တူႇရၵီႇ ဢဝ် Drone ပွႆႇမၢၵ်ႇၼႂ်းမိူင်းဢီႇရၢတ်ႉလႄႈ မီးၵူၼ်းမိူင်းတၢႆၵမ်ႈၽွင်ႈ

သိုၵ်းတူႇရၵီႇ ဢဝ် Drone လမ်းၼိုင်ႈၵႂႃႇပွႆႇမၢၵ်ႇ ဢွင်ႈတီႈဢၼ်မီး ၸုမ်းသိုၵ်းၵူၼ်းမိူင်းယႃႇသီႇတီႇ ၼႂ်းဝဵင်းသူးၼီႇ ၸႄႈတွၼ်ႈသိၼ်ႇၵျႃႇ မိူင်းဢီႇရၢတ်ႉ လႄႈ တိူဝ်ႉၺႃးပႃးၵူၼ်းမိူင်းတၢႆ 6 ၵေႃႉ ၼႆယဝ်ႉ။

မိူဝ်ႈဝၼ်းထီႉ 15 June 2022  ၽူႈၵွၼ်းၸႄႈဝဵင်းသူးၼီႇ လၢတ်ႈတီႈပၢင်သပ်းလႅင်း ၸႅင်ႈၶၢဝ်ႇဝႃႈ − ဢွင်ႈတီႈဢၼ် သိုၵ်းတူႇရၵီႇ ၸႂ်ႉၶိူင်ႈမိၼ် Drone သေ ၶဝ်ႈမႃးပွႆႇမၢၵ်ႇ ၼႂ်းမိူင်းဢီႇရၢတ်ႉၼႆႉ တိူဝ်ႉၺႃးၵူၼ်းမိူင်း တၢႆ 6 ၵေႃႉ ၼႂ်းၼၼ်ႉပႃး လုၵ်ႈဢွၼ်ႇၵေႃႉၼိုင်ႈ၊ ၵဵဝ်ႇလူၺ်ႈလွင်ႈၼႆႉသေ ၶႂ်ႈယွၼ်းတိုၵ်းသူၼ်း ၽၢႆႇတၢင်းသုၼ်ၵၢင်လူင်ပွင်ၸိုင်ႈ  ထုၵ်ႇလီၶပ်းၶိုင်ႁၢင်ႈႁႅၼ်းႁႄႉၵင်ႈၼႂ်းဝဵင်းယူႇ− ဝႃႈၼႆ။

သိုၵ်းၵူၼ်းမိူင်းယႃႇသီႇတီႇ ၼႆႉပဵၼ်ပႃး “ပႃႇတီႇၵူၼ်းႁဵတ်းၵၢၼ် ၵႃႇတိတ်ႇသတၢၼ်ႇ” သေ ထုၵ်ႇလူင်ပွင်ၸိုင်ႈ မိူင်းတူႇရၵီႇ လႄႈ ထႅင်ႈလၢႆလၢႆၸိုင်ႈမိူင်း ပိုၼ်ၽၢဝ်ႇမၵ်းမၼ်ႈပဵၼ် ၸုမ်းၵေႃႇၵၢၼ်ႁၢႆႉ ၼႆယဝ်ႉ။

လွင်ႈဢၼ်သိုၵ်းတူႇရၵီႇ ၸႂ်ႉတပ်ႉၵၢင်ႁၢဝ်သေ ၶဝ်ႈပိုတ်းယိုဝ်းၸုမ်းၵေႃႇၵၢၼ်ႁၢႆႉ ၼႂ်းမိူင်းဢီႇရၢတ်ႉ ပဵၼ်မိူဝ်ႈဝၼ်းထီႉလႂ် လႄႈ ၵူၼ်းႁၢႆႉတၢႆၵႃႈႁိုဝ်ၼႆၼၼ်ႉ ဢမ်ႇလႆႈႁၼ် ၽူႈၵွၼ်းၸႄႈဝဵင်းသူးၼီႇ လၢတ်ႈထိုင်ပႃး၊ လွင်ႈတူႇရၵီႇ ၸႂ်ႉတပ်ႉၵၢင်ႁၢဝ်ပူၼ်ႉပႅၼ်ၶဝ်ႈ ၼႂ်းၶွပ်ႇလိၼ်မိူင်းဢီႇရၢတ်ႉၼႆႉၵေႃႈ ဢမ်ႇပႆႇႁၼ်လၢတ်ႈသင်ၸွမ်း ၼႆယဝ်ႉ။

မိူင်းတူႇရၵီႇလႄႈမိူင်းဢီႇရၢတ်ႉၼႆႉ လႅၼ်လိၼ်တိတ်းၸပ်းၵၼ်သေ တူႇရၵီႇ ၵႆႉမီးပၼ်ႁႃၵၼ်တင်း ၸုမ်းၵေႃႇၵၢၼ်ႁၢႆႉ ဢၼ်မီးၼႂ်းမိူင်းဢီႇရၢတ်ႉ ၼႆယဝ်ႉ။

တႆးလွတ်ႈလႅဝ်း