ငဝ်းလၢႆးပၢင်တိုၵ်း KNU/KNLA လႄႈ သိုၵ်းမၢၼ်ႈ

ၼႂ်းၶၢဝ်းတၢင်း 15 ဝၼ်း KNU/KNLA လႄႈ သိုၵ်းမၢၼ်ႈ ပဵၼ်ပၢင်တိုၵ်းၵၼ် 181 ပွၵ်ႈ တီႈၼႂ်းၸႄႈတွၼ်ႈၽႃပုၼ်ႇ (မူႇတေႃႇ) မိူင်းယၢင်းသေ ၽၢႆႇသိုၵ်းမၢၼ်ႈ တူၵ်းသုမ်းၼမ်။

KNU ပိုၼ်ၽၢဝ်ႇၵႂႃႇဝႃႈ တင်ႈတႄႇ ဝၼ်းထီႉ 1 January 2022 တေႃႇထိုင် ဝၼ်းထီႉ 15 January 2022 ၼႂ်းၶၢဝ်းတၢင်း 15 ဝၼ်း တပ်ႉႁူမ်ႈပွင်း KNU/KNLA လႄႈ KNDO လႆႈပဵၼ်ပၢင်တိုၵ်းၵၼ်တင်း သိုၵ်းမၢၼ်ႈ 181 ပွၵ်ႈ/ပၢင် တီႈၼႂ်းၸႄႈဝဵင်း ၵေႃႇတူးလေႇ ၼႃႈလိၼ်ၵုမ်းၵမ် တပ်ႉၸုမ်း (5) KNU/KNLA ၸႄႈတွၼ်ႈၽႃပုၼ်ႇသေ ၽၢႆႇသိုၵ်းမၢၼ်ႈ တူၵ်းသုမ်း 159 ၵေႃႉ မၢတ်ႇၸဵပ်း 102 ၵေႃႉ ၼႆယဝ်ႉ။

ၼႂ်းပၢင်တိုၵ်းၼၼ်ႉ ၽၢႆႇ KNU/KNLA တူၵ်းသုမ်း 13 ၵေႃႉ၊ မၢတ်ႇၸဵပ်း 18 ၵေႃႉ မိူၼ်ၵၼ်။

တီႈၼႂ်းၸႄႈတွၼ်ႈတူးတထူႇ၊ ၸႄႈတွၼ်ႈၺွင်ႇလေးပိၼ်ႇ၊ ၸႄႈတွၼ်ႈပဵၵ်ႉထဝႄႇ၊ ၸႄႈတွၼ်ႈၽႃပုၼ်ႇ (မူႇတေႃႇ) ဢိၵ်ႇတင်း ၸႄႈတွၼ်ႈတူးပလႃႇယႃႇ ၸိူဝ်းၼႆႉ သိုၵ်းမၢၼ်ႈ ယိုဝ်းမၢၵ်ႇလူင်သႂ်ႇၼႂ်းဝၢၼ်ႈ လႄႈ ၼႂ်းဢွင်ႈတီႈႁဵတ်းၵၢၼ်ၵူၼ်းမိူင်း ဢမ်ႇယွမ်း 200 လုၵ်ႈ ၼႆယဝ်ႉ။

တီႈၼႂ်းၸႄႈဝဵင်းတွႆႇလူဝ်း ၸႄႈတွၼ်ႈၽႃပုၼ်ႇ ဢိၵ်ႇတင်း တီႈၼႂ်းၸႄႈဝဵင်း ၵေႃးၵရဵၵ်ႉ ၸႄႈတွၼ်ႈတူးပလႃႇယႃႇ ၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇ 7 ပွၵ်ႈ ၼႆယဝ်ႉ။

ယွၼ်ႉၸုမ်းသိုၵ်းမၢၼ်ႈ လႃႈလီႈယိုဝ်းၵွင်ႈလူင်ၵွင်ႈဢွၼ်ႇၵႂႃႇ ၵူႈႁူးၵူႈတၢင်း သေဢမ်ႇၵႃး ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇ ၼႂ်းဝၢၼ်ႈ ဢွင်ႈတီႈၵူၼ်းမိူင်းႁဵတ်းၵၢၼ်ပႃး လႄႈ ႁဵတ်းႁႂ်ႈၵူၼ်းမိူင်း လူႉသဵင်ႈတၢႆ 7 ၵေႃႉ၊ မၢတ်ႇၸဵပ်း 19 ၵေႃႉ ၼႆယဝ်ႉ။

ယွၼ်ႉပၢင်တိုၵ်းသေ ၵူၼ်းမိူင်းယၢင်း ဢၼ်ယူႇသၢင်ႈၵိၼ်သဝ်း ၼႂ်းၸႄႈတွၼ်ႈတူးတထူႇ၊ ၸႄႈတွၼ်ႈၺွင်ႇလေးပိၼ်ႇ၊ ၸႄႈတွၼ်ႈပဵၵ်ႉထဝႄႇ၊ ၸႄႈတွၼ်ႈၽႃပုၼ်ႇ (မူႇတေႃႇ) ဢိၵ်ႇတင်း ၸႄႈတွၼ်ႈတူးပလႃႇယႃႇ ၼၼ်ႉ လႆႈပၢႆႈၽေး မီးယူႇ 50,000 ပၢႆသေ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ဝႆႉယူႇ ဝႃႈၼႆ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း