ၵူၼ်းမိူင်းယႆၵမ်ႈၽွင်ႈဢွၼ်ၵၼ်ပၢႆႈဢွၵ်ႇႁိူၼ်း ယွၼ်ႉၵူဝ်ပဵၼ်ပၢင်တိုၵ်း

တင်ႈတႄႇၼႂ်းလိူၼ် November 2024 ၼႆႉမႃး ပေႃႈမႄႈၵူၼ်းမိူင်းယႆ ဢွၼ်ၵၼ်ပၢႆႈဢွၵ်ႇႁိူၼ်း ႁႃတီႈလွတ်ႈၽေးႁင်းၽႂ်ႁင်းမၼ်း လႄႈ ယွၼ်ႉဝႃႈ ၽၢႆႇသိုၵ်းမၢၼ်ႈထႅမ်ႁႅင်းသိုၵ်းၼမ်ဝႆႉသေ ၵူဝ်ပဵၼ်ပၢင်တိုၵ်းႁၢဝ်ႈႁႅင်း ၼႆယဝ်ႉ။

မိူဝ်ႈလဵဝ်တၢင်းၽၢႆႇသိုၵ်းမၢၼ်ႈ ၽိူမ်ႉထႅမ်ႁႅင်းသိုၵ်းၶဝ်ႈၵႂႃႇတီႈ ၼႂ်းဝဵင်းမိူင်းယႆ ဢမ်ႇထၢတ်ႇဢမ်ႇဝၢႆး လႄႈ ဢဝ်ဝဵင်းမိူင်းယႆႁဵတ်းပဵၼ်ဝႆႉ ငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ (ယမၶ) သေ ၽႅၼ်ၸတ်းၵၢၼ်သိုၵ်း တႃႇႁုပ်ႈသိမ်း ဢဝ်ၶိုၼ်းဝဵင်းလႃႈသဵဝ်ႈ ဢၼ်တူၵ်းသုမ်းၵႂႃႇမီးၼႂ်းမိုဝ်းၸုမ်း သိုၵ်းၵူဝ်းၵၢင်ႉ MNDAA ဝႆႉၼၼ်ႉယူႇယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ပၢင်တိုၵ်းတေပဵၼ်ႁိုဝ်ဢမ်ႇပဵၼ်ႁိုဝ်ၼႆၼၼ်ႉ ၶႃႈဢမ်ႇႁူႉ၊ ၵူၺ်းၼႃႇႁၼ်ၽၢႆႇသိုၵ်းမၢၼ်ႈၶဝ် ၽိူမ်ႉထႅမ်ႁႅင်းသိုၵ်းၼမ်ၼႃႇလႄႈ ၵူဝ်ပဵၼ်ပၢင်တိုၵ်းၸွမ်းဝဵင်းႁၢဝ်ႈႁႅင်း၊ ၵူၼ်းမိူင်းတႄႉဢွၼ်ၵၼ် ငိူင်ႉဝႄႈဝႆႉထႃႈ ၼမ်ယဝ်ႉ၊ ၵမ်ႈၽွင်ႈတေႃႉၶူဝ်းႁိူၼ်းၶူဝ်းယေး ၵႂႃႇယူႇတၢင်ႇဝဵင်း ယဝ်ႉၶႃႈဢေႃႈ မၢင်ၸိူဝ်းၵေႃႈတိုၵ်ႉသိုပ်ႇယူႇဝႆႉ ၼႂ်းဝဵင်းမိူင်းယႆ ဝႃႈၼႆ။

တၢင်းၽၢႆႇၸုမ်းသိုၵ်း MNDAA တူင်ႉၼိုင်ၵုမ်းၵမ်ႁွတ်ႈထိုင်ဝႆႉတီႈ ဝၢၼ်ႈႁူဝ်ယ ၸႄႈဝဵင်းမိူင်းယႆသေတႃႉ ၸုမ်းသိုၵ်းၵူဝ်းၵၢင်ႉယၢမ်ႈလၢတ်ႈတီႈသိုဝ်ႇၶၢဝ်ႇဝႃႈ တေဢမ်ႇသိုပ်ႇပိုတ်ႇၼႃႈသိုၵ်း သိမ်းဝဵင်းထႅင်ႈ လႄႈ တေပဵၼ်ၽၢႆႇ ၶၢမ်ႇတိုၵ်းၵႅတ်ႇၶႄတူဝ်ၵူၺ်း ၼႆယဝ်ႉ။

တႆးလွတ်ႈလႅဝ်း