တၢင်းပဵၼ်ၵၢမ်ႈၼိူဝ်ႉႁူဝ်ၸႂ် မီးသင်လၢႆလၢႆ ?

ၵၢမ်ႈၼိူဝ်ႉႁူဝ်ၸႂ်ၽိတ်းပိူင်ႈ ဢမ်ႇၼၼ် Cardiomyopathy ၼၼ်ႉ ပဵၼ်တၢင်းပဵၼ် ၵၢမ်ႈၼိူဝ်ႉႁူဝ်ၸႂ် မီးလွင်ႈၽိတ်းပိူင်ႈ ထိုင်တီႈႁဵတ်းႁႂ်ႈ မၢၵ်ႇႁူဝ်ၸႂ်ႁဵတ်းၵၢၼ်ဢမ်ႇမၢၼ်ႇသေ ​​တေႁိူဝ်ႉဢူၼ်ႈ၊ ႁိူဝ်ႉငၢႆႈ၊ ထူၺ်ႈၸႂ်ယၢပ်ႇ၊ ႁူဝ်ၸႂ်တွတ်ႇဢမ်ႇမၢၼ်ႇ  ဢမ်ႇၼၼ် ထိုင်တီႈႁဵတ်းႁႂ်ႈႁူဝ်ၸႂ်ၵိုတ်းၵႂႃႇပႅတ်ႈလႆႈၼႆယဝ်ႉ။

လွင်းတၢင်း ႁဵတ်းႁႂ်ႈပဵၼ် တၢင်းပဵၼ်ၵၢမ်ႈၼိူဝ်ႉႁူဝ်ၸႂ်ၽိတ်းပိူင်ႈ

• ၸိူဝ်ႉၶိူဝ်း : မၢင်ပွၵ်ႈမၢင်လႂ်လွင်ႈတၢင်းၼၼ်ႉၸၢင်ႈလုၵ်ႉမႃးတီႈ gene ဢၼ်ၽိတ်းပိူင်ႈ​​သေသူင်ႇၽွၼ်းယွၼ်ႈ ႁႂ်ႈၵၢမ်ႈၼိူဝ်ႉမၢၵ်ႇႁူဝ်ၸႂ်လူႉလႆႈဝႆး။
• ၵၢမ်ႈၼိူဝ်ႉမၢၵ်ႇႁူဝ်ၸႂ်ၸဵပ်းယဵၼ်း : ယွၼ်ႉတိတ်းၸပ်းၸိူဝ်ႉမႅင်းဝၢႆးရၢတ်ႉသ် ၊ ပႅၵ်ႉတီးရီးယႃး ဢမ်ႇၼၼ် သႃး (Fungi) သေ ႁဵတ်းႁႂ်ႈၵၢမ်းၼိူဝ်ႉမၢၵ်ႇႁူဝ်ၸႂ်ၸဵပ်းယဵၼ်း။
• တၢင်းပဵၼ်ၶၢဝ်းယၢဝ်း : မိူၼ်ၼင်ႇ တၢင်းပဵၼ်လိူတ်ႈသုင် ၊ တၢင်းပဵၼ်လွတ်ႇလိူတ်ႈႁူဝ်ၸႂ် ၊ တၢင်းပဵၼ်ယဵဝ်ႈဝၢၼ် လႄႈ တၢင်းပဵၼ်ထႆးရွႆး thyroid ႁဵတ်းၵၢၼ်ဢမ်ႇမၢၼ်ႇ။
• ၵိၼ်ၶိူင်ႈမဝ်းမိင်း ဢမ်ႇၼၼ် လုတ်ႇလႅတ်းယႃႈ : သၢၼ်ၸိူဝ်းၼႆႉ​​တေၸၢင်ႈႁဵတ်းႁႂ်ႈ ၵၢမ်ႈၼိူဝ်ႉမၢၵ်ႇႁူဝ်ၸႂ်ဢူၼ်ႈဢွၼ်ႇ။
• လွင်ႈၵိၼ်ယႅမ်ႉ : ၶၢတ်ႇထၢတ်ႈဢႁႃႇရလမ်ႇလွင်ႈမၢင်မဵဝ်း မိူၼ်ၼင်ႇ ဝီႇတႃႇမိၼ်ႇ B1 ၸိူဝ်းၼႆႉ။

