ၵႃးတၢင်ႇၵူၼ်းတူၵ်းႁူၺ်ႈလႄႈမီးၵူၼ်းတၢႆ 7 ၵေႃႉ

မိူဝ်ႈဝႃးဝၼ်းထီႉ 28 October 2024 (လိူၼ်သိပ်းဢဵတ်းလွင်ႈ 11 ၶမ်ႈ ပီႊတႆး 2118 ၼီႈ) ယၢမ်းၵၢင်ဝၼ်းၼၼ်ႉ မီးၵႃးတၢင်ႇၵူၼ်းလမ်းၼိုင်ႈ လူင်းၵုင်းတီႈၼႂ်းၵႄႈၵၢင် ဝဵင်းယႂႃႇငၢၼ်ႇ−ႁၢၼ်ႇမိၼ်ႉမူဝ် သေဢမ်ႇၵုမ်းထိင်းတၢင်းဝႆးလႆႈလႄႈ ဢဝ်ပဵၼ်ၽေးၵိုင်ႉၵၢင်ႉတူၵ်းႁူၺ်ႈၵႂႃႇ ထိုင်တီႈမီးၵူၼ်းမၢတ်ႇၸဵပ်းတၢႆၼမ်။

ၸွမ်းၼင်ႇၽူႈမီးပုၼ်ႈၽွၼ်း ၸုမ်းပရႁိတ ဝဵင်းလိူဝ်ႇလၢတ်ႈတီႈသိုဝ်ႇၶၢဝ်ႇ BBC ဝႃႈ ၵႃးလမ်းၼႆႉ လုၵ်ႉတီႈႁၢႆးႁူဝ်းတေၵႂႃႇဝႆႈၽြႃးတီႈဝဵင်းလိူဝ်ႇသေ ဢဝ်ပဵၼ်ၽေး ၵိုင်ႉၵၢင်ႉၵႃးတူၵ်းႁူၺ်ႈ (တၢင်းလိုၵ်ႉမီး 350 ပေႇ) လႄႈ မီးၵူၼ်းၸွမ်းၵႃး တၢႆ 7 ၵေႃႉ ပဵၼ်ၽူႈယိင်း 6 ၵေႃႉ ၸၢႆး 1 ၵေႃႉ၊ ဢၼ်မၢတ်ႇၸဵပ်းသမ်ႉမီး 17 ၵေႃႉ၊ ၸွမ်းၼင်ႇဢၼ်လႆႈႁပ်ႉႁူႉၶၢဝ်ႇ ၵမ်းလိုၼ်းၼႆႉတႄႉ မီးၵူၼ်းမၢတ်ႇၸဵပ်းတႃႇ 5 ၵေႃႉ လီမႆႈၸႂ်သၢႆၸႂ်ဝႆႉလႄႈ ၶိုၼ်းလႆႈဢဝ်တူဝ် လုၵ်ႉတီႈႁူင်းယႃယႂႃႇငၢၼ်ႇသိုပ်ႇသူင်ႇ ယူတ်းယႃတူဝ်တီႈ ႁူင်းယႃဝဵင်းလိူဝ်ႇ ဝႃႈၼႆ။

မိူဝ်ႈဝၼ်းထီႉ 26 October 2024 ၼၼ်ႉၵေႃႈ ၵႃး 12 လေႃႉလႄႈထေႃႈ ပဵၼ်ၽေးၵိုင်ႉၵၢင်ႉၽႃႇၵၼ်တီႈ ဝၢၼ်ႈၵုင်းပဝ်း ဢိူင်ႇလၢႆးၵမ်  ၸႄႈဝဵင်းၵုၼ်ႁဵင် လႄႈ ၸဝ်ႈထေႃႈလႆႈတၢႆထင်တီႈၵႂႃႇယူႇယဝ်ႉ။

တႆးလွတ်ႈလႅဝ်း