ႈ 90 ပၢႆ လႄႈ ထုၵ်ႇတီႉၺွပ်းလႆႈၶိုၼ်း 40 ပၢႆသေ လိူဝ်ၼၼ်ႉပၢႆႈလွတ်ႈဝႆႉၼႆယဝ်ႉ။

တႆးလွတ်ႈလႅဝ်း