ႁဵတ်းသင် သမ်းယႃႁႄႉၵင်ႈယဝ်ႉ ယင်းတိုၵ်ႉတိတ်းၸပ်း COVID-19 ထႅင်ႈ

ယုမ်ႇယမ်ဝႃႈလၢႆလၢႆၵေႃႉတေမီးတူဝ်ထူပ်းမႃးလႄႈ မၢင်ၵေႃႉၵေႃႈတေယၢမ်ႈ ငိၼ်းဝႃႈ “သမ်းယႃႁႄႉၵင်ႈယဝ်ႉ ယင်းတိုၵ်ႉၸၢင်ႈတိတ်းၸပ်းၸိူဝ်ႉမႅင်း တၢင်းပဵၼ် COVID-19 လႆႈထႅင်ႈ” တေႉယူႇႁိုဝ် ဢၼ်ဝႃႈၼၼ်ႉၼႆသေ လႆႈမီးၶေႃႈ ၵႂၢမ်းဢွၵ်ႇမႃးၶိုၼ်းဝႃႈ ပေႃးၼၼ် ႁဝ်းတေသမ်းယႃႁႄႉၵင်ႈၼၼ်ႉႁဵတ်းသင် ၼႆယူႇ။ ၵွပ်ႈၼၼ် ၼႂ်းဝၼ်းမိူဝ်ႈၼႆႉ ႁဝ်းဢွၼ်ၵၼ်မႃးလဵပ်ႈႁဵၼ်းတူၺ်း ၸွမ်းၵၼ် ၵဵဝ်ႇလူၺ်ႈႁူဝ်ၶေႃႈ ဢၼ်ၼႆႉ။

မေႃယႃၶဝ်လႆႈလၢတ်ႈဝႃႈ ယႃႁႄႉၵင်ႈၸိူဝ်ႉမႅင်းတၢင်းပဵၼ် COVID-19 သႅၼ်းၼိုင်ႈ လႄႈသႅၼ်းၼိုင်ႈ မၼ်းမီးၼမ်ႉၵတ်ႉ ၼႂ်းၵၢၼ်ႁႄႉၵင်ႈလွင်ႈတိတ်းၸပ်းၸိူဝ်ႉမႅင်း ပိူင်ႈၵၼ် မိူၼ်ၼင်ႇ− ယႃႁႄႉၵင်ႈ Sinovac ဢၼ်ပဵၼ်သႅၼ်းၸိူဝ်ႉမႅင်းတၢႆၼၼ်ႉ ႁႄႉၵင်ႈလႆႈယူႇမွၵ်ႈ ႁူဝ်ပၢၵ်ႇႁႃႈသိပ်းၸုတ်ႇသၢမ် 50.3% လႄႈ ၼႂ်းယႃႁႄႉၵင်ႈ Pfizer ဢမ်ႇၼၼ် Moderna ဢၼ်ပဵၼ်သႅၼ်း mRNA ၼၼ်ႉသမ်ႉ ႁႄႉၵင်ႈလႆႈ ႁူဝ်ပၢၵ်ႇၵဝ်ႈသိပ်း 90% ၼႆယူႇ။

ႁႅင်းၶၢမ်ႇတူဝ် ၽိူမ်ႉၶိုၼ်ႈဢမ်ႇမိူၼ်ၵၼ်

ၼႂ်းၶၢဝ်းယၢမ်းဢၼ်လႆႈသမ်းယႃႁႄႉၵင်ႈယဝ်ႉၼၼ်ႉ ၵမ်ႈၼမ်တေလႆႈၸႂ်ႉၶၢဝ်း ယၢမ်း တီႈဢေႇသုတ်း 2 ဝူင်ႈ ဝၢႆးသေသမ်းယႃႁႄႉၵင်ႈၶဵမ်လိုၼ်းသုတ်း ၸွမ်းၼင်ႇ မၵ်းမၼ်ႈဝႆႉၼၼ်ႉ မၼ်းၸင်ႇတေတႄႇမီးႁႅင်းၶၢမ်ႇတူဝ် ၼႂ်းၵၢၼ်ႁႄႉၵင်ႈ လွင်ႈတိတ်းၸပ်းၸိူဝ်ႉမႅင်းတၢင်းပဵၼ်လႆႈလႄႈ မၢင်ၵေႃႉသမ်းဢဝ်ၶဵမ်လဵဝ်ၵူၺ်း တီႈတႄႉမၼ်း ယႃႁႄႉၵင်ႈၼၼ်ႉ ပိူၼ်ႈမၵ်းမၼ်ႈႁႂ်ႈသမ်းသွင်ၶဵမ်သေ သမ်ႉၶိုၼ်း တိတ်းၸပ်းၸိူဝ်ႉမႅင်းဢွၼ်တၢင်းလႄႈ ႁဵတ်းႁႂ်ႈႁႅင်းၶၢမ်ႇတူဝ် လွင်ႈႁႄႉၵင်ႈၵၢၼ် တိတ်းၸပ်းၸိူဝ်ႉမႅင်းတၢင်းပဵၼ်ၼၼ်ႉဢမ်ႇတဵမ်ထူၼ်ႈ ၼႆယူႇ။ မီးလၢႆးငၢၼ်းတီႈ ၸုမ်းၵုမ်းထိင်းႁႄႉၵင်ႈ ၸိူဝ်ႉမႅင်းတၢင်းပဵၼ် မိူင်းဢမေႇရိၵၢၼ် (CDC) ဝႃႈ ယႃႁႄႉၵင်ႈဢၼ်ပဵၼ်သႅၼ်း   Pfizer လႄႈ Moderna ၼႆႉ မီးၼမ်ႉၵတ်ႉႁႄႉၵင်ႈလႆႈ ႁူဝ်ပၢၵ်ႇပႅတ်ႇသိပ်း 80% ဝၢႆးသေလႆႈသမ်းယဝ်ႉၶဵမ်ၵမ်းဢွၼ်တၢင်း၊ ၵူၺ်းပေႃးသမ်း တဵမ်သွင်ၶဵမ်ယဝ်ႉၸိုင် တေႁႄႉၵင်ႈလႆႈ ႁူဝ်ပၢၵ်ႇၵဝ်ႈသိပ်း 90% ၼႆယဝ်ႉ။

ယႃႁႄႉၵင်ႈၸိူဝ်ႉမႅင်းတၢင်းပဵၼ် သႅၼ်းၼိုင်ႈလႄႈသႅၼ်းၼိုင်ႈၼၼ်ႉ တေၸၢင်ႈမီး ၶၢဝ်းယၢမ်းႁင်းၽႂ်ႁင်းမၼ်း ၼႂ်းၵၢၼ်သၢင်ႈႁႅင်းၶၢမ်ႇတူဝ်ၽိူမ်ႉၶိုၼ်ႈလႄႈ တဵမ်ထူၼ်ႈ ၼႂ်းၵၢၼ်ႁႄႉၵင်ႈၸိူဝ်ႉမႅင်းပႅၵ်ႇပိူင်ႈၵၼ်ၵႂႃႇသေ ႁဵတ်းႁႂ်ႈမၢင်ၵေႃႉ လႆႈသမ်းယႃႁႄႉၵင်ႈထႅင်ႈ တႃႇႁဵတ်းႁႂ်ႈႁႅင်းၶၢမ်ႇတူဝ် ၼႂ်းၵၢၼ်ႁႄႉၵင်ႈၸိူဝ်ႉမႅင်း တၢင်းပဵၼ် ယူႇလႆႈၶၢဝ်းႁိုင် ၼၼ်ႉယဝ်ႉ။

ယႃႁႄႉၵင်ႈဢၼ်သမ်းၼၼ်ႉ တေဢမ်ႇၸၢင်ႈႁႄႉၵင်ႈ ၸိူဝ်ႉမႅင်းၸိူဝ်ႉၽၼ်းမႂ်ႇ

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ ပဵၼ်ၵၢၼ်လႅၵ်ႈလၢႆႈၸိူဝ်ႉၽၼ်း virus တၢင်းပဵၼ် COVID-19 ဢၼ်မႂ်ႇ လႄႈ ႁဵတ်းႁႂ်ႈယႃႁႄႉၵင်ႈမၢင်သႅၼ်း ဢၼ်ၸႂ်ႉတိုဝ်းၸိူဝ်ႉမႅင်း COVID-19 ပႆႇလႆႈလႅၵ်ႈလၢႆႈၸိူဝ်ႉၽၼ်းသေ ႁဵတ်းႁႂ်ႈယႃႁႄႉၵင်ႈၼၼ်ႉ ဢမ်ႇၸၢင်ႈႁႄႉၵင်ႈ ၸိူဝ်ႉမႅင်းတၢင်းပဵၼ် COVID-19 ၸိူဝ်ႉၽၼ်းတၢင်ႇဢၼ်လႆႈ မိူၼ်ၼင်ႇ− ၸိူဝ်ႉၽၼ်းဢင်းၵိတ်ႉ၊ ၸိူဝ်ႉၽၼ်းဢိၼ်းတီးယႃး ၸိူဝ်းၼႆႉ ဢမ်ႇမီးၼမ်ႉၵတ်ႉ တႃႇႁႄႉၵင်ႈလႆႈတဵမ်ထူၼ်ႈ ၼႆယဝ်ႉ။

လွၵ်းလၢႆးႁႄႉၵင်ႈဢၼ်လီတီႈသုတ်းၵေႃႈ ပဵၼ်လွင်ႈသမ်းယႃႁႄႉၵင်ႈၽႂ်းၽႂ်း လႄႈ မိူဝ်ႈဢၼ်တိုၵ်ႉယူႇၼႂ်းၵႄႈၵၢင် တေသမ်းၶဵမ်သွင်ၼၼ်ႉၵေႃႈ ယင်းတိုၵ်ႉတေ လႆႈႁႄႉၵင်ႈတူဝ်မိူၼ်ၵဝ်ႇ ဢမ်ႇမီးလွင်ႈလႅၵ်ႈလၢႆႈသေ ၵႆႉၵႆႉသုၵ်ႈလၢင်ႉမိုဝ်း တႃႇသေႇ၊ ယူႇႁၢင်ႇၵႆၵၼ်တင်းၵူၼ်းတၢင်ႇၵေႃႉ ၵိၼ်ၶဝ်ႈဢမ်ႇႁူမ်ႈၸေႃႉၵၼ်၊ ငိူင်ႉဝႄႈလွင်ႈၶဝ်ႈၼႂ်းၵႄႈၵူၼ်းၼမ် သင်ၸိူဝ်ႉတုမ်ႉမႅၼ်ႈၺႃးၶူဝ်းၶွင်သုၼ်ႇႁူမ်ႈ ၵူၼ်းတင်းၼမ်ၼၼ်ႉ ထုၵ်ႇလီသုၵ်ႈလၢင်ႉမိုဝ်း ဢမ်ႇၼၼ် ၸႂ်ႉတိုဝ်း  Alcohol Spray ဢမ်ႇၼၼ် Alcohol Gel ၵမ်းလဵဝ် ဢွၼ်တၢင်းတေဢဝ်မိုဝ်းၵႂႃႇယိပ်းၵႂႃႇတိူဝ်ႉ ၸွမ်းၼႃႈတႃ ယိပ်းတၢင်းၵိၼ်တၢင်းယႅမ်ႉ ၸိူဝ်းၼႆႉသေ ဢွၵ်ႇလဵၼ်ႈဢဵၼ်ႁႅင်းလႄႈ ၼွၼ်းလိုဝ်ႈႁိူဝ်ႉႁႂ်ႈတဵမ်ထူၼ်ႈ ၵႃႈၼႆႉၵူၺ်းၵေႃႈ တေၸွႆႈလူတ်းယွမ်း ၶၵ်ႉၵၢၼ်ႁၢႆႉႁႅင်း လွင်ႈၵၢၼ်တိတ်းၸပ်း ၸိူဝ်ႉမႅင်းတၢင်းပဵၼ် COVID-19 လႆႈ ဢမ်ႇဝႃႈ တေသမ်းယႃႁႄႉၵင်ႈသႅၼ်းလႂ် ၵေႃႈယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.sanook.com/health/30153/