တၢင်းပဵၼ်ဢၼ်ၵဵဝ်ႇလူၺ်ႈၵၢမ်ႈၼိူဝ်ႉႁူဝ်ၸႂ်

• Dilated Cardiomyopathy (DCM) : ၵၢမ်ႈၼိူဝ်ႉႁူဝ်ၸႂ်ၵီႈယႂ်ႇၶိုၼ်ႈမႃး လႄႈ ဢူၼ်ႈဢွၼ်ႇမႃး ႁဵတ်းႁႂ်ႈႁူဝ်ၸႂ်တွတ်ႇႁဵတ်းၵၢၼ်ဢမ်ႇလႆႈလီ။
• Cardiomyopathy (HCM) : ၵၢမ်ႈၼိူဝ်ႉႁူဝ်ၸႂ်ၼႃၶိုၼ်ႈႁႅင်းသေ လိူတ်ႈဢမ်ႇၸၢင်ႈလႅၼ်လႆလႆႈလီ
• Restrictive Cardiomyopathy : ၵၢမ်ႈၼိူဝ်ႉႁူဝ်ၸႂ်ၶႅင် ႁူဝ်ၸႂ်ဢမ်ႇၸၢင်ႈယိုတ်ႈယၢၼ်းလႆႈၵႃႈႁိုဝ်လႄႈ တႃႇတေၵီႈႁပ်ႉလိူတ်ႈၼၼ်ႉၵေႃႈဢမ်ႇလႆႈတဵမ်ထူၼ်ႈ
• Arrhythmogenic Right Ventricular Cardiomyopathy (ARVC) : ၼိူဝ်ႉယႂ်းမၢင်ၶႆမၼ်း ဢမ်ႇၼၼ် ယႂ်းၼိူဝ်ႉၼဵဝ်(Adjesons)မႃးယူႇတီႈသႄး(လ်)ၵၢမ်ႈၼိူဝ်ႉမၢၵ်ႇႁူဝ်ၸႂ်ပႅတ်ႈ

ၵၢၼ်ယူတ်းယႃ

• ဢီႈယႃ – ယႃ​​ၵႄႈတၢင်းပဵၼ်လိူတ်ႈသုင်၊ ယႃႁႂ်ႈၵႆႉၵႆႉၽၢႆႈဢွၼ်ႇ။
• ယႃထိင်းလွင်ႈတဵၼ်ႈတွတ်ႇမၢၵ်ႇႁူဝ်ၸႂ်၊ ယႃလူတ်းယွမ်းလိူတ်ႈၵၢမ်ႈ။
• ၵၢၼ်ၸႂ်ႉတိုဝ်းၶိူင်ႈၸႂ်ႉတိုဝ်းၽၢႆႇပၢႆးယူႇလီ – သႂ်ႇၶိူင်ႈၸွႆႈႁႂ်ႈႁူဝ်ၸႂ်ႁဵတ်းၵၢၼ်ၶိုၼ်း ဢမ်ႇၼၼ် ၶိူင်ႈ defibrillator။
• ၵၢၼ်ၽႃႇတတ်း – ၵူၼ်းပဵၼ်မၢင်ၵေႃႉ ​​တေၸၢင်ႈလႆႈၽႃႇတတ်းလႅၵ်ႈလၢႆႈမၢၵ်ႇႁူဝ်ၸႂ် ဢမ်ႇၼၼ် ၼိူဝ်ႉယႂ်းမၢၵ်ႇႁူဝ်ၸႂ် ဢၼ်ၼႃႁႅင်းပူၼ်ႉဢွၵ်ႇပႅတ်ႈ။
• ၵၢၼ်လႅၵ်ႈလၢႆႈတၢင်းယၢမ်ႈ လႄႈ လွင်ႈၵိၼ်ယႅမ်ႉ- လူတ်းယွမ်းလွင်ႈၵိၼ်ၶိူင်ႈမဝ်းမိင်း လႄႈ လွင်ႈလုတ်ႇလႅၼ်းယႃႈ ဢိၵ်ႇတင်း ၵုမ်းထိင်းတၢင်းပဵၼ်တၢင်ႇၸိူဝ်း မိူၼ်ၼင်ႇ တၢင်းပဵၼ်ယဵဝ်ႈဝၢၼ်၊  တၢင်းပဵၼ်လိူတ်ႈသုင်။

တႃႇ​​တေယူတ်းယႃ တၢင်းပဵၼ်ၵၢမ်ႈၼိူဝ်ႉႁူဝ်ၸႂ်ၼၼ်ႉ တေလႆႈဢိင်လွင်ႈၵူတ်ႇထတ်း လႄႈ လွင်ႈမၵ်းမၼ်ႈတၢင်းပဵၼ် ႁႂ်ႈထုၵ်ႇမႅၼ်ႈ၊ လွင်ႈယူတ်းယႃ ဢၼ်ထုၵ်ႇမႅၼ်ႈတီႈမေႃယႃၶဝ် ၵွပ်ႈၼၼ် မိူဝ်ႈၵႂႃႇႁူင်းယႃၼၼ်ႉ ပဵၼ်သင်လၢႆလၢႆႁႂ်ႈလၢတ်ႈ မေႃယႃထၢမ်သႂ်ႇႁႂ်ႈတွပ်ႇလၢတ်ႈသိုဝ်ႈသိုဝ်ႈ ယႃႇၵူဝ် ယႃႇဢၢႆ ယႃႇၶၢၼ်ႉတွပ်ႇ မေႃယႃၶဝ်ၸင်ႇၸၢင်ႈထတ်းတၢင်းပဵၼ်ႁဝ်းတႅတ်ႈတေႃး ၼၼ်ႉယဝ်ႉ  ။

ပိၼ်ႇတႅမ်ႈ – လၢဝ်ၽွင်း

ဢၢင်ႈဢိင် – ch9airport.com