သိုၵ်းမၢၼ်ႈသိုပ်ႇပွႆႇမၢၵ်ႇသႂ်ႇ ၼႂ်းဝဵင်းလႃႈသဵဝ်ႈထႅင်ႈ ၵူၼ်းမိူင်းလိူတ်ႇမႆႈလူႉတၢႆၸွမ်း

မိူဝ်ႈၼႆႉဝၼ်းထီႉ 30 September 2024 (လိူၼ်သိပ်းလွင်ႈ 13 ၶမ်ႈ ပီႊတႆး 2118 ၼီႈ) ၶၢဝ်းယၢမ်းတဵင်ႈၶိုၼ်းလိုၵ်း 00:40 ထိုင် 00:45  မူင်းၼၼ်ႉ သိုၵ်းမၢၼ်ႈဢဝ်ႁိူဝ်းမိၼ် မႃးပွႆႇမၢၵ်ႇသႂ်ႇၼႂ်းပွၵ်ႉ 11 ဝဵင်းလႃႈသဵဝ်ႈ 3 လုၵ်ႈသေ ႁဵတ်းႁႂ်ႈႁိူၼ်းယေးၵူၼ်းမိူင်း လႆႈလူႉၵွႆၸွမ်းလႄႈ ၵဵဝ်ႇလူၺ်ႈလွင်ႈမၢတ်ႇၸဵပ်းလူႉတၢႆၵူၼ်းမိူင်းတႄႉ ပႆႇယိုၼ်ယၼ်လႆႈတႅတ်ႈတေႃး ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ “မႅၼ်ႈၽွင်းပိူၼ်ႈလပ်းယဵၼ်လီယဝ်ႉဢေႃႈ ႁိူဝ်းမိၼ်ၶဝ်မႃးပွၺ်ႇမၢၵ်ႇသႂ်ႇတီႈပွၵ်ႉ 11 သဵၼ်ႈတၢင်း ဢွင်ႇၸေႇတၼႃႇ ၼၼ်ႉၼႆၶႃႈ တေပဵၼ်ႁိုဝ်ပဵၼ်ႁႃၵၼ်တႄႉပႆႇႁူႉၸွမ်း ၽူင်းၵေႃႈၵပ်းႁႃၵၼ်ဢမ်ႇပႆႇလႆႈၶႃႈ ငိၼ်းၵမ်ႈၽွင်ႈဝႃႈတႄႉ မီးၵူၼ်းလူႉတၢႆမၢတ်ႇၸဵပ်းၸွမ်းၵမ်ႈၽွင်ႈယူႇ ၼႆဢေႃႈ” လၢတ်ႈၼႄၼင်ႇၼႆ။

တီႈဝဵင်းလႃႈသဵဝ်ႈၼႆႉ ၸုမ်းသိုၵ်းၵူဝ်းၵၢင်ႉ MNDAA ၶဝ် တိုၵ်းသိမ်းၵုမ်းၵမ်ဝႆႉသေ တႄႇဢဝ်ၼႂ်းလိူၼ်းထူၼ်ႈပႅတ်ႈ August 2024 မႃးၼၼ်ႉ ထုၵ်ႇသိုၵ်းမၢၼ်ႈပွႆႇမၢၵ်ႇသႂ်ႇလၢႆပွၵ်ႈယဝ်ႉ၊ ၼႂ်းဝူင်ႈၼႆႉၵူၺ်း သိုၵ်းမၢၼ်ႈမႃးပွႆႇမၢၵ်ႇသႂ်ႇၶႂ်ႈဝႃႈၵူႈၶိုၼ်းလႄႈ ႁဵတ်းႁႂ်ႈၵူၼ်းမိူင်း လူႉတၢႆမၢတ်ႇၸဵပ်းၸွမ်းတၢင်းၼမ်ယဝ်ႉ တေႃႇထိုင်ယၢမ်းလဵဝ် ပႆႇမီးၸုမ်းလႂ်ႁပ်ႉဢဝ်ႉပုၼ်ႈၽွၼ်းၶိုၼ်း ၵူၼ်းမိူင်းၵေႃႈဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။

