ၵူၼ်းမိူင်းၼွင်ၶဵဝ်လႆႈတၢႆယွၼ်ႉသိုၵ်းမၢၼ်ႈ 17 ၵေႃႉ

မိူဝ်ႈဝၼ်းထီႉ 20 November 2024 (လိူၼ်သိပ်းသွင်လွင်ႈ 5 ၶမ်ႈ ပီႊတႆး 2118 ၼီႈ) ယၢမ်းဝၢႆးဝၼ်း 15:00 မူင်းပၢႆၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်တိုၵ်း ပွႆႇမၢၵ်ႇသႂ်ႇတီႈၼႂ်းၸႄႈဝဵင်းၼွင်ၶဵဝ် လႄႈ မီးၵူၼ်းမိူင်း လႆႈမၢတ်ႇၸဵပ်းတၢႆၼမ် ယူႇယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ယၢမ်းဝၢႆးဝၼ်းၼၼ်ႉ သိုၵ်းမၢၼ်ႈ ပွႆႇမၢၵ်ႇသႂ်ႇ တီႈဝၢၼ်ႈၵုင်းလူင် (ဝၢၼ်ႈၵုင်းၵျီး) ဢိူင်ႇၵုင်းလူင် 2 လုၵ်ႈ လႄႈ မၢၵ်ႇၵႂႃႇတူၵ်းသႂ်ႇ ၼႂ်းဝၢင်းၵျွင်းမုၼ်ၸဝ်ႈသေ ၸၢၵ်ႇမၢၵ်ႇတႅၵ်ႇတိူဝ်ႉၸပ်း  ၵူၼ်းမိူင်းလႆႈတၢႆၵႂႃႇ 1 ၵေႃႉ မၢတ်ႇၸဵပ်း 2 ၵေႃႉၼႆၶႃႈ၊ ထိုင်ယၢမ်းၵၢင်ၶိုၼ်းလိုၵ်းမႃး လႆႈငိၼ်းဝႃႈၸုမ်းသိုၵ်းမၢၼ်ႈ ၵႂႃႇပွႆႇမၢၵ်ႇထႅင်ႈတီႈ ဝၢၼ်ႈၼွင်လူင် (ဝၢၼ်ႈၵၢၼ်ႇၵျီး) ဢိူင်ႇၼွင်လူင် လႄႈ မီးၵူၼ်းမိူင်းလႆႈတၢႆ 1 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။

ၼႂ်းလိူၼ် November 2024 ၼႆႉၵူၺ်း ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၵူၼ်းမိူင်းၸိူဝ်းယူႇသၢင်ႈၵိၼ်သဝ်း တီႈၼွင်ၶဵဝ်လႄႈ မီးၵူၼ်းမိူင်းလႆႈတၢႆၵႂႃႇ 17 ၵေႃႉ၊ မၢတ်ႇၸဵပ်းတင်းၼမ်သေဢမ်ႇၵႃး တီႈယူႇတၼ်းသဝ်းၵူၼ်းမိူင်းၵေႃႈ လႆႈလူႉၵွႆၵႂႃႇတင်းၼမ် ၼႆယဝ်ႉ။

တႆးလွတ်ႈလႅဝ်း