သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇၵူၼ်းမိူင်း တၢႆ 16 ၵေႃႉ

ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်တိုၵ်း 2 လမ်း ၵႂႃႇပွႆႇမၢၵ်ႇသႂ်ႇတီႈၸွမ်းတၢင်းၽႄ လႄႈ တီႈၵျွင်းမုၼ်ၸဝ်ႈ ဝၢၼ်ႈလႂႃႉၸိၼ်ႇၵူင်း ၸႄႈဝဵင်းၵျၢႆႉမယေႃႇ မိူင်းမွၼ်းသေ မီးၵူၼ်းမိူင်းလႆႈမၢတ်ႇၸဵပ်းလူႉတၢႆတင်းၼမ် ၼႆယဝ်ႉ။

သိုဝ်ႇၶၢဝ်ႇ Khit Thit Media ဢွၵ်ႇဝႆႉဝႃႈ မိူဝ်ႈဝၼ်းထီႉ 19 July 2024 (လိူၼ်ပႅတ်ႇမႂ်ႇ 14 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 10:15 မူင်းၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်တိုၵ်း 2 လမ်း ၵႂႃႇပွႆႇမၢၵ်ႇသႂ်ႇတီႈ တၢင်းၽႄ ၵႄႈၵၢင်ဝၢၼ်ႈလႂႃႉၸိၼ်ႇၵူင်း လႄႈ ဝၢၼ်ႈၸၢႆႇငွႆႇ၊ ယဝ်ႉၵေႃႈ ပွႆႇသႂ်ႇပႃးထႅင်ႈ တီႈၵျွင်းမုၼ်ၸဝ်ႈ ဢၼ်မီးတီႈႁိမ်းတၢင်းၽႄၼၼ်ႉထႅင်ႈသေ ၵူၼ်းမိူင်းလႆႈတၢႆၵႂႃႇ 16 ၵေႃႉ ပႃးၸဵမ်လုၵ်ႈဢွၼ်ႇ လႄႈ မႄႈပႃးတွင်ႉ(မႄႈမၢၼ်း) ၼႆယဝ်ႉ။

ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပၼ်ႇလဵပ်ႈၸွမ်းဝၢၼ်ႈသေ ၵမ်းၼၼ်ႉၵူၼ်းမိူင်း ဢွၼ်ၵၼ်တူၵ်းၸႂ်ၵူဝ်ႁႄလႄႈ သမ်ႉပၢႆႈၵႂႃႇၸူႉတုမ်ၵၼ်၊ ၽွင်းၵူၼ်းမိူင်း တိုၵ်ႉၸူႉတုမ်ယူႇၸွမ်းၵၼ်ၼၼ်ႉ သိုၵ်းမၢၼ်ႈတင်ႈၸႂ်ဢဝ်မၢၵ်ႇပွႆႇတူၵ်းသႂ်ႇ ၵူၼ်းမိူင်း ဝႃႈၼႆ။

ၸွမ်းၼင်ႇၵူၼ်းမိူင်းလၢတ်ႈတီႈသိုဝ်ႇၶၢဝ်ႇ Khit Thit Media ဝႃႈ ၽွင်းႁိူဝ်းမိၼ်ပွႆႇမၢၵ်ႇ တူၵ်းတႅၵ်ႇသႂ်ႇၵူၼ်းမိူင်းၼၼ်ႉ ၶႃႈႁဝ်းၵေႃႈမီးယူႇႁိမ်းႁွမ်းၼၼ်ႉၵူၺ်း၊ ၵူၼ်းမိူင်း လႆႈတၢႆၼမ်ႁႅင်းတႄႉတႄႉ၊ ၼႂ်း 16 ၵေႃႉၼၼ်ႉ ပႃးဝႆႉမႄႈပႃးတွင်ႉ 7 လိူၼ် 1 ၵေႃႉ လႄႈ ၽူဝ်မၼ်း တင်း လုၵ်ႈဢွၼ်ႇမၼ်းၵေႃႈ လူႉတၢႆၵႂႃႇၸွမ်းၵၼ်ယဝ်ႉ၊ ၵွၼ်ႇသိုၵ်းမၢၼ်ႈတေပွႆႇမၢၵ်ႇၼၼ်ႉ ၶဝ်ဢဝ်ႁိူဝ်းမိၼ်တိုၵ်း 2 လမ်း ပၼ်ႇၵႂႃႇပၼ်ႇမႃး ၸွမ်းဝၢၼ်ႈတင်းႁိုင် ဝႃႈၼႆ။

ယွၼ်ႉမၢၵ်ႇလူင်သိုၵ်းမၢၼ်ႈသေ ဢၢင်ႇၵႃႇတူဝ်ၶိင်းၵူၼ်းမိူင်းၵမ်ႈၽွင်ႈ လႆႈသိၵ်ႇၶၢတ်ႇယွၵ်းယွႆၵႂႃႇ ပဵၼ်ပွတ်းပဵၼ်တွၼ်ႈ လႄႈ လႆႈႁူႉဝႃႈ ၵူၼ်းဝၢၼ်ႈၶိုၼ်းဢွၼ်ၵၼ်ၵဵပ်းယဝ်ႉ ဢဝ်သၢင်းၵျူဝ်ႇၽဝ်ၾႆးပၼ်ၵႂႃႇ ဝႃႈၼႆ။

ၵူၼ်းမိူင်းၼႂ်းတိူင်းၸႄႈၵႅင်း၊ ၸႄႈမိူင်းၶၢင် လႄႈ မိူင်းတႆးပွတ်းႁွင်ႇ ၸိူဝ်းၼႆႉၵေႃႈ ထုၵ်ႇၺႃးသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်း ယူႇသဝ်းၸွမ်းၵၼ်တင်းၼမ်ၼၼ်ႉသေ မီးၵူၼ်းမိူင်းလႆႈမၢတ်ႇၸဵပ်းလူႉတၢႆ တင်းၼမ်မိူၼ်ၵၼ် ယူႇယဝ်ႉ။

တႆးလွတ်ႈလႅဝ်း