ၵူၼ်းၼုမ်ႇလႃႈသဵဝ်ႈၵေႃႉၼိုင်ႈလၢတ်ႈၼႄဝႃႈ “ဝၢႆးပၢင်တိုၵ်းယဵၼ်ယဝ်ႉ ၵူၼ်းမိူင်းၸိူဝ်းပၢႆႈၽေးၵႂႃႇတၢင်ႇတီႈၼၼ်ႉ ၶိုၼ်းဢွၼ်ၵၼ်ပွၵ်ႈမႃးၼမ်ဢေႃႈ ထၢင်ႇဝႃႈတေၵတ်းယဵၼ်ယဝ်ႉ ၵမ်းၼႆႉၶႅၼ်းလီၵူဝ်သေၽွင်းပၢင်တိုၵ်းၼၼ်ႉဢေႃႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈသင် ၵၢင်ၶမ်ႈၵၢင်ၶိုၼ်းၵေႃႈဢမ်ႇႁတ်းၼွၼ်းလပ်းလီ ယွၼ်ႉဢမ်ႇႁူႉဝႃႈ ၶဝ်တေမႃးပွႆႇမၢၵ်ႇမိူဝ်ႈလႂ် မၢင်ပွၵ်ႈၼႆႉသမ်ႉပေႃးဝူၼ်ႉဝႃႈ ဢဝ်ၵၢမ်ႇမၼ်းဝႃႈလႃႈၼႆဢေႃႈ ဢမ်ႇၸၢင်ႈႁဵတ်းႁိုဝ်ယဝ်ႉ ယၢမ်းလဵဝ်ၼႆႉပၢႆႈၵႂႃႇတၢင်းလႂ်ၵေႃႈယၢပ်ႇၼႃႇ ပီႈၼွင်ႈပွတ်းၸၢၼ်းၵေႃႈ ၵမ်ႈၼမ်ၺႃးၽေးၼမ်ႉထူမ်ႈ ယၢပ်ႇၽိုတ်ႇမိူၼ်ၵၼ်ယဝ်ႉ” လၢတ်ႈၼႄၼင်ႇၼႆ။

တႄႇၸဵမ်မိူဝ်ႈ မိူင်းၶႄႇသူင်ႇလိၵ်ႈထိုင်ၸုမ်းဢူၺ်းလီ 3 ၸုမ်း ႁႂ်ႈၵိုတ်းပၢင်တိုၵ်းၼႆယဝ်ႉၼၼ်ႉ သိုၵ်းမၢၼ်ႈၶိုၼ်းပိုၼ်ၽၢဝ်ႇဝႃႈ ၸုမ်းသိုၵ်း 3 ၸုမ်း ပဵၼ်ၸုမ်းၵေႃႇၵၢၼ်ႁၢႆႉၼႆသေ ႁၢင်ႈႁႅၼ်ၽႅၼ်ၵၢၼ်ယၼ်ႇသိုၵ်း “ယၼ်ႇၼၢႆမိၼ်း” ၼႆသေ ၸႂ်ႉတိုဝ်းႁိူဝ်းမိၼ်ပွႆႇမၢၵ်ႇသႂ်ႇ ၼႂ်းၸိုင်ႈတႆးပွတ်းႁွင်ႇ ႁၢဝ်ႈႁႅင်းမႃးၵူႈဝၼ်း ၵမ်ႈၼမ်တေပဵၼ် ဝဵင်းလႃႈသဵဝ်ႈ  ဢၼ်လႆႈၶၢမ်ႇၸၢၵ်ႇသမ်ႉ ပဵၼ်ၵူၼ်းမိူင်းၵူၺ်း ၼႆယဝ်ႉ။

တႆးလွတ်ႈလႅဝ်း