ငႃးမူၼ်း

ပေႃးလၢတ်ႈထိုင်ငႃးမူၼ်းၼႆၵေႃႈ ယုမ်ႇဝႃႈတေႁူႉၸၵ်းၵၼ်လီလႄႈ ဢမ်ႇဝႃႈတေဢဝ်ႁဵတ်းၶဝ်ႈမုၼ်း၊ ၶဝ်ႈတမ်ငႃး ဢိၵ်ႇတင်း ႁဵတ်းပဵၼ်ၼမ်ႉမၼ်း သုင်းၸႂ်ႉတိုဝ်းၵၼ်ၸိူဝ်းၼႆႉ။ လၢတ်ႈလႆႈဝႃႈ ငႃးမူၼ်းၼႆႉ မီးၽွၼ်းလီတင်းၼမ်ၼၼ်ႉယဝ်ႉ ၵူၺ်းၵႃႈ သင်ၸိူဝ်ႉဝႃႈဢမ်ႇမေႃၸႂ်ႉတိုဝ်းၵေႃႈ ၸၢင်ႈၶိုၼ်းပၼ်ၽွၼ်းတုမ်ႉယွၼ်ႈမႃးလႆႈယူႇ။

ၽွၼ်းလီငႃးမူၼ်း

  1. ငႃးမူၼ်းၼၼ်ႉ မီးထၢတ်ႈ Omega 3 ၸွႆႈထိင်းပၼ်ယႃႇႁႂ်ႈပဵၼ်လူမ်းမႆႈၼႂ်း။
  2. မီးထၢတ်ႈလဵၵ်းလႄႈ ဝီႇတမိၼ်ႇ B ။
  3. ၸွႆႈႁႄႉၵင်ႈၵႅၼ်ႇသႃႇလႄႈ ႁႄႉၵင်ႈလွင်ႈၽႄႈလၢမ်း တၢင်းပဵၼ်ၵႅၼ်ႇသႃႇ မၢင်မဵဝ်း မိူၼ်ၼင်ႇ ၵႅၼ်ႇသႃႇတဝ်ႈၼူမ်း၊ ၵႅၼ်ႇသႃႇတွမ်ႇလုၵ်ႈမၢၵ်ႇ၊ ၵႅၼ်ႇသႃႇတပ်း ၸိူဝ်းၼႆႉ။
  4. ၸွႆႈလုမ်းလႃးပၼ်တပ်း ႁႂ်ႈႁဵတ်းၵၢၼ်လႆႈလီၶိုၼ်း။
  5. ႁဵတ်းႁႂ်ႈၽိဝ်ၼိူဝ်ႉၼင်ႁၢင်ႈလီ။
  6. လူတ်းယွမ်း ၶႆမၼ်းၼႂ်းသဵၼ်ႈလိူတ်ႈ လႄႈ Triglyceride ဢၼ်ပဵၼ်လွင်ႈတၢင်းႁဵတ်းႁႂ်ႈပဵၼ်တၢင်းပဵၼ်ႁူဝ်ၸႂ်။
  7. ႁဵတ်းႁႂ်ႈမဝ်တူဝ်မဝ်ၸႂ် လူတ်းယွမ်းလွင်ႈၶမ်ၸႂ်မႆႈၸႂ် ဢၼ်ၸၢင်ႈႁဵတ်းႁႂ်ႈပဵၼ်တၢင်းပဵၼ်ၶီငဝ်မွင်ၸႂ်မႃး။
  8. လူတ်းယွမ်းတၢင်းပဵၼ်မွင်ၶေႃႈ။
  9. ၸွႆႈႁႂ်ႈၼၢၼ်းထဝ်ႈ။
  10. ၸွႆႈၵိုတ်းလိုဝ်ႈလွင်ႈပႅတ်ႉတီးရီးယႃးၽႄႈလၢမ်း။

ငႃးမူၼ်းၼႆႉၵေႃႈ လၢတ်ႈလႆႈဝႃႈပဵၼ်မဵဝ်းဢၼ်မီးၽွၼ်းလီ တင်းမဵတ်ႉ လႄႈ တင်းမႂ်ယူႇ။ မႂ်ငႃးၼၼ်ႉ ဢဝ်မႃးၵိၼ်ၵပ်းၽၵ်း ၵပ်းၼိူဝ်ႉလႆႈလႄႈ ၸွႆႈလူတ်းယွမ်းတွင်ႉပိၵ်ႉ တွင်ႉၵပ်ႉၸိူဝ်းၼႆႉလႆႈလီယူႇယဝ်ႉ။

ၶေႃႈထုၵ်ႇလီၾၢင်ႉ

  1. သင်ၸိူဝ်ႉဝႃႈၸႂ်ႉတိုဝ်းၼမ်ႉမၼ်းငႃးမူၼ်းပေႃးၼႆ ဢမ်ႇထုၵ်ႇလီၸႂ်ႉၼမ် ပူၼ်ႉတီႈ ၵွပ်ႈပိူဝ်ႈဝႃႈ ၸၢင်ႈႁဵတ်းႁႂ်ႈၼိူဝ်ႉၼင်ၶူမ်းၶူမ်းၵၢႆးၵၢႆး ၽိဝ်ၼင်ၸဵပ်းယဵၼ်းလႆႈ။
  2. မႄႈပႃးတွင်ႉ လႄႈ မႄႈလဵင်ႉၼူမ်းလုၵ်ႈ ထုၵ်ႇလီငိူင်ႉဝႄႈဝႆႉၸူဝ်ႈၶၢဝ်းယူႇ။
  3. ၵူၼ်းဢၼ်ဢမ်ႇမႅၼ်ႈငႃးမူၼ်း ႁိုဝ် ၵိၼ်ယဝ်ႉဢမ်ႇပေႃးထုၵ်ႇလႄႈ မီးတုမ်ႇမႃး၊ ထူၺ်ႈၸႂ်ၵပ်ႉမႃး ၸိူဝ်းၼႆႉၵေႃႈ ထုၵ်ႇလီငိူင်ႉဝႄႈယဝ်ႉ။

လၢတ်ႈလႆႈဝႃႈ ငႃးမူၼ်းၼႆႉ ပဵၼ်မဵဝ်းဢၼ်ၽုၵ်ႇငၢႆႈတွၼ်ႈတႃႇၼႂ်းမိူင်းႁဝ်းလႄႈ ပဵၼ်မဵဝ်းဢၼ်ၶဝ်ႈတၢင်းတိုဝ်းတင်းၼမ်ဝႆႉယူႇ။ သမ်ႉဝႃႈမၼ်းတေမီးၽွၼ်းလီ တင်းၼမ်ၵေႃႈ မၼ်းမီးၽွၼ်းတုမ်ႉယွၼ်ႈၸွမ်းမႃးပႃးယူႇ ယွၼ်ႉၼၼ် မိူဝ်ႈၵိၼ်ၵေႃႈၵိၼ်ႁႂ်ႈသၢင်ႇထုၵ်ႇၵူၺ်းၼၼ်ႉ ၸင်ႇတေလီယဝ်ႉ။

ပိၼ်ႇတႅမ်ႈ − ထိူၼ်ႇလိုၵ်ႉ

တႆးလွတ်ႈလႅဝ်း

ဢၢင်ႈဢိင်မႃးတီႈ− healthbeauty.in.th, amprohealth

Facebook

ၶၢဝ်ႇလိုၼ်းသုတ်း