တူဝ်ႈလုမ်ႈၾႃႉတိတ်းၸပ်းမၢၵ်ႇလႅင်းလိင်းဢမ်ႇယွမ်း 2,103 ၵေႃႉယဝ်ႉ

ၽၢႆႇပၢႆးယူႇလီလုမ်ႈၾႃႉ WHO လၢႆးငၢၼ်း လွင်ႈတၢင်းပဵၼ်မၢၵ်ႇလႅင်းလိင်း တူဝ်ႈတင်းလုမ်ႈၾႃႉ ထူပ်းႁၼ်ၵူၼ်းတိတ်းၸပ်း ဢၼ်ယိုၼ်ယၼ်လႆႈ မီး 2,103 ၵေႃႉ  ၼႂ်း 42 ၸိုင်ႈမိူင်း ၼႆသေ၊ တႄႇဢဝ်ဝၼ်းထီႉ 1-15 June  2022 ပူၼ်ႉမႃးၼၼ်ႉ မီးၵူၼ်းလူႉသဵင်ႈတၢႆထႅင်ႈ 1 ၵေႃႉ တီႈၼႆၵျီးရီးယႃး ဝႃႈၼႆ။

လိူဝ်သေၼၼ်ႉ ၽၢႆႇပၢႆးယူႇလီလုမ်ႈၾႃႉၵေႃႈ တေၵိုတ်းလိုဝ်ႈ လွင်ႈလၢႆးငၢၼ်း ၵၢၼ်ၸႅၵ်ႇၽႄတၢင်းပဵၼ်မၢၵ်ႇလႅင်းလိင်း ဢၼ်ဝႃႈ ပဵၼ်တၢင်းပဵၼ်ၵိုၵ်းပိုၼ်ႉတီႈ ဢမ်ႇၼၼ် ပိုၼ်ႉတီႈဢၼ်ပဵၼ်ပွၵ်ႈဢွၼ်တၢင်းသုတ်း ၸိူဝ်းၼႆႉ လႄႈ လၢတ်ႈဝႃႈ တွၼ်ႈတႃႇမီးလွင်ႈၶိုပ်ႈၼႃႈ တႃႇႁပ်ႉမိုဝ်းၸွမ်း တၢင်းပဵၼ်မၢၵ်ႇလႅင်းလိင်း တူဝ်ႈလုမ်ႈၾႃႉၼႆႉ တေလႆႈဝႆႉပဵၼ်ဢၼ်လဵဝ်ၵၼ်ၵႂႃႇ လႄႈတႄႇဢဝ်ၼႆႉၵႂႃႇ တေလၢႆးငၢၼ်းလွင်ႈတၢင်းပဵၼ်ၼႆႉႁူမ်ႈၵၼ် လူၺ်ႈဢမ်ႇၸႅၵ်ႇၽႄ ဝႃႈၼႆ။

ၼႂ်းပွတ်းႁွင်ႇလႄႈပွတ်းၸၢၼ်းဢႅပ်ႉၾရိၵ၊ ပွတ်းတွၼ်ႈ Mediterranean ပွတ်းဝၼ်းဢွၵ်ႇ၊ ပႄႇသိၾိၵ်ႇပွတ်းဝၼ်းတူၵ်း ဢိၵ်ႇတင်း ဢႅပ်ႉၾရိၵပွတ်းၵၢင်ၵေႃႈ ထူပ်းႁၼ်ဝႃႈ လွင်ႈၽႄႈလၢမ်းတၢင်းပဵၼ်မၢၵ်ႇလႅင်းလိင်းၼႆႉၵႂၢင်ႈၶႂၢင်မႃးသေ ၽႄႈလၢမ်းၵႂႃႇ ၼွၵ်ႈပိုၼ်ႉတီႈ ဢႅပ်ႉၾရိၵပွတ်းၵၢင်လႄႈပွတ်းဝၼ်းတူၵ်း ၸိူဝ်းၼႆႉယဝ်ႉ ဝႃႈၼႆ။

သိုပ်ႇလၢတ်ႈထႅင်ႈဝႃႈ တူဝ်ၼပ်ႉၵူၼ်းတိတ်းၸပ်းၼၼ်ႉ တေၸၢင်ႈသုင် လိူဝ်သေၼႆႉ ၸွမ်းလူၺ်ႈၶေႃႈထတ်းသၢင်ဢၼ်ဝႃႈ ဝၢႆးရၢတ်ႉမၢၵ်ႇလႅင်းလိင်းၼႆႉ လႅပ်ႈတေၽႄႈလၢမ်းတူဝ်ႈလုမ်ႈၾႃႉမႃးၸဵမ်မိူဝ်ႈ 5 ပီႊပူၼ်ႉမႃး တႄႇမိူဝ်ႈ 2017 ယဝ်ႉ ၵူၺ်းၵႃႈဢမ်ႇထူပ်းႁၼ်ၵူၺ်း ဝႃႈၼႆ။

ပႂ်ႉတူၺ်း မိူဝ်ႈၽုၵ်ႈဝၼ်းထီႉ 23 June 2022 ၼႆႉဝႃႈ ၽၢႆႇပၢႆးယူႇလီလုမ်ႈၾႃႉၶဝ် တေၸတ်းႁဵတ်းပၢင်ၵုမ်ၶိုၵ်ႉၶၵ်ႉ တႃႇတႅပ်းတတ်းလွင်ႈပိုၼ်ၽၢဝ်ႇ ၵၢၼ်ၽႄႈလၢမ်း တၢင်းပဵၼ်မၢၵ်ႇလႅင်းလိင်းၼၼ်ႉ ပဵၼ်ငဝ်းလၢႆးဢၼ်ၶိုၵ်ႉၶၵ်ႉ တႃႇပၢႆးယူႇလီ ၸၼ်ႉလုမ်ႈၾႃႉယူႇႁိုဝ် ဢၼ်ဝႃႈၼၼ်ႉ တေၸၢင်ႈမီးပိူင်ဢွၵ်ႇမႃး တႃႇႁပ်ႉမိုဝ်းၸွမ်းႁႂ်ႈၸႅင်ႈလႅင်းလိူဝ်ၵဝ်ႇ ႁူမ်ႈထိုင်ပႃး ၶၢဝ်းယၢမ်းၵုမ်းၶင်တူဝ်ဝႆႉ လႄႈ လွင်ႈမၵ်းတမ်းၵၢၼ်ၶဝ်ႈဢွၵ်ႇ ၶၢမ်ႈလႅၼ်လိၼ် ၼႂ်းလၢႆလၢႆမိူင်းၼၼ်ႉ ဝႃႈၼႆ။

ၽၢႆႇပၢႆးယူႇလီလုမ်ႈၾႃႉ လၢတ်ႈဝႃႈ မိူင်းဢၼ်ထူပ်းႁၼ် ၵူၼ်းတိတ်းၸပ်း မၢၵ်ႇလႅင်းလိင်းၼမ်လိူဝ်သေပိူၼ်ႈၼၼ်ႉ ပဵၼ်ၼႂ်းယူးရူပ်ႇၵေႃႈဝႃႈလႆႈယဝ်ႉ မိူၼ်ၼင်ႇ မိူင်းဢင်းၵိတ်ႉ 524 ၵေႃႉ၊ သပဵၼ်ႇ 313 ၵေႃႉ၊ ၵျႃႇမၼီႇ 263 ၵေႃႉ၊ ပေႃႇတူႇၵီႇ 241 ၵေႃႉ၊ ၾလင်ႇသဵတ်ႈ 125 ၵေႃႉ လႄႈ ၶႅၼ်ႇၼေႇတႃႇ 159 ၵေႃႉ။

ၼႂ်းဢမေႇရိၵၢၼ်ႇၼၼ်ႉၵေႃႈ ထူပ်းႁၼ်ၵူၼ်းတိတ်းၸပ်း ဢၼ်ယိုၼ်ယၼ်လႆႈ 72 ၵေႃႉ လႄႈ ၵူၼ်းတိတ်းၸပ်းၵမ်ႈၼမ် ပဵၼ်ၵူၼ်းၸၢႆးတေႃႇၵူၼ်းၸၢႆး ဢၼ်မီးလွင်ႈႁူမ်ႈၵႃႇမၵၼ်လႄႈ ၵမ်ႈၼမ် ဢမ်ႇလႆႈယူႇၼႂ်းဢႅပ်ႉၾရိၵ ဢၼ်ယၢမ်ႈပဵၼ်တီႈမၵ်းမၼ်ႈဝႃႈ ပဵၼ်တၢင်းပဵၼ်ၵိုၵ်းပိုၼ်ႉတီႈၼၼ်ႉ ဝႃႈၼႆ။

လိူဝ်သေၼၼ်ႉ ၼႂ်းပွတ်းတွၼ်ႈဢေးသျႃးၼႆႉၵေႃႈ မီးၵူၼ်းတိတ်းၸပ်းယဝ်ႉ ၵေႃႉၼိုင်ႈ  ၽၢႆႇပၢႆးယူႇလီမိူင်းသိင်ႇၵပူဝ်ႇ လၢႆးငၢၼ်းဝႃႈ ယိုၼ်ယၼ်လႆႈ ၵူၼ်းတိတ်းၸပ်းတၢင်းပဵၼ်မၢၵ်ႇလႅင်းလိင်းၵေႃႉၼိုင်ႈ ပဵၼ်ၵူၼ်းၶိူဝ်းဢင်းၵိတ်ႉ ဢႃႇယု 42 ပီႊ ႁဵတ်းၵၢၼ်ၼိူဝ်ႁိူဝ်းမိၼ်သေ ပဵၼ်ၵေႃႉဢွၼ်တၢင်းသုတ်း ဢၼ်တိတ်းၸပ်း ၼႂ်းပွတ်းဢေးသျႃးၸဵင်ႇၸၢၼ်းဝၼ်းဢွၵ်ႇ ၼႂ်းပီႊၼႆႉ ၼႆယဝ်ႉ။

ၵူၼ်းဢၼ်ႁူႉၸိုဝ်ႈဝႆႉ ဢၼ်ယူႇၸမ်ၵူၼ်းပဵၼ်ၼၼ်ႉ မီးဝႆႉ 13 ၵေႃႉသေ ၵူႈၵေႃႈ တေလႆႈ ၵုမ်းၶင်တူဝ်ဝႆႉ 21 ဝၼ်း တႄႇၸဵမ်မိူဝ်ႈ ဝၼ်းဢၼ်တိူဝ်ႉၼိူဝ်ႉတိူဝ်ႉၼင်ၵၼ် ၼၼ်ႉမႃး ဝႃႈၼႆ။

မီးလၢႆးငၢၼ်းဝႃႈ ၵူၼ်းပဵၼ်ၵေႃႉၼႆႉ တႄႇမီးၽၢင်ႁၢင်ႈႁူဝ်ၶႆႈ ၸဵမ်မိူဝ်ႈ ဝၼ်းထီႉ 14 June 2022 လႄႈ မီးလူမ်းၼၢဝ်ၼႂ်းဝၼ်းထီႉ 16 June 2022 သေ တႄႇမီးတုမ်ႇဢွၵ်ႇမႃး ၼႂ်းဝၼ်းထီႉ 19 June 2022 ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း