ၵူဝ်းရီးယႃႈႁွင်ႇ ပိုၼ်ၽၢဝ်ႇၶေႃႈၸုၵ်းမၼ်ႈ ဢၢၼ်းမီးမၢၵ်ႇၼိဝ်းၶလီးယႃး ႁႅင်းလိူဝ်ပိူၼ်ႈၼႂ်းလုမ်ႈၾႃႉ

သိုဝ်ႇၶၢဝ်ႇၼွၵ်ႈမိူင်း ဢွၵ်ႇဝႆႉမိူဝ်ႈဝၼ်းထီႉ 28 November 2022 (လိူၼ်ၸဵင်မႂ်ႇ 6 ၶမ်ႈ ပီႊတႆး 2117 ၼီႈ) ဝႃႈ ဝၢႆးသေ ၶိမ်းၵျွင်းဢိုၼ်း မွပ်ႈဢၢပ်ႈပၼ် ဝႂ်ၶိုၼ်ႈၸၼ်ႉသိုၵ်း ၽူႈမီးၸၼ်ႉၸိူဝ်းၵဵဝ်ႇၶွင်ႈၸွမ်း လွင်ႈၸၢမ်းယိုဝ်းမၢၵ်ႇမိတ်ႉသႆး ICBM ၵႂႃႇယဝ်ႉၼၼ်ႉ ၶိမ်းၵျွင်းဢိုၼ်း သိုပ်ႇပိုၼ်ၽၢဝ်ႇယိူင်းမၢႆၵူဝ်းရီးယႃးႁွင်ႇၵႂႃႇဝႃႈ ၶၢဝ်းတၢင်းၼႃႈၼႆႉ ၵူဝ်းရီးယႃးႁွင်ႇ ဢၢၼ်းမီးမၢၵ်ႇၼိဝ်းၶလီးယႃး ဢၼ်ႁႅင်းလိူဝ်သေပိူၼ်ႈၼႂ်းလုမ်ႈၾႃႉ ဝႃႈၼႆ။

သိုဝ်ႇၶၢဝ်ႇ KRT ၵူဝ်းရီးယႃးႁွင်ႇ ယင်းပိုတ်ႇၼႄပႃးႁၢင်ႈ ၶိမ်းၵျွင်းဢိုၼ်း လႄႈ လုၵ်ႈယိင်းမၼ်း ၽွင်းမိူဝ်ႈတိုၵ်ႉထၢႆႇႁၢင်ႈၸွမ်း ၽူႈမီးပုၼ်ႈၽွၼ်း ၽူႈၶူင်သၢင်ႈ မၢၵ်ႇမိတ်ႉသႆး လႄႈ ၵေႃႉသိုၵ်းႁၢၼ် ၸိူဝ်းလႆႈၸၢမ်းယိုဝ်းမၢၵ်ႇမိတ်ႉသႆး ICBM ၼၼ်ႉ ဝႃႈၼႆ။

ၶိမ်းၵျွင်းဢိုၼ်း သိုပ်ႇလၢတ်ႈဝႃႈ ၶဝ်မုင်ႈမွင်းႁႂ်ႈၽူႈၶူင်သၢင်ႈ ၽူႈၶူၼ်းၶႂႃႉ ၸိူဝ်းၵဵဝ်ႇၶွင်ႈတင်းမူတ်း ႁူမ်ႈၵၼ်သေ ၶူင်သၢင်ႈမၢၵ်ႇၼိဝ်းၶလီးယႃးဢွၵ်ႇမႃး ႁႂ်ႈဝႆးၽႂ်းၶိုၼ်းတၼ်းၸွမ်းငဝ်းလၢႆး ဝႃႈၼႆ။

ယင်းလၢတ်ႈပႃးဝႃႈ လွင်ႈဢၼ်လႆႈၶူင်သၢင်ႈမၢၵ်ႇၼိဝ်းၶလီးယႃးၼႆႉ ပိူဝ်ႈတႃႇၵႅတ်ႇၶႄဝၢၼ်ႈမိူင်းၸဝ်ႈၵဝ်ႇ လႄႈ ၵူၼ်းမိူင်းၸဝ်ႈၵဝ်ႇၵူၺ်း၊ ယိူင်းဢၢၼ်းလူင်ၵူဝ်းရီးယႃးႁွင်ႇတႄႉ ဢၢၼ်းမီးတပ်ႉသိုၵ်းၵႅၼ်ႇၶႅင်ႁႅင်းယႂ်ႇ လိူဝ်သေပိူၼ်ႈၼႂ်းလုမ်ႈၾႃႉ။ မၢၵ်ႇမတ်ႉသႆး ICBM ၼႆႉ ပဵၼ်ၶိူင်ႈယိပ်း ဢၼ်ၶိုတ်းၵၢပ်ႈႁႅင်းလိူဝ်သေပိူၼ်ႈ ၵူၺ်းဢမ်ႇၵႃး ၼႄပၼ်ဝႃႈ ၵူဝ်းရီးယႃးႁွင်ႇ သၢင်ႈတပ်ႉသိုၵ်းဢၼ်ၵႅၼ်ႇၶႅင်လိူဝ်သေပိူၼ်ႈၼႂ်းလုမ်ႈၾႃႉလႆႈ ၼႆယဝ်ႉ။

တႆးလွတ်ႈလႅဝ်း