ၵူၼ်းၵႃႉၶၢႆယႃႈမဝ်းၵမ် တေႃႉယႃႈၶၢမ်ႈလႅၼ်လိၼ် လႄႈ သိုၵ်းထႆး ပိုတ်းယိုဝ်းၵၼ်

မိူဝ်ႈၼႆႉဝၼ်းထီႉ 5 November 2024 (လိူၼ်သိပ်းသွင်မႂ်ႇ 5 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်ၸဝ်ႉမွၵ်ႈ 03:50 မူင်းၼၼ်ႉ ၽၢႆႇတၢင်းသိုၵ်းထႆး ဢၼ်ဢွၵ်ႇလဵပ်ႈယၢမ်း ထူပ်းႁၼ်ၵူၼ်း 2−3 ၵေႃႉ တဵင်ႇထူင်ပိူဝ်ႉ လုၵ်ႉတၢင်းမိူင်းတႆးသေ ပႆၶၢမ်ႈလႅၼ်လိၼ် ၶဝ်ႈၵႂႃႇတၢင်းမိူင်းထႆး ၼႂ်းပိုၼ်ႉတီႈ ဝၢၼ်ႈၼွင်တဝ်ႇ ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈ ၵဵင်းမႆႇ လႄႈ ၸင်ႇႁႂ်ႈၶဝ်ၵိုတ်းသေ တေဢၢၼ်းၶဝ်ႈ ၵူတ်ႇထတ်းတူၺ်း ၵူၺ်းၵႃႈၵူၼ်းၸိူဝ်းၼၼ်ႉသမ်ႉ ပိုတ်းယိုဝ်းသႂ်ႇသိုၵ်းထႆး ဢွၼ်တၢင်း လႄႈ သွင်ၽၢႆႇလႆႈပိုတ်းယိုဝ်းၵၼ်ႁိုင်မွၵ်ႈ 5 မိၼိတ်ႉ ၼႆယဝ်ႉ။

ဝၢႆးသဵင်ၵွင်ႈယဵၼ်ၵႂႃႇယဝ်ႉ ၽၢႆႇသိုၵ်းထႆး ၶဝ်ႈၵူတ်ႇထတ်းၼႂ်းပိုၼ်ႉတီႈ ဢၼ်ပိုတ်း ယိုဝ်းၵၼ်သေ ထူပ်းႁၼ်ထူင်ပိူဝ်ႉ ဢၼ်ဢဝ်ထူင်ၵေႃႇၸၢၼ်ႈ ႁဵတ်းဝႆႉၼၼ်ႉ 3 ထူင် ၽၢႆႇၼႂ်းမၼ်းသႂ်ႇဝႆႉ ယႃႈမ ႁူမ်ႈ 300,000 မဵတ်ႉ ၵူၼ်းတေႃႉသူင်ႇယႃႈတႄႉ ဢိင်လွင်ႈလူင်ႉလႅၼ်ႇသဵၼ်ႈတၢင်း သေ တၼ်းပၢႆႈၶဝ်ႈထိူၼ်ႇလွတ်ႈၵႂႃႇပႅတ်ႈ ဝႃႈၼႆ။

ၼႂ်းဝၼ်းလဵဝ်ၵၼ်ၼႆႉၵူၺ်းၼင်ႇၵဝ်ႇ ၽၢႆႇၸဝ်ႈၼႃႈတီႈထႆးၶဝ် လႆႈႁပ်ႉၶၢဝ်ႇ တေမီးလွင်ႈတေႃႉသူင်ႇယႃႈမဝ်းၵမ်ၶၢမ်ႈလႅၼ်လိၼ် တႆး−ထႆး ၼႂ်းပိုၼ်ႉတီႈ ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇသေ ၸင်ႇလႆႈတင်ႈလၢၼ်ႇ ၵူတ်ႇထတ်း လမ်းၸွမ်းၵႃးလမ်းၼိုင်ႈ ဢၼ်ႁေႃႈၽႃႇလၢၼ်ႇၵူတ်ႇထတ်း သေပၢႆႈ ၸဝ်ႈၼႃႈတီႈထႆး လမ်းၵႂႃႇတေႃႇထိုင်ၼႃႈႁူင်းသဝ်းတီႈၼိုင်ႈ ၼႂ်းဢိူင်ႇမွၼ်ႉပိၼ်ႇ ၵႃးလမ်းၼၼ်ႉၸင်ႇၵိုတ်း  ၵူၺ်းၵႃႈၵူၼ်းႁေႃႈပွႆႇပႅတ်ႈၵႃး လႄႈ ၶူဝ်းၶွင်တင်းမူတ်း သေ ပၢႆႈဢဝ်တူဝ်လွတ်ႈၵႂႃႇပႅတ်ႈ ၸဝ်ႈၼႃႈတီႈထႆး ၵူတ်ႇထတ်းၼႂ်းၵႃးၼၼ်ႉ ယိုတ်းလႆႈ ယႃႈမ 136,000 မဵတ်ႉ ၼႆယဝ်ႉ။

ၼွၵ်ႈလိူဝ်သေၼႆႉ မိူဝ်ႈဝၼ်းထီႉ 4 November 2024 ၼၼ်ႉ မီးၵႃးတေႃႉတၢင်ႇယႃႈ မဝ်းၵမ် လႆႈႁေႃႈၽႃႇလၢၼ်ႇၵူတ်ႇထတ်းယႃႈမဝ်းၵမ်တီႈၸႄႈဝဵင်းၵူဝ်ႇသမ်ႇၽီႇၼၶွၼ်းသေ ၵႂႃႇပဵၼ်ၽေးၵိုင်ႉၵၢင်ႉဢဝ်ၵႃးပိၼ်ႈ တီႈၶၢင်ႈတၢင်း ႁိမ်းၶူဝ်ၶၢမ်ႈၼမ်ႉႁွင်ႈသူၼ်မၢၵ်ႇ မူႇ6 ဢိူင်ႇၼၶွၼ်းသျုမ်း ၸႄႊဝဵင်းၵမ်ႊၽႅင်ႊၽဵတ်းလႄႈ  မိူဝ်ႈၽူႈမီးပုၼ်ႈၽွၼ်းၶဝ် ၵႂႃႇၵူတ်ႇထတ်းၼၼ်ႉ တီႉၺွပ်းလႆႈယႃႈမတင်းမူတ်း 6,000,000 မဵတ်ႉသေ ၸင်ႇတီႉၺွပ်းၵုမ်းထိင်းဝႆႉ ၵူၼ်းႁေႃႈၵႃးလမ်းၼၼ်ႉ ဝႃႈၼႆ။

တေႃႈၼင်ႇၼၼ် မိူဝ်ႈၼႂ်းဝၼ်းထီႉ 3 November 2024 ၽၢႆႇတၢင်းၸဝ်ႈၼႃႈတီႈထႆး ၶဝ် တီႉၺွပ်းလႆႈယႃႈမ 1,000,000 မဵတ်ႉ လႄႈ ယႃႈဢၢႆႉသ် 8 ၵီႇလူဝ်ႇၵရမ်ႇ ၼႂ်းပိုၼ်ႉတီႈ ဝၢၼ်ႈပူင်ႇသလီႇ ဢိူင်ႇပႃႇဢေႃႉတွၼ်းသျႆး ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆး ႁူမ်ႈပႃး ၵူၼ်းတေႃႉသူင်ႇ 2 ၵေႃႉ ၵေႃႉၼိုင်ႈႁေႃႈၵႃး တၢင်ႇယႃႈမဝ်းၵမ် ၵေႃႉၼိုင်ႈသမ်ႉ ၶီႇလူတ်ႉၶိူင်ႈၼႄတၢင်းပၼ် ၵေႃႉၼႄတၢင်းၼၼ်ႉ ပဵၼ်လုၵ်ႈဢွၼ်ႇၸၢႆး ဢႃႇယုတိုၵ်ႉလႆႈ 16 ၶူပ်ႇၵူၺ်း ၼႆယဝ်ႉ။

တႆးလွတ်ႈလႅဝ်း