သိုၵ်းမၢၼ်ႈဢမ်ႇပၼ်ဢဝ်ၶဝ်ႈသၢၼ် လႄႈ ၼမ်ႉမၼ်းၶိူင်ႈၸၢၵ်ႈၶဝ်ႈမိူင်းလႃး

မိူဝ်ႈဝႃးဝၼ်းထီႉ 25 November 2024 (လိူၼ်သိပ်းသွင်လွင်ႈ 10 ၶမ်ႈ ပီႊတႆး 2118 ၼီႈ) ၵူၼ်းမိူင်းလၢတ်ႈတီႈ သိုဝ်ႇၶၢဝ်ႇၼႂ်းပိုၼ်ႉတီႈဝႃႈ ၼႂ်းဝူင်ႈဝၢင်ႈၼႆႉ ၸွမ်းၸိူဝ်းလၢၼ်ႇ သိုၵ်းမၢၼ်ႈ ဝၢၼ်ႈတႃႈပဵင်း  ဢၼ်ပဵၼ်တၢင်းၶဝ်ႈဢွၵ်ႇ ၼႃႈလိၼ်လိုၵ်ႉတွၼ်း မၢႆ 4 မိူင်းလႃးၼၼ်ႉ ၶဝ်ၵူတ်ႇထတ်းႁႅင်းဝႆႉလႄႈ ပေႃးတၢင်ႇၶဝ်ႈသၢၼ် တင်း ၼမ်ႉမၼ်းၶိူင်ႈၸၢၵ်ႈၼႆ ၶဝ်တိုၼ်းဢမ်ႇပၼ်လတ်းပူၼ်ႉလၢၼ်ႇၶဝ်၊ ပေႃးဝႃႈ ပဵၼ်ၶဝ်ႈသၢၼ်ထူင်လဵၵ်ႉလဵၵ်ႉ ပဵၼ်တႃႇၵူၼ်းၼႂ်းႁိူၼ်းၵိၼ်ၼႆတႄႉ သိုၵ်းမၢၼ်ႈ ပၼ်ဢဝ်ၶဝ်ႈၵႂႃႇယူႇ၊ ပေႃးတၢင်ႇ ၼမ်ႉမၼ်းၶိူင်ႈၸၢၵ်ႈတႄႉ ၵႃႈၶႂ်ႈဢုပ်ႇၶဝ်လႃႈ ၶဝ်တိုၼ်း ဢမ်ႇပၼ်တၢင်ႇၵႂႃႇ ဝႃႈၼႆ။

ၵူၼ်းမိူင်းၵဵင်းတုင်လၢတ်ႈၼႄဝႃႈ မိူဝ်ႈၵူႈပွၵ်ႈတႄႉ ပေႃးဝႃႈလၢၼ်ႇ ဝၢၼ်ႈတႃႈပဵင်းပိၵ်ႉၼႆ ၸဝ်ႈၵုၼ်ႇၵႃႉတၢင်းၶၢႆၶဝ် တိုၼ်းႁႃလွၵ်းလၢႆးမၼ်းသေ တေႃႉတၢင်ႇၶဝ်ႈၼမ်ႉတၢင်းၵိၼ် ၵႂႃႇႁင်းၽႂ်ႁင်းမၼ်းယူႇၶႃႈ၊ မိူဝ်ႈလဵဝ်ၼႆႉ တွၼ်ႈတႃႇတေဢဝ် ၶူဝ်းၵုၼ်ႇၶဝ်ႈမိူင်းလႃးၼၼ်ႉ တၢင်းၽၢႆႇမၢၼ်ႈၵေႃႈပိၵ်ႉ ၽၢႆႇၶႄႇၵေႃႈပိၵ်ႉဢိုတ်းဝႆႉမိူၼ်ၵၼ် လႄႈ တွၼ်ႈတႃႇ ၵူၼ်းမိူင်းလႃးတႄႉ တေလႆႈဝႃႈႁူပ်ႉလွင်ႈယၢပ်ႇၽိုတ်ႇဝႆႉယူႇ၊ လၢၼ်ႇဝၢၼ်ႈတႃႈပဵင်းၼႆႉ ယၢၼ်ၵႆဝဵင်းၵဵင်းတုင် မွၵ်ႈ 24 လၵ်း လႄႈ ယၢၼ်ၵႆမိူင်းလႃး 9 လၵ်းၵူၺ်း ဝႃႈၼႆ။

ၵူၼ်းမိူင်းဝၢၼ်ႈတူင်ႈ မိူင်းလႃး ၵေႃႉၼိုင်ႈၵေႃႈလၢတ်ႈဝႃႈ လၢၼ်ႇဢၼ်ၽၢႆႇ မိူင်းၶႄႇ ပိၵ်ႉဢိုတ်းၼၼ်ႉ ပႃးဝႆႉလၢၼ်ႇတႃႇလေႃႉ−မိူင်းလႃး ပေႃးဢဝ်ၶူဝ်းၵုၼ်ႇ ၽၢႆႇမိူင်းၶႄႇၶဝ်ႈမႃးၼႆ ၶႄႇၶဝ်ဢမ်ႇပၼ်၊ ပေႃးဝႃႈဢဝ်ၽၵ်းယိူဝ်ႈၼၢင်းၶဵဝ်၊ မၢၵ်ႇမႆႉမၢၵ်ႇတွၵ်ႇ ၽၢႆႇမိူင်းလႃးၶဝ်ႈၵႂႃႇသမ်ႉ ၶႄႇပၼ်တေႃႉၶဝ်ႈၵႂႃႇ ၵမ်းဢိတ်းၵမ်းဢွတ်းၸိူင်ႉၼၼ် ဝႃႈၼႆ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ ၸဝ်ႈၵႃးတၢင်ႇၵုၼ်ႇ ၸိူဝ်းလုၵ်ႉတီႈ ဝဵင်းလူင်တူၼ်ႈတီး မုင်ႈၼႃႈၵႂႃႇတီႈ ဝဵင်းမိူင်းယႆ−တၢင်ႉယၢၼ်းၼၼ်ႉ သင်ဝႃႈဢမ်ႇမီးဝႂ်ႁပ်ႉႁွင်းၵမ်ႉထႅမ် တီႈပိဝ်ႇႁႃႇသိုၵ်း လႄႈ ႁူင်းပလိၵ်ႈမၢၼ်ႈၼႆၸိုင် တိုၼ်းဢမ်ႇပၼ်ၸဝ်ႈၵႃးတၢင်ႇၵုၼ်ႇၽၢၼ်ႇလၢၼ်ႇသေ ဢမ်ႇပၼ်ၶဝ်ႈဝဵင်းထႅင်ႈ ၼႆယဝ်ႉ။

တႆးလွတ်ႈလႅဝ်း