သိုၵ်းမၢၼ်ႈၵဵပ်းသၢႆမၢႆမုင်ႉႁေႃႁိူၼ်း တႃႇၸတ်းပၢင်လိူၵ်ႈတင်ႈ

မိူဝ်ႈဝႃးဝၼ်းထီႉ 1 October 2024 (လိူၼ်သိပ်းလွင်ႈ 14 ၶမ်ႈ ပီႊတႆး 2118 ၼီႈ) ၸုမ်းသိုၵ်းမၢၼ်ႈ ဢွၼ်ႁူဝ်ၼမ်းၼႃႈ ၽၢႆႇဢုပ်ႉပိူင်ႇၼႂ်းပိုၼ်ႉတီႈ လႄႈ မေႃသွၼ် ႁူင်းႁဵၼ်းသွၼ်လိၵ်ႈ ဢိၵ်ႇပႃးၽၢႆႇၵဵဝ်ႇၶွင်ႈသေ လူင်းၵဵပ်းသၢႆမၢႆ မုင်ႉႁေႃႁိူၼ်းၵူၼ်းမိူင်း တီႈဝဵင်းတၢင်ႉယၢၼ်း၊ မူႇၸေႊ၊ ၵဵင်းတုင် ဝႃႈၼႆ။

ၸွမ်းၼင်ႇလႆႈႁူႉၸွမ်း သိုဝ်ႇၶၢဝ်ႇၼႂ်းပိုၼ်ႉတီႈဢွၵ်ႇဝႆႉဝႃႈ လွင်ႈသိုၵ်းမၢၼ်ႈ ၵဵပ်းသၢႆမၢႆမုင်ႉႁေႃႁိူၼ်း  ၼႂ်းၼႃႈလိၼ်ဢုပ်ႉပိူင်ႇလၢႆလၢႆတီႈၼႆႉ ယိူင်းဢၢၼ်းတႃႇၸတ်းႁဵတ်း ပၢင်လိူၵ်ႈတင်ႈ လႄႈ လွင်ႈၵဵပ်းသၢႆမၢႆၼႆႉၵေႃႈ တေဢၢၼ်းၵဵပ်းယဝ်ႉ ၼႂ်းဝၼ်းထီႉ 15 October 2024 ၼႆႉဝႃႈၼႆ။

မိူဝ်ႈဝၼ်းထီႉ 15 June 2024 ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ (မိူဝ်ႈလဵဝ်ပဵၼ်ဝႆႉၸွမ်ၸိုင်ႈၸူဝ်ႈၶၢဝ်း) ၼၼ်ႉ ႁူပ်ႉထူပ်းၶႃႈႁၢပ်ႇၵၢၼ်ၶုၼ် လႄႈ ၽူႈၵဵဝ်ႇၶွင်ႈလၢႆလၢႆႁွင်ႈၵၢၼ် တီႈဝဵင်းမဵၵ်ႉထီႉလႃႇသေ လၢတ်ႈၵႂႃႇဝႃႈ ၼႂ်းပီႊ 2025 ဢၼ်တေထိုင်ၼႆႉ တေၸတ်းႁဵတ်းပၢင်လိူၵ်ႈတင်ႈ လႄႈ ၼင်ႇႁိုဝ်ပေႃးတေပဵၼ် ၸတ်းႁဵတ်းပၢင်လိူၵ်ႈတင်ႈၼၼ်ႉၵႃႈ လူဝ်ႇလႆႈတႄႇၵဵပ်းသၢႆမၢႆ ၵူၼ်းမိူင်းၵႂႃႇယဝ်ႉ ဝႃႈၼႆ။

ၵူၼ်းထတ်းသၢင်ႈၵၢၼ်မိူင်း ၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇ RFA ဝႃႈ ၽွင်းယၢမ်းမိူဝ်ႈလဵဝ်ၼႆႉ ၼႂ်းမိူင်းလၢႆလၢႆပိုၼ်ႉတီႈ ပဵၼ်ပၢင်တိုၵ်း ႁၢဝ်ႈႁၢဝ်ႈႁႅင်းႁႅင်းယူႇ လႄႈ တွၼ်ႈတႃႇတေၸတ်းႁဵတ်း ပၢင်လိူၵ်ႈတင်ႈၼၼ်ႉ တေမီးလွင်ႈယၢပ်ႇ လႅပ်ႈတေဢမ်ႇပဵၼ်ၸတ်းႁဵတ်းလႆႈလူးၵွၼ်ႇ ၼႆယဝ်ႉ။

တႆးလွတ်ႈလႅဝ်း