တၢင်းပဵၼ်ယဵဝ်ႈဝၢၼ်

တၢင်းပဵၼ်ယဵဝ်ႈဝၢၼ် ပဵၼ်တၢင်းပဵၼ်ဢၼ် ၵူၼ်းႁဝ်းႁူႉၸၵ်းၵၼ်လႄႈ ပဵၼ်တၢင်းပဵၼ်ဢၼ်ၵူၼ်းၵမ်ႈၼမ်ၵႆႉပဵၼ်မဵဝ်းၼိုင်ႈၼၼ်ႉယဝ်ႉ။

တၢင်းပဵၼ်ယဵဝ်ႈဝၢၼ်ၼႆႉ တီႈၼႂ်းလိူတ်ႈမီးထၢတ်ႈၵိူဝ်ဝၢၼ်ၼမ်မႃးလိူဝ်ၵဝ်ႇ ၸွမ်းလူၺ်ႈႁေႃႇမူၼ်းဢိၼ်ႇသူႇလိၼ်ႇ မီးၼမ်ႉၵတ်ႉႁဵတ်းၵၢၼ်ယွမ်းလူင်း ပဵၼ်လွင်ႈတၢင်းဢၼ်ႁဵၼ်းႁႂ်ႈထၢတ်ႈၵိူဝ်ဝၢၼ် ၼႂ်းသဵၼ်ႈလိူတ်ႈတိူဝ်းသုင်ၶိုၼ်ႈလႄႈ  သင်ၸိူဝ်ႉဝႃႈ ပွႆႇဝႆႉၶၢဝ်းႁိုင်ၼႆၸိုင် တေႁဵတ်းႁႂ်ႈ ပဵၼ်တၢင်းပဵၼ်သွၼ်ႉတၢင်ႇမဵဝ်းမႃးလႆႈထႅင်ႈ မိူၼ်ၼင်ႇ တႃ၊ တႂ်၊ ၶူင်ႉသၢင်ႈဢႃႇယူင်ႇ ၸိူဝ်းၼႆႉ ၵမ်ႈၼမ် ဢၼ်ႁဝ်းၵိၼ်ဢႃႇႁႃႇႁၶဝ်ႈၵႂႃႇၼၼ်ႉ ၼႂ်းတူဝ်ၶိင်းႁဝ်းတေလႅၵ်ႈလၢႆႈပဵၼ်ထၢတ်ႈၵိူဝ်ဝၢၼ်မႃးယူႇယဝ်ႉ။

တၢင်းပဵၼ်ယဵဝ်ႈဝၢၼ်

တၢင်းပဵၼ်ယဵဝ်ႈဝၢၼ် ၼႆႉတေမီးယူႇလၢႆလၢႆမဵဝ်း မိူၼ်ၼင်ႇ−

  1. (Type 1 Diabetes) ယဵဝ်ႈဝၢၼ်မဵဝ်းထီႉ 1 ပဵၼ်ယွၼ်ႉ တပ်းဢွၼ်ႇဢမ်ႇႁဵတ်းဢွၵ်ႇပၼ် ဢိၼ်ႇသူႇလိၼ်ႇလႆႈ။
  2. (Type 2 Diabetes) ယဵဝ်ႈဝၢၼ်မဵဝ်းထီႉ 2 ပဵၼ်ယွၼ်ႉ တပ်းဢွၼ်ႇႁဵတ်းဢွၵ်ႇႁေႃႇမူင်း ဢိၼ်ႇသူႇလိၼ်ႇဢမ်ႇၵုမ်ႇထူၼ်ႈပဵင်းပေႃး ဢမ်ႇၼၼ် ၼႂ်းတူဝ်ၶိင်းမီးလွင်ႈၶတ်းၶႂၢင်တေႃႇဢိၼ်ႇသူႇလိၼ်ႇ (insulin resistance)။
  3. (Gestational Diabetes) တၢင်းပဵၼ်ယဵဝ်ႈဝၢၼ်မိူဝ်ႈပႃးတွင်ႉ တေမီးတၢင်းပဵၼ်မိူဝ်ႈၽွင်းပႃးတွင်ႉ ၸွမ်းလူၺ်ႈလွင်ႈလႅၵ်ႈလၢႆႈႁေႃႇမူၼ်း၊ လူၺ်ႈတီႈၵူၼ်းပဵၼ်ဢမ်ႇယၢမ်ႈပဵၼ်တၢင်းပဵၼ်ၼႆႉမႃး သင်ၸိူဝ်ႉဝႃႈ ၵိူတ်ႇလုၵ်ႈယဝ်ႉၵေႃႈ တေႁၢႆၵႂႃႇ ၵူၺ်းၵႃႈ တေၸၢင်ႈပဵၼ်တၢင်းပဵၼ် ယဵဝ်ႈဝၢၼ်မဵဝ်းထီႉ2 လႆႈၼႂ်းၶၢဝ်းတၢင်းၼႃႈယူႇ။

လိူဝ်သေ 3 မဵဝ်းၼႆႉယဝ်ႉ ယင်းတေမီးထႅင်ႈ တၢင်းပဵၼ်ယဵဝ်ႈဝၢၼ် ဢမ်ႇပေႃးၵႆႉထူပ်းႁၼ် မိူၼ်ၼင်ႇ  (Monogenic Diabetes)  ၊ (Cystic Fibrosis) ယဵဝ်ႈဝၢၼ်ဢၼ်မႃးၸွမ်းတၢင်းပဵၼ်တၢင်ႇမဵဝ်းလႄႈ လွင်ႈၸႂ်ႉတိုဝ်းယႃ ၸိူဝ်းၼႆႉပႃး။

တေႁူႉလႆႈၸိူင်ႉႁိုဝ် ဝႃႈမီးတၢင်းပဵၼ်ယဵဝ်ႈဝၢၼ်

ၽၢင်ႁၢင်ႈတၢင်းပဵၼ်ၵူၼ်းမီးယဵဝ်ႈဝၢၼ် −

  • ၵႆႉတွင်ႉမႆႈယူႇတႃႇသေႇ
  • ၶေႃးႁႅင်ႈတွင်ႉမႆႈၼမ်ႉ
  • ၽၢႆႈၼမ်လႄႈ ၵႆႉၽၢႆႈ
  • ႁိူဝ်ႉဢူၼ်ႈငၢႆႈ
  • ၽိဝ်ၼိူဝ်ႉၼင်ႁႅင်ႈ ၶူမ်းၸွမ်းၽိဝ်ၼင်
  • ၵႆႉဢွၵ်ႇတုမ်ႇၸွမ်းတူဝ်
  • တႃႁႅင်ႈ၊ သၢႆတႃမူဝ်းမႃး ဢမ်ႇႁူႉလွင်ႈႁူႉတၢင်း
  • တူဝ်ၶိင်းယွမ်ဢမ်ႇမိူၼ်ၵဝ်ႇ ဢမ်ႇႁူႉလွင်ႈတၢင်းပဵၼ်မႃး
  • မိူဝ်ႈမီးႁွႆးၸဵပ်းယဵၼ်းတီႈတူဝ်ၶိင်းမႃးၵေႃႈ တေၼၢၼ်းႁႅင်ႈ ၼၢၼ်းၸိုၼ်ႈၶႅၼ်း ဢၼ်လွင်ႈယႂ်ႇၼႆႉ ႁွႆးၸဵပ်းတီႈတိၼ်
  • တိၼ်မိုဝ်းၼဵတ်းသၢၼ်ႈ သႅပ်ႇမႆႈဝႆႉ
  • ၶႃၶိုၼ်ႈ ႁူဝ်ၶဝ်ႇၶတ်း

ၵူၼ်းဢၼ်ၸၢင်ႈပဵၼ်တၢင်းပဵၼ်ယဵဝ်ႈဝၢၼ်လႆႈ

တၢင်းပဵၼ်ယဵဝ်ႈဝၢၼ်

  • ၵူၼ်းပဵၼ်တၢင်းပဵၼ်မဵဝ်းထီႉ 2 ပဵၼ်မႃးၸွမ်းၸိူဝ်ႉၶိူဝ်း ပေႃႈမႄႈ ပီႈၼွင်ႉ ဢၼ်ယၢမ်ႈမီးတၢင်းပဵၼ်ယဵဝ်ႈဝၢၼ်ၸိူဝ်းၼႆႉ သင်ၸိူဝ်ႉဝႃႈ ပေႃႈမႄႈမီးတၢင်းပဵၼ်ၼႆ လုၵ်ႈၵေႃႈတေပဵၼ်မႃးလႆႈ ႁူဝ်ပၢၵ်ႇႁႃႈသိပ်းယူႇ။
  • လိူဝ်သေပဵၼ်မႃးၸွမ်းၸိူဝ်ႉၶိူဝ်းယဝ်ႉ ယင်းၸၢင်ႈပဵၼ်မႃးလႆႈယွၼ်ႉ လွင်ႈၸႂ်ႉၸၢတ်ႈပၢၼ်ၸွမ်းဝၼ်း ဢၼ်တုမ်ႉတိူဝ်ႉတေႃႇတၢင်းပဵၼ်ယဵဝ်ႈဝၢၼ် မိူၼ်ၼင်ႇ မီးၼမ်ႉၼၵ်းတူဝ်ၼမ်ႁႅင်း ဢမ်ႇၼၼ် ပီးႁႅင်း၊ ၵူၼ်းဢမ်ႇလႆႈၸႂ်ဢွၵ်ႇဢဵၼ်ႁႅင်း၊ ၵူၼ်းမီးၶႆမၼ်းၼႂ်းသဵၼ်ႈလိူတ်ႈၼမ် ၵူၼ်းၸိူဝ်ႉၼႆႉ မီးတိုဝ်ႉတၢင်းတႃႇတေပဵၼ်ယဵဝ်ႈဝၢၼ် မဵဝ်းထီႉ 2 မဵဝ်းထီႉ 1 လႆႈ။
  • ၵူၼ်းပဵၼ်တၢင်းပဵၼ်ယဵဝ်ႈဝၢၼ် ၵမ်ႈၼမ်တေပဵၼ်တီႈၵူၼ်းဢႃႇယု 30 ပီႊၶိုၼ်ႈၼိူဝ် ၵူၺ်းၵႃႈ တၢင်းပဵၼ်ယဵဝ်ႈဝၢၼ်မဵဝ်းထီႉ 2 ၼႆႉ ထူပ်းႁၼ်လႆႈၼႂ်းၸုမ်းၵူၼ်းဢႃႇယုလဵၵ်ႉလူင်း ၼႂ်းၵႄႈ 20-30 ပီႊ ၸိူဝ်းၼႆႉမႃးယူႇ။ လိူဝ်သေၼၼ်ႉ ၵူၼ်းဢၼ်ဢႃႇယုတိုၵ်ႉလဵၵ်ႉၼႆႉ ၵုမ်းထိင်းလႆႈယၢပ်ႇလႄႈ တေၸၢင်ႈပဵၼ်တၢင်းပဵၼ်သွၼ်ႉမႃးလႆႈငၢႆႈယူႇယဝ်ႉ။
  • ၵူၼ်းမီးတၢင်းပဵၼ်လိူတ်ႈသုင်။

တၢင်းပဵၼ်သွၼ်ႉၸွမ်းတၢင်းပဵၼ်ယဵဝ်ႈဝၢၼ်

တၢင်းပဵၼ်ယဵဝ်ႈဝၢၼ်

မိူဝ်ႈမီးထၢတ်ႈၵိူဝ်ဝၢၼ်ၼႂ်းလိူတ်ႈၼမ်ၶိုၼ်ႈလႄႈ ပဵၼ်မႃးၶၢဝ်းႁိုင်ပေႃးၼႆ တေၸၢင်ႈပဵၼ်သဵၼ်ႈလိူတ်ႈပိၵ်ႉတၼ်လႆႈငၢႆႈမႃး၊ တုမ်ႉယွၼ်ႈထိုင်ႁႅင်းၶၢမ်ႇတူဝ်မႃး ၸွမ်းလူၺ်ႈထၢတ်ႈၵိူဝ်ဝၢၼ်ၼႂ်းလိူတ်ႈသုင်မႃးၶၢဝ်းႁိုင်သေ ထၢတ်ႈၵိူဝ်ဝၢၼ် ၼႂ်းလိူတ်ႈၼၼ်ႉ တေၵႂႃႇတိတ်းၸပ်းၸွမ်းမဵတ်ႉလိူတ်ႈၶၢဝ် ႁဵတ်းႁႂ်ႈၼမ်ႉၵတ်ႉ လွင်ႈႁဵတ်းၵၢၼ် ၶဵင်ႇတႃႉတေႃႇၸိူဝ်ႉမႅင်းယွမ်းလူင်းယဝ်ႉ တေၸၢင်ႈတိတ်းၸပ်းၸိူဝ်ႉမႅင်းမႃးလႆႈငၢႆႈမႃးယူႇ။ တၢင်းပဵၼ်ဢၼ်သွၼ်ႉ ၸွမ်းတၢင်းပဵၼ်ယဵဝ်ႈဝၢၼ် ဢၼ်ၵႆႉထူပ်းႁၼ်ၼႆႉတေမီး မိူၼ်ၼင်ႇ-

  1. တၢင်းပဵၼ်သွၼ်ႉတီႈတႃ

တၢင်းပဵၼ်သွၼ်ႉတီႈတႃ ဢမ်ႇၼၼ် တၢင်းပဵၼ်ယဵဝ်ႈဝၢၼ်ၶိုၼ်ႈတႃ ထၢတ်ႈၵိူဝ်ဝၢၼ်ၼႂ်းလိူတ်ႈၼမ်မႃးၼႆၸိုင် တေတုမ်ႉတိူဝ်ႉတေႃႇ ၼင်မၢင်မၢင်ဢၼ်မီးတီႈပိူၵ်ႇတႃၼၼ်ႉ လူႉၵွႆလႆႈလႄႈ သင်ၸိူဝ်ႉဝႃႈ ပွႆႇဝႆႉဢမ်ႇယူတ်းယႃၼႆၸိုင် တေၸၢင်ႈလွၵ်ႈမႃးယဝ်ႉ တႃၸၢင်ႈမွတ်ႇလႆႈယူႇ လိူဝ်သေၼၼ်ႉ ယင်းၸၢင်ႈပဵၼ်လႆႈတႃမူၼ်ႇၸိူဝ်းၼႆႉထႅင်ႈယဝ်ႉ။

  1. တၢင်းပဵၼ်သွၼ်ႉတီႈတႂ်

တၢင်းပဵၼ်သွၼ်ႉတီႈတႂ်ၼႆႉ  မိူဝ်ႈတႄႇပဵၼ်ၼၼ်ႉ တႂ်တေႁဵတ်းၵၢၼ်ၼၵ်း ႁႅင်းပူၼ်ႉတီႈလႄႈ ၸွမ်းၼင်ႇထၢတ်ႈၵိူဝ်ဝၢၼ်ၼႂ်းသဵၼ်ႈလိူတ်ႈၼမ်မႃးသေ ႁႅင်းၸၼ်လိူတ်ႈၵႂႃႇၸူးတီႈတႂ်ၼၼ်ႉၵေႃႈၼမ်မႃး ပေႃးဝႃႈၸႅတ်ႈၸူၺ်း လွင်ႈႁဵတ်းၵၢၼ်တႂ်ၽွင်းၸိူင်ႉၼႆ တေဢမ်ႇႁၼ်ၽိတ်းပိူင်ႈသင် သင်ၸိူဝ်ႉဝႃႈပဵၼ်မႃးၶၢဝ်းႁိုင် လွင်ႈႁဵတ်းၵၢၼ်တႂ်တေႁၢႆႉႁႅင်းမႃး ပေႃးဝႃႈဢမ်ႇလႆႈယူတ်းယႃထုၵ်ႇမႅၼ်ႈၸွမ်း တေၸၢင်ႈပဵၼ်တႂ်ဝၢႆးထိုင်တီႈ တေလႆႈလၢင်ႉတႂ်ၸိူဝ်းၼႆႉမႃးယဝ်ႉ။

  1. တၢင်းပဵၼ်သွၼ်ႉတီႈသဵၼ်ႈဢႃႇယူင်ႇ

တၢင်းပဵၼ်ၼႆႉ ၵႆႉလႆႈထူပ်းႁၼ်လိူဝ်သေပိူၼ်ႈ မိူၼ်ၼင်ႇ တိၼ်သၢၼ်ႈမိုဝ်းသၢၼ်ႈ ၼႃဝႆႉမိူၼ်သႂ်ႇထူင်တိၼ်ထူင်မိုဝ်းယူႇတႃႇသေႇ မၢင်ၵေႃႉၵေႃႈ တေၸၢင်ႈၸဵပ်းမိူၼ်ၶဵမ်လႅမ်လႅမ်တႅင်းသႂ်ႇ မၢင်ၵေႃႉတေၸၢင်ႈၸဵပ်းသႅပ်ႇၸွမ်းပၢႆတိၼ်ပၢႆမိုဝ်း၊ ဢမ်ႇမီးႁိူဝ်ႇဢွၵ်ႇ ဢမ်ႇၼၼ် ႁိူဝ်ႇဢွၵ်ႇငၢႆႈလိူဝ်သေၵဝ်ႇ၊ ႁူဝ်ၸႂ်တဵၼ်ႈဢမ်ႇမၢၼ်ႇ၊ ၵႅၼ်ႉငၢႆႈ၊ တွင်ႉပိၵ်ႉငၢႆႈ၊ မူၺ်ႈၶိုၼ်ႈၸွမ်းလိၼ်ႉၵႆႇ ၸွမ်းလူၺ်ႈၶူင်ႉဢႃႇယူင်ႇ ၵုမ်းထိင်းပၼ်လွင်ႈမိပ်ႇတူင်ႉၼိုင်သဵၼ်ႈတၢင်းလွတ်ႇႁူင်းၶဝ်ႈၽိတ်းပိူင်ႈ။

  1. သဵၼ်ႈလိူတ်ႈလႅင်လူင်ပိၵ်ႉတၼ်

တၢင်းပဵၼ်သဵၼ်ႈလိူတ်ႈလူင်ပိၵ်ႉတၼ်ၼႆႉ တေပဵၼ်မႃးၸွမ်းၶႃ ၽၢင်ႁၢင်ႈဢၼ်ၵႆႉထူပ်းႁၼ်ၵေႃႈ ၶႃၸဵပ်းႁႅင်းႁႅင်းမိူဝ်ႈပႆ/လႅၼ်ႈ လႄႈ တေလီမႃးၶိုၼ်းမိူဝ်ႈလိုဝ်ႈယွၼ်ႇၶႃ ပၢႆတိၼ်ပၢႆမိုဝ်းၵတ်းလၢင်ႈ ၶူၼ်ၶႃႁူင်ႈ ၽိဝ်ၼိူဝ်ႉၼင်ၸွမ်းၶႃလိူမ်ႈငဝ်း သင်ၸိူဝ်ႉဝႃႈပွႆႇဝႆႉ ဢမ်ႇလႆႈယူတ်းယႃၼႆၸိုင် တေႁဵတ်းႁႂ်ႈပဵၼ် သဵၼ်ႈလိူတ်ႈပိၵ်ႉတၼ် ထိုင်တီႈပၢႆတိၼ်ၶၢတ်ႇလိူတ်ႈ လႄႈ တေၸၢင်ႈလႆႈတႅပ်းတိၼ် ဢမ်ႇၼၼ် တႅပ်းၶႃပႅတ်ႈ လူးၵွၼ်ႇယဝ်ႉ။

  1. သဵၼ်ႈလိူတ်ႈႁူဝ်ၸႂ်တိပ်ႇ

တၢင်းပဵၼ်ၼႆႉ ၵႆႉလႆႈထူပ်းႁၼ်တီႈၵူၼ်းပဵၼ်တၢင်းပဵၼ်ယဵဝ်ႈဝၢၼ်လႄႈ ပဵၼ်တၢင်းပဵၼ်သွၼ်ႉဢၼ်ႁၢႆႉႁႅင်း လူၺ်ႈသဵၼ်ႈလိူတ်ႈဢၼ်ၵႂႃႇလဵင်ႉႁူဝ်ၸႂ် ၼၼ်ႉ ႁဵတ်းႁႂ်ႈၵၢမ်ႈၼိူဝ်ႉႁူဝ်ၸႂ်ၶၢတ်ႇလိူတ်ႈ သင်ၸိူဝ်ႉဝႃႈ သဵၼ်ႈလိူတ်ႈတိပ်ႇမႃးႁၢဝ်ႈႁႅင်းၼႆ တေပဵၼ်မႃးၵၢမ်ႈၼိူဝ်ႉႁူဝ်ၸႂ်တၢႆလႄႈ ႁႅင်းမိပ်ႇႁူဝ်ၸႂ်ယွမ်းလူင်း၊ ႁူဝ်ၸႂ်ဝၢႆး၊ ႁႅင်းလိူတ်ႈဢေႇ ႁူဝ်ၸႂ်တဵၼ်ႈဢမ်ႇပုင်ႇမၢၼ်ႇလႄႈ ၸၢင်ႈၵိုင်ႉၵၢင်ႉတၢႆလႆႈ ယူႇယဝ်ႉ။

  1. သဵၼ်ႈလိူတ်ႈဢွၵ်းဢေႃတိပ်ႇ

တၢင်းပဵၼ်ၼႆႉ ပဵၼ်တၢင်းပဵၼ်သွၼ်ႉႁၢႆႉႁႅင်းမိူၼ်ၵၼ်ယဝ်ႉ မိူဝ်ႈပဵၼ်တၢင်းပဵၼ်သဵၼ်ႈလိူတ်ႈၼႂ်းဢွၵ်းဢေႃတိပ်ႇမႃးၼႆ  ႁဵတ်းႁႂ်ႈလွင်ႈႁဵတ်းၵၢၼ်ဢွၵ်းဢေႃလႄႈ သဵၼ်ႈဢႃႇယူင်ႇ ၶၢတ်ႇလိူတ်ႈ၊ လိူတ်ႈဢေႇမႃးသေ ၸၢင်ႈပဵၼ်လႆႈတၢႆၽၢၵ်ႇ၊ သူပ်းမိတ်း၊ လၢတ်ႈဢမ်ႇၸႅင်ႈ ၸိူဝ်းၼႆႉယူႇယဝ်ႉ။

လၢႆးယူတ်းယႃတၢင်းပဵၼ်ယဵဝ်ႈဝၢၼ်တၢင်းပဵၼ်ယဵဝ်ႈဝၢၼ်

လွင်ႈယူတ်းယႃတၢင်းပဵၼ်ယဵဝ်ႈဝၢၼ်ၼႆႉ တေလႆႈမီးလွင်ႈႁူမ်ႈမိုဝ်းတင်း မေႃယႃ လႄႈ သႂ်ႇၸႂ်ၼိူဝ်လွင်ႈၵိၼ်ယႅမ်ႉၸိူဝ်းၼႆႉမႃးယဝ်ႉ။ ဢၼ်လမ်ႇလွင်ႈၼႆႉၵေႃႈ တူဝ်ၵူၼ်းပဵၼ်ၼၼ်ႉ တေလႆႈဝႆႉၼမ်ႉၼၵ်းၼိူဝ်တၢင်းပဵၼ်တူဝ်ၵဝ်ႇသေ လုမ်းလႃးတူဝ်ၸဝ်ႈၵဝ်ႇ ႁႂ်ႈလီၼၼ်ႉယဝ်ႉ။ သမ်ႉဝႃႈတေယူတ်းယႃ ဢမ်ႇယႃႁၢႆၶႅၼ်းၶိုၼ်းလႆႈမိူၼ်ၵဝ်ႇသေတႃႉ သင်ဝႃႈၵုမ်းထိင်းပၼ်ပၼ်လႆႈလီ ၼႆၸိုင် တေလီမႃးလႆႈယူႇ။ ၵူၺ်းၵႃႈ တေလႆႈထိင်းပၼ်ထၢတ်ႈၵိူဝ်ဝၢၼ်ၼႂ်းလိူတ်ႈ မိူၼ်ၼင်ႇ လိူၵ်ႈၵိၼ်တၢင်းၵိၼ်ဢၼ်ပဵၼ်ၽွၼ်းလီ ဢမ်ႇတုမ်ႉတိူဝ်ႉတေႃႇ တၢင်းပဵၼ်၊ ဢွၵ်ႇဢဵၼ်ႁႅင်း၊ ၸႂ်ႉယႃလူတ်းယွမ်းထၢတ်ႈၵိူဝ်ဝၢၼ်ၼႂ်းသဵၼ်ႈလိူတ်ႈ ႁူမ်ႈပႃး တူၺ်းၸွမ်းငဝ်းလၢႆးတၢင်းပဵၼ်ယူႇတႃႇသေႇ တေၸွႆႈလူတ်းယွမ်း တိုဝ်ႉတၢင်း တႃႇပဵၼ်တၢင်းပဵၼ်သွၼ်ႉလၢႆလၢႆဢၼ်မႃးလႆႈယဝ်ႉ။

တၢင်းပဵၼ်ယဵဝ်ႈဝၢၼ်ႁႄႉၵင်ႈလႆႈယူႇႁႃႉ?

ယၢမ်းလဵဝ် တၢင်းပဵၼ်ယဵဝ်ႈဝၢၼ် မဵဝ်းထီႉ 1 ၼႆႉ ဢမ်ႇၸၢင်ႈႁႄႉၵင်ႈလႆႈ  ၵူၺ်းၵႃႈ တၢင်းပဵၼ်ယဵဝ်ႈဝၢၼ်မဵဝ်းထီႉ 2 တႄႉ ႁႄႉၵင်ႈလႆႈယူႇ ၵူၼ်းဢၼ်မီးၽၢင်ႁၢင်ႈ ဢၼ်တူၺ်းႁၼ်ဝႃႈ တေၸၢင်ႈပဵၼ်တၢင်းပဵၼ်ယဵဝ်ႈဝၢၼ်ၼၼ်ႉ ထုၵ်ႇလီဢွၵ်ႇဢဵၼ်ႁႅင်းပၼ်တႃႇသေႇလႄႈ ထိင်းပၼ်လွင်ႈၵိၼ်ယႅမ်ႉ၊ ႁႂ်ႈၼမ်ႉၼၵ်းတူဝ်ၼၼ်ႉ ႁႂ်ႈလူတ်းယွမ်းလူင်းလိူဝ်သေၵဝ်ႇ ဢေႇသုတ်း 7-10% တေၸၢင်ႈလူတ်းယွမ်း တိုဝ်ႉတၢင်းတႃႇပဵၼ်ယဵဝ်ႈဝၢၼ်လႆႈၼႆယဝ်ႉ။

တၢင်းပဵၼ်ယဵဝ်ႈဝၢၼ်ၼႆႉ ၸွင်ႇတေၶႅၼ်းလီၶိုၼ်းမိူၼ်ၵဝ်ႇလႆႈယူႇႁိုဝ်?

မိူဝ်ႈပူၼ်ႉမႃးၼၼ်ႉ ၼမ်ႉၵတ်ႉလွင်ႈယူတ်းယႃတၢင်းပဵၼ်ယဵဝ်ႈဝၢၼ်ၼႆႉ လိူဝ်သေ တေၵုမ်းထိင်းပၼ်တၢင်းပဵၼ်ယဝ်ႉ လူတ်းယွမ်းလွင်ႈတေပဵၼ်တၢင်းပဵၼ်သွၼ်ႉၼႆႉ ၼႆ ဢမ်ႇၸၢင်ႈယူတ်းယႃႁႂ်ႈၸႅင်ႈလႅင်းလႆႈ ၵူၺ်းၵႃႈ ၵၢပ်ႈပၢၼ်ယၢမ်းလဵဝ်တႄႉ လႆႈမီးလွင်ႈလဵပ်ႈႁဵၼ်းၶူၼ်ႉၶႂႃႉမႃးသေ ထူပ်းႁၼ်ဝႃႈ မီးလွၵ်းလၢႆးယူတ်းယႃ ၵူၼ်းပဵၼ်ယဵဝ်ႈဝၢၼ် ႁႂ်ႈၸိုၼ်ႈၶႅၼ်းၶိုၼ်းလႆႈလီမႃးလႆႈယူႇ သင်ၸိူဝ်ႉဝႃႈ ၵူၼ်းပဵၼ်မႃးပႆႇႁိုင်ၸိုင် တေမီးလွၵ်းလၢႆးမိူၼ်ၼင်ႇ ၽႃႇတတ်းႁူင်းၶဝ်ႈ တႃႇၵုမ်းထိင်းၼမ်ႉၼၵ်းတူဝ်လႄႈ လွင်ႈပီး ယူႇယဝ်ႉ။ ၵူၺ်းၵႃႈ ၽႃႇတတ်းႁူင်းၶဝ်ႈၼႆႉၵေႃႈ ဢမ်ႇႁဵတ်းလႆႈတီႈၵူၼ်းၵူႈၵေႃႉ ၸွမ်းလူၺ်ႈတေၸၢင်ႈမီးၽွၼ်းယွၼ်ႈမႃးၽၢႆႇလင်လႆႈထႅင်ႈ ယူႇတီႈမေႃယႃသေ တေလိူၵ်ႈၽႃႇတတ်းၵႂႃႇၵူၺ်း။

တၢင်းပဵၼ်ယဵဝ်ႈဝၢၼ်ၼႆႉ ႁူဝ်ၼပ်ႉၵူၼ်းပဵၼ်တိူဝ်းၶိုၼ်ႈမႃးၵူႈဝၼ်းယူႇ သမ်ႉဝႃႈတေမီးတၢင်းပဵၼ်သွၼ်ႉမႃးၸွမ်းၽၢႆႇလင်ၵေႃႈယဝ်ႉ ၵူၺ်းၵႃႈ မၼ်းၵေႃႈပဵၼ်တၢင်းပဵၼ်ဢၼ်ထိင်းလႆႈယၢပ်ႇ သင်ၸိူဝ်ႉဝႃႈ ၵူၼ်းပဵၼ် မီးလွင်ႈပွင်ႇၸႂ်ၸွမ်းတၢင်းပဵၼ်ယဵဝ်ႈဝၢၼ်လႄႈ ပၼ်လွင်ႈႁူမ်ႈမိုဝ်း ၼႂ်းၵၢၼ်ယူတ်းယႃၼႆၸိုင် တေႁဵတ်းႁႂ်ႈၵူၼ်းပဵၼ် ၸႂ်ႉၸၢတ်ႈပၢၼ်လႆႈလီ မိူၼ်ၵူၼ်းဢမ်ႇမီးတၢင်းပဵၼ်ယဵဝ်ႈဝၢၼ်ၼၼ်ႉမႃးလႆႈၶိုၼ်းယူႇယဝ်ႉ။

တႆးလွတ်ႈလႅဝ်း

ပိၼ်ႇတႅမ်ႈ − ထိူၼ်ႇလိုၵ်ႉ

ဢၢင်ႈဢိင်မႃးတီႈ

https://www.medparkhospital.com https://www.sanook.com https://www.pobpad.com

Facebook

ၶၢဝ်ႇလိုၼ်းသုတ်း