သိုၵ်းၵူဝ်းၵၢင်ႉ MNDAA ယိုဝ်းတၢႆၸဝ်ႈၵႃး တီႈတၢင်ႉယၢၼ်း

ၸဝ်ႈၵႃး ၵေႃႉႁပ်ႉသူင်ႇၵူၼ်း တီႈၼႂ်းၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၼၼ်ႉ ထုၵ်ႇၺႃးၸုမ်းသိုၵ်းၵူဝ်းၵၢင်ႉ MNDAA ဢဝ်ၵွင်ႈယိုဝ်းတီႈ ၼႂ်းၸႄႈဝဵင်းတၢင်ႉယၢၼ်းလႄႈ တိူဝ်ႉၸပ်းလွတ်ႇၶေႃးသေ လူႉတၢႆၵႂႃႇထင်တီႈ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ သိုဝ်ႇၶၢဝ်ႇၼႂ်းပိုၼ်ႉတီႈဢွၵ်ႇဝႆႉဝႃႈ မိူဝ်ႈဝၼ်းထီႉ 20 July 2024 (ဝၼ်းလိူၼ်ပႅတ်ႇမူၼ်း ဢမ်ႇၼၼ် ဝၼ်းၶဝ်ႈဝႃႇသႃ ပီႊတႆး 2118 ၼီႈ) ယၢမ်းၵၢင်ၼႂ်မွၵ်ႈ 05:00 မူင်း မီးၵူၼ်းမိူင်း 2 ၵေႃႉ ဢဝ်ၵႃးလမ်းၼိုင်ႈ ၵႂႃႇႁပ်ႉၵူၼ်းပၢႆႈၽေး ၸွမ်းဝဵင်းလႃႈသဵဝ်ႈ လႄႈ မိူဝ်ႈထိုင်တီႈတၢင်းၽႄ တၢင်ႉယၢၼ်း ၵႂႃႇလႃႈသဵဝ်ႈၼၼ်ႉ ၵႂႃႇႁူပ်ႉၺႃးလၢၼ်ႇၵူတ်ႇထတ်းၶွင် ၸုမ်းသိုၵ်းၵူဝ်းၵၢင်ႉ MNDAA လႄႈ လႆႈထုၵ်ႇၺႃးယိုဝ်းတၢႆပႅတ်ႈ ၼႆယဝ်ႉ။

ၵူၼ်မိူင်းၼႂ်းပိုၼ်ႉတီႈလၢတ်ႈၼႄဝႃႈ ၸဝ်ႈၵႃးၼၼ်ႉ ၸိုဝ်ႈႁွင်ႉဝႃႈ ၵူဝ်ႇဝေႇယၢၼ်ႇထုၼ်း ဢႃႇယု 26 ပီႊ ပဵၼ်ၵူၼ်ႁေႃႈလႅင်းၵႃးၵေႃႉၼိုင်ႈ၊ ၽွင်းၼၼ်ႉသမ်ႉ ၶႃသွင်ၵေႃႉတေၵႂႃႇတၢင်ႇၵူၼ်းပၢႆႈၽေး တၢင်းဝဵင်းလႃႈသဵဝ်ႈ လႄႈ သမ်ႉၵႂႃႇႁူပ်ႉၺႃးလၢၼ်ႇၸုမ်းသိုၵ်းၵူဝ်းၵၢင်ႉ MNDAA သေ ၸုမ်းသိုၵ်း ဢမ်ႇပၼ်လတ်းၽၢၼ်ႇၵႂႃႇ ၸႂ်ႉဝၢႆႁူဝ်ၵႃးပွၵ်ႈၶိုၼ်းတၢင်းၵဝ်ႇ၊ ၽွင်းၶႃပိၼ်ႇႁူဝ်ၵႃးသေ ပွၵ်ႈၵႂႃႇဢမ်ႇတၼ်းၵႆသင်ၼၼ်ႉ ၸုမ်းသိုၵ်းၵူဝ်းၵၢင်ႉ MNDAA ဢဝ်ၵွင်ႈယိုဝ်းၸွမ်းတၢင်းလင်လႄႈ မၢၵ်ႇၵွင်ႈလႆႈတိူဝ်ႉၸပ်းတီႈၶေႃး ၵူဝ်ႇဝေႇယၢၼ်ႇထုၼ်း လူႉတၢႆၵႂႃႇထင်တီႈ၊ ၵေႃႉၵႂႃႇၸွမ်းမၼ်းၼၼ်ႉသမ်ႉ ၸၢၵ်ႇမၢၼ်ႇၵႃးတိူဝ်ႉၸပ်းၸွမ်းတူဝ်လႄႈ လႆႈတၢင်းမၢတ်ႇၸဵပ်းၵမ်ႈၽွင်ႈ ဝႃႈၼႆ။

ၸဝ်ႈၵႃးၵေႃႉၼိုင်ႈလၢတ်ႈၼႄထႅင်ႈဝႃႈ ဢွင်ႈတီႈၶႃသွင်ၵေႃႉၺႃးယိုဝ်းၼၼ်ႉ ပဵၼ်ၼႂ်းၸႄႈဝဵင်းတၢင်ႉယၢၼ်း ပဵၼ်တီႈတၢင်းၽႄၵႂႃႇလႃႈသဵဝ်ႈ၊ လွင်ႈၸုမ်းသိုၵ်း ႁဵတ်းတီႈၵူၼ်းမိူင်း ၸိူဝ်းဢမ်ႇမီးတၢင်းၽိတ်းလႄႈ ၸိူဝ်းဢမ်ႇမီးၵွင်ႈၵၢင်ႇသင်ၼႆႉ လႆႈဝႃႈႁၢင်ႈႁၢႆႉႁႅင်းတႄႉတႄႉ၊ သင်ဝႃႈမီးလွင်ႈထၢင်ႇထိူမ်ၵေႃႈ ႁွင်ႉၸႅတ်ႈထၢမ်လီလီ ၵေႃႈလႆႈယူႇ ၼႆႉသမ်ႉဢမ်ႇၸႂ်ႈၸိူင်ႉၼၼ် တင်ႈၸႂ်ႁႅမ်တၢႆၵူၼ်းမိူင်းၵူၺ်း ဝႃႈၼႆ။

ၵူဝ်ႇဝေႇယၢၼ်ႇထုၼ်း ၼႆႉ ပဵၼ်ၵူၼ်းဝၢၼ်ႈလႄးၵွင်း ၸႄႈဝဵင်းဝဵင်းလိူဝ်ႇ ပဵၼ်ၵူၼ်းႁဵတ်းၵၢၼ်ႁေႃႈၵႃးႁပ်ႉသူင်ႇၵူၼ်း လႄႈ မိူဝ်ႈလဵဝ်တီႈႁိူၼ်း ၵိုတ်းပေႃႈမႄႈသွင်ၸဝ်ႈ တင်း မေးၼၢင်းၵူၺ်းယဝ်ႉ ဝႃႈၼႆ။

တႆးလွတ်ႈလႅဝ်း