ၼမ်ႉထူမ်ႈဝဵင်းမွၵ်ႇမႆႇ ပွၵ်ႈၵမ်းသွင်

မိူဝ်ႈၼႆႉ ဝၼ်းထီႉ 2 October 2024( လိူၼ်သိပ်းလပ်း ပီႊတႆး 2118 ၼီႈ ) ယၢမ်း ၵၢင်ၼႂ်ၸဝ်ႉ မွၵ်ႈ 1:00 မူင်းပၢႆပၢႆ ၼၼ်ႉ ၼမ်ႉယုမ်းၵိုင်ႉၵၢင်ႉၶိုၼ်ႈလူၼ်ႉၾင်ႇလႄႈ ထူမ်ႈထိုင်ၸွမ်းဝၢင်းႁိူၼ်း  ၊ သဵၼ်ႈတႃႈသၢႆတၢင်း ၊ ႁူင်းႁဵၼ်း ၊ သူၼ်ႁႆႈၼႃး ၵူၼ်းမိူင်းထႅင်ႈ ပွၵ်ႈၵမ်းသွင် ၼႂ်းပီႊၼႆႉ တီႈၼႂ်းဢိူင်ႇၼမ်ႉလွတ်ႇ  ဝဵင်းမွၵ်ႇမႆႇ ဝႃႈၼႆ ။

မိူဝ်ႈၼႂ်းဝၼ်းထီႉ 1 October 2024  တီႈဝၢၼ်ႈတူင်ႇလၢဝ်း ဝဵင်းမိူင်းၵိုင်ၼၼ်ႉၵေႃႈ ယွၼ်ႉၾူၼ်တူၵ်းႁႅင်းလႄႈ ႁဵတ်းႁႂ်ႈၼမ်ႉၼွင်းလူၵ်ႈထူမ်ႈ တိူၵ်ႇႁႆႈလွၵ်းၼႃး ၊ ဝူဝ်းၵႂၢႆးလွင်ႈလႆၵႂႃႇၸွမ်းၼမ်ႉ ၊ ၶူဝ်လႄႈသဵၼ်ႈတႃႈသၢႆ တၢင်းလူႉၵွႆတင်းၼမ် ၼႆယဝ်ႉ ။

ၼႂ်းၶၢဝ်းႁိုဝ်ႉၶၢဝ်းၾူၼ်ပီႊၼႆႉၼႆႉ ယွၼ်ႉလူမ်းလႅင်ႉလူင် လၢႆလၢႆလုၵ်ႈ ၽတ်ႉၶဝ်ႈၵႂႃႇၼႂ်းမိူင်းဝႅတ်ႉၼၢမ်း၊ မိူင်းလၢဝ်းၼၼ်ႉသေ တုမ်ႉယွၼ်ႈထိုင်မႃးၼႂ်းမိူင်းတႆးပွတ်းၸၢၼ်းလႄႈ ႁဵတ်းႁႂ်ႈ ၾူၼ်တူၵ်းႁၢဝ်ႈႁႅင်း ၼမ်ႉၼွင်းလူၵ်ႈထူမ်ႈလၢႆလၢႆပိုၼ်ႉတီႈၼႂ်းမိူင်းတႆး ယူႇယဝ်ႉ ။

တႆးလွတ်ႈလႅဝ